Read Bibliya Yera 1951 Itanguriro 16 Bible Online

Itanguriro 16 - Bibliya Yera 1951 bible

Itanguriro 16

¹Sarayi muka Aburamu ntiyari yaravyaye, kandi yar’ afise incoreke y’Umunyegiputakazi yitwa Hagari.

²Sarayi abarira Aburamu, ati Rāba, Uhoraho yanyimye ivyara; enda vyara ku ncoreke yanje: kumbure nzoronkera akana kuri we. Nuko Aburamu yumvira Sarayi.

³Aburamu amaze imyaka cumi mu gihugu c’i Kanani, Sarayi umugore wiwe yābīra Hagari Umunyegiputakazi incoreke yiwe, amuha Aburamu umugabo wiwe.

⁴Nukw arārira Hagari, asama inda: maz’ abonye kw asamye inda, bimutera gukēngēra inabuja.

⁵Sarayi abarira Aburamu, at’ Aka gakēngērwe nkēngerewe kazoba ku mutwe wawe! Ko nashize incoreke yanje mu gikiriza cawe, maz’ ibonye kw ifise inda ica irankēngēra! Uhoraho n’aducire urubanza twe nawe!

⁶Aburamu yishura Sarayi, at’ Ereg’ incoreke yawe ni wewe uyigaba ukayiganza: n’umugire uk’ugomba kwose. Nuko Sarayi amukoresha agatuzo, araruha aramuhunga.

⁷Umumarayika asanga ageze i ruhande y’isōko y’amazi mu bugaragwa, ni yo sōko iherereye ku nzira ija i Shura.

⁸Aramubaza, ati Hagari, ncoreke ya Sarayi, uva he ukaja he? Aramwishura, ati Mpunze mabuja Sarayi.

⁹Umumarayika w’Uhoraho aramubgira, ati Subira kwa nyokobuja, uce bugufi musi yiwe.

¹⁰Umumarayika w’Uhoraho atakw aramubgira, ati Nzosegenyura cane uruvyaro rwawe, bitume rutoharūrika kubgo kuba isinzi.

¹¹Umumarayika w’Uhoraho arongera aramubgira, ati Rāba ufise inda, uzovyara umuhungu, kand’ uz’ umwite Ishimayeli,[9] kuk’ Uhoraho yumvise kubabazwa kwawe.

¹²Mu bandi bantu azomera nk’indogoba y’inyeshamba, azohanga abantu bose, na we ahangwe na bose; azopfa aho yishingiye amahema yo gusita bene wabo bose.

¹³Uhoraho avuganye na we, Hagari amwita izina, at’ Ur’ Indavyi; ati Mbeg’ aha hantu koko ndahaboneye Iyimbona?

¹⁴Ni co catumye iryo riba ryitwa Iriba ry’i Lahayi‐royi;[10] riri hagati y’i Kadeshi n’i Beredi.

¹⁵Hagari avyarana na Aburamu umwana w’ umuhungu: Aburamu yita umwana wiwe yavyaranye na Hagari Ishimayeli.

¹⁶Aburamu yar’ amaze imyaka mirongumunani n’ itandatu igihe Hagari yavyarana na we Ishimayeli.