Read Bibliya Yera 1951 Itanguriro 14 Bible Online

Itanguriro 14 - Bibliya Yera 1951 bible

Itanguriro 14

¹Mu gihe ca Amurafeli umwami w’i Shinari, na Ariyoki umwami w’i Elasari, na Kedolawoma umwami w’i Elamu, na Tidali umwami w’i Goyimu,

²abo bami bāteye Bera umwami w’i Sodomu na Birusha umwami w’i Gomora, na Shinabu umwami w’i Adima, na Shemeberi umwami w’i Seboyimu, n’umwami w’i Bela (ari ho Sowari).

³Abo bose bakoranira hamwe mu kiyaya c’i Sidimu (ni ho habaye Ikiyaga c’ Umunyu).

⁴Bari bamaze imyaka cumi n’ibiri baganzwa na Kedolawoma, maze mu mwaka ugira icumi na gatatu baragarariza.

⁵Nuko mu mwaka ugira icumi na kane Kedolawoma n’abami bīfatanije na we ni kwo kuza, bazingazingira Abarefa muri Ashiteroti‐karunayimu, n’Abasuzi i Hamu, n’Abemi i Shave‐kiriyatayimu,

⁶n’Abahori babazingazingira i wabo mu mugamba i Seyiri, barabakinagiza babashitsa Eliparani hahereranye n’ubugaragwa.

⁷Barakevya, bashika Eni‐mishipati (ari h’i Kadeshi), bazingazinga igihugu cose c’Abamaleki, bo n’ Abamori baba i Hasasoni‐tamari.

⁸Maz’ umwami w’i Sodomu arashikuka, bo n’uw’i Gomora n’uw’i Adima n’uw’i Seboyimu n’uw’i Bela (ari ho Sowari); batondera urugamba mu kiyaya c’i Sidimu;

⁹barwanya Kedolawoma umwami w’i Elamu, na Tidali umwami w’i Goyimu, na Amurafeli umwami w’i Shinari, na Ariyoki umwami w’i Elasari; abo bami ukw ari bane barwanya batanu.

¹⁰Kand’ ico kiyaya c’i Sidimu cari cuzuye ivyobo vyimbgemwo kaburimbi, maz’ ingabo z’abami b’i Sodomu n’i Gomora zirahunga, zimwe zibikorokeramwo, izisigaye zihungira ku musozi muremure.

¹¹Basahura ibintu vyose vy’i Sodomu n’i Gomora, n’ivyo bāzigak’ uburamuko vyose, barīgīra.

¹²Bahitana na Loti umuhungwabo wa Aburamu, yaba i Sodomu, hamwe n’ibintu vyiwe, baraheza barīgīra.

¹³Haza umwe mu bahunze, abibarira Aburamu Umuheburayo: yaba i ruhande y’ibiti vy’imyeloni vy’Umwamori yitwa Mamure, mwene wabo wa Eshikoli na Aneri; kand’ abo bari bifatanije na Aburamu.

¹⁴Aburamu yumvise yuk’ uw’ i wabo yafashwe mpiri, ajana abanyarugo biwe bize kurwana, bāvukiye i we, amajana atatu n’icumi n’umunani, barabakurikira, babahambiriza i Dani.

¹⁵Aburamu ahenga mw ijoro, abantu biwe abacamw’ ibico, barabatera barabanesha, barabakinagiza gushitsa i Hoba, ahahera i bumoso bg’i Damasiko.

¹⁶Agarura ibintu vyose, agarura n’uw’i wabo Loti, n’ibintu vyiwe, n’abagore n’abakobga na bo, n’abandi bantu.

¹⁷Atabarutse, avuye kunesha Kedolawoma n’abandi bami bāri kumwe, umwami w’i Sodomu amusanganirira mu kiyaya c’i Shave, (ni co kiyaya c’umwami).

¹⁸Kandi Melekisedeki umwami w’i Salemu, umuherezi w’Imana Isumba vyose, azana imitsima na vino.

¹⁹Ahezagira Aburamu, at’ Uragahabga umugisha n’Imana Isumba vyose, Nyen’ ijuru n’isi:

²⁰kand’ Imana Isumba vyose iragahezagirwa, yagushize abansi mu maboko! Nuko Aburamu amuha ikigiracumi muri vyose.

²¹Umwami w’i Sodomu abarira Aburamu, ati Ndekerana abantu, ibintu ubitware.

²²Aburamu yishura umwami w’i Sodomu, ati Narahiye Uhoraho mmanitse ukuboko, ni we Mana Isumba vyose, Nyen’ ijuru n’isi,

²³yuko ntazogira ikintu na kimwe co mu vyawe ntwara, naho koba akanyuzi cank’ akagozi k’inkweto, kugira ngo ntuz’ uvuge, uti Ni jewe natungishije Aburamu.

²⁴Jeho nta co ngomba, atar’ impamba abantu banje bariye, n’abo twatabaranye ubagabanganye imigabane yabo, ni bo Aneri na Eshikoli na Mamure, bo ni bajane imigabane yabo.