Read Bibliya Yera 1951 Itanguriro 13 Bible Online

Itanguriro 13 - Bibliya Yera 1951 bible

Itanguriro 13

¹Aburamu aradūga ava muri Egiputa, bo n’umugore wiwe n’ivyiwe vyose, na Loti ajana na we, baja i Negebu.

²Kandi Aburamu yar’ umutunzi cane w’amasho n’imikuku n’amafeza n’amazahabu.

³Nukw agenda aratāhīra, ava i Negebu arinda ashika i Beteli, ha hantu yashinze ihema ryiwe ubga mbere, hagati y’i Beteli n’i Hayi,

⁴hamwe hahora igicaniro yubatse ubga mbere: Aburamu yambarizay’ izina ry’Uhoraho.

⁵Kandi na Loti yagendana na Aburamu na we yar’ afise imikuku n’amasho n’amahema.

⁶Ico gihugu nticabakwira ngo babangikane, kukw itunga ryabo ryari ryinshi, bituma badashobora kubangikana.

⁷Haba intonganya hagati y’abungere ba Aburamu n’abungere ba Loti; kand’ ico gihe Abanyakanani n’Abaferizi ni bo bāba mur’ ico gihugu.

⁸Aburamu abarira Loti, ati Ndakwinginze, hoye kuba intonganya hagati yanje nawe, no hagati y’abungere banje n’abawe, kuko tuvukana.

⁹Ereg’ igihugu cose kir’ imbere yawe! Ndakwinginze ngo duhāne inta: ni wahitamwo kuja i bumoso nanje ndaja i buryo; ni waja i buryo ndaja i bumoso.

¹⁰Loti yunamura amaso, yitegereza ikiyaya cose co kuri Yorodani, abona ko har’ibigera vy’amazi hose. Uhoraho atararandura Sodomu na Gomora, ico kiyaya cari kimeze nka rya tongo ry’ Uhoraho, canke nk’ igihugu ca Egiputa ugiye werekeye i Sowari.

¹¹Nuko Loti ahitamw’ ico kiyaya cose co kuri Yorodani; aragenda aja i burasirazuba, bahāna inta.

¹²Aburamu aba mu gihugu c’i Kanani, Loti aba mu bisagara vyo muri ca kiyaya, agenda arunguruza amahema arinda ashika i Sodomu.

¹³Kand’ Abanyesodomu bār’ abanyavyaha, bacumura k’Uhoraho birengeje urugero.

¹⁴Loti amaze gutandukana na Aburamu, Uhoraho abarira Aburamu, at’ Unamura amaso yawe, uhēre ah’ uhagaze aho, witegereze i burārūko n’i bumanuko n’i burasirazuba n’i burengerazuba:

¹⁵iki gihugu cose ubonye ni wewe nzogiha, n’uruvyaro rwawe, gushitsa ibihe vyose.

¹⁶Kandi nzogwiza uruvyaro rwawe rungane n’umukungugu wo hasi: namb’ umuntu yoshobora guharūra umukungugu wo hasi, n’uruvyaro rwawe na rwo rwoharūrwa.

¹⁷Va hasi, ugēndūre iki gihugu iyo kiva kikagera, kukw ari wewe nzogiha.

¹⁸Aburamu yunguruza amahema, aragenda, aba i ruhande y’ibiti vya Mamure vyitwa imyeloni, bir’ i Heburoni, ahubakira Uhoraho igicaniro.