Read Bibliya Yera 1951 Itanguriro 15 Bible Online

Itanguriro 15 - Bibliya Yera 1951 bible

Itanguriro 15

¹Hanyuma y’ivyo, ijambo ry’ Uhoraho riza kuri Aburamu nko mu nzozi, riti Aburamu, nta co utinya: ni jewe nkinzo yawe, uzohabga impēra ikomeye cane.

²Aburamu aramubaza, ati Mwami Uhoraho, uzompa iki, ko ngiye gupfa ata kana nsize, kand’ ūzotorana urugo rwanje akaba ari Eliyezeri Umunyadamasiko?

³Arongera, at’ Erega nta ruvyaro wampaye, kand’ umunyarugo yavukiye i wanje ni we azotora ivyanje.

⁴Maz’ ijambo ry’Uhoraho ryongera kuza kuri we, rit’ Uyo si we azotora ivyawe, arik’ ūzova mu kara kawe ni we azobitora.

⁵Amusohokana hanze, aramubgira, ati Rangamiza, urābe mw ijuru, uharūre inyenyeri, namba woshobora kuziharūra. At’ Uruvyaro rwawe ni ko ruzongana.

⁶Yizera Uhoraho, Uhoraho abimuharūrako nk’ ukugororoka.

⁷Aramubarira, ati Ni jewe Uhoraho nagukūye muri Uri i Bukaludaya kugira ngo nze nguhe iki gihugu ucegukire.

⁸Aramubaza, ati Mwami Uhoraho, icommenyesha yuko nzocegukira n’iki?

⁹Aramwishura, at’ Abīra inka y’ishashi imaze imyaka itatu, n’impene ivyara imaze imyaka itatu, n’impfizi y’intama imaze imyaka itatu nyene, n’intunguru imwe n’icana c’inuma.

¹⁰Yābīra ivyo vyose, abihimburamwo kubiri‐kubiri, igihimba cose agitumberanya na kigenzi caco: arikw inyoni zo ntiyazihimbagura.

¹¹Ibisīga vy’amērwe ngo bigwe kur’ iyo mivyimba, Aburamu akabigurura.

¹²Ku kirengazuba, Aburamu itiro riramuhwikira, asinzira ubutikoma; maz’ ubgoba butewe n’ umwiza w’umuzitanya buramufata.

¹³Uhoraho abarira Aburamu, at’ Umenye neza yuk’ uruvyaro rwawe ruzoba inyambukīra mu gihugu kitar’ icabo, kandi bazokorera bene co, na bo bazobagirira nabi imyaka amajana ane;

¹⁴maz’ iryo hanga bazokorera nzoricirakw iteka: arikw amaherezo bazorivamwo, bakūyey’ ubutunzi bginshi.

¹⁵Ariko weho uzohamvya ba sogokuruza amahoro, uzohambga wisāziye neza.

¹⁶Kand’ abuzukururuza b’abazojayo ni bo bazogaruka ino: kuko kugabitanya kw’ Abamori kutaruzura.

¹⁷Maz’ izuba rirenze, bumaze gukorana, haboneka ikibengebenge c’umuriro gipfūndūka umwotsi n’ urumuri rwaka, bica hagati y’ivyo bihimba.

¹⁸Kur’ uwo musi nyene Uhoraho asezeranira Aburamu isezerano, at’ Uhereye ku ruzi rwo muri Egiputa, ugashitsa ku ruzi runini ari rwo Efurate, uruvyaro rwawe ndaruhaye iki gihugu,

¹⁹ari co c’Abanyakeni n’ic’ Abakenizi n’ic’ Abakadimoni,

²⁰n’ic’ Abaheti n’ic’ Abaferizi n’ic’ Abarefa,

²¹n’ic’ Abamori n’ic’ Abanyakanani n’ic’ Abagirugashi n’ic’ Abayebusi.