Read Bibliya Yera 1951 Itanguriro 17 Bible Online

Itanguriro 17 - Bibliya Yera 1951 bible

Itanguriro 17

¹Aburamu amaze imyaka mirongwicenda n’icenda, Uhoraho aramubonekera, aramubarira, ati Ni jewe Mana Ishobora vyose; uhore ugendera imbere yanje, kand’ utungane rwose.

²Nanje ngusezeraniye isezerano, nzokugwiza cane.

³Aburamu arapfukama, arūnama, Imana iramubgira,

⁴iti Rāba jewe ubganje ndagusezeraniye isezerano: uzoba sekuruza w’amahanga menshi.

⁵Kandi ntucitwa Aburamu ukundi, arik’ uzokwitwa Aburahamu; kuko nkugize sekuruza w’amahanga menshi.

⁶Kandi nzoguha kurondoka cane, nzotuma amahanga agukomōkako, n’abami bazokwandurukako.

⁷Kandi nshinze isezerano ryanje ngusezeraniye, wewe n’uruvyaro rwawe ruzovuka hanyuma, ukw ibihe vy’urunganwe rwabo bizogenda bikurikirana, ribe isezerano ridashira, kugira ngo nkubere Imana, wewe n’uruvyaro rwawe ruzovuka hanyuma.

⁸Kandi wewe n’uruvyaro rwawe ruzovuka hanyuma, nzobaha iki gihugu wabayemw’ ur’ inyambukīra, ni co gihugu cose c’i Kanani, kuba ishamvu y’ibihe vyose: na bo nzoba Imana yabo.

⁹Imana itakw ibarira Aburahamu, iti Nawe uz’ ushitse isezerano ryanje, wewe n’uruvyaro rwawe ruzovuka hanyuma, ukw ibihe vy’urunganwe rwabo bizogenda bikurikirana.

¹⁰Iri ni ryo sezerano ryanje muzokwama mushitsa, riri hagati yanje namwe n’uruvyaro rwawe ruzovuka hanyuma: izinamuhungu wese muri mwebge az’ akebge.

¹¹Muze mukebge ku munwa w’ico mwambariye; kizoba ikimenyetso c’ isezerano riri hagati yanje namwe.

¹²Ūmaze imisi munani avutse az’ akebge, izinamuhungu wese, ukw ibihe vy’urunganwe rwanyu bizogenda bikurikirana, ar’ ūvukiye mu rugo rwawe, ar’ uwo waguze n’umunyamahanga amahera, atākomōtse mu ruvyaro rwawe.

¹³Ūvukiye mu rugo rwawe n’ uwo waguze amahera, bakwiye gukebga; kand’isezerano ryanje rizoba ku mibiri yanyu, ribe isezerano ridashira.

¹⁴Kandi ni hagira izinamuhungu atākebge ku munwa w’ico yambariye, az’ arandurwe mu bgoko bgabo: kukw azoba yishe isezerano ryanje.

¹⁵Imana ibarira Aburahamu, iti Sarayi umugore wawe ntube ukimwita Sarayi ukundi, arik’ uz’ umwite Sara.

¹⁶Nzomuha umugisha, nteko nguhe umwana kuri we: ni koko nzomuha umugisha, kand’azoba inakuruza w’amahanga; abami b’amoko bazokomōka kuri we.

¹⁷Maze Aburahamu arapfukama, arūnama aratwenga, yivuganiriza mu mutima, ati Mbeg’ umwana yovyarwa n’ūmaze imyaka ijana? Na Sara amaze imyaka mirongwicenda yoba akivyara?

¹⁸Aburahamu abgira Imana, at’ Icompa Ishimayeli agakomera, akaba imbere y’inyonga zawe!

¹⁹Imana iramwishura, it’ Oya, ariko kuri Sara umugore wawe ni ho uzovyara umwana. Kand’ uz’ umwite Isaka; nanje nzokomeza isezerano ryanje na we, ngo ribe isezerano ridashira ku ruvyaro rwiwe ruzovuka hanyuma.

²⁰Kandi no ku vya Ishimayeli ndakwumviye: rāba ndamuhaye umugisha, kandi nzomuha kurondoka, ndamugwize cane; azovyara abatware cumi na babiri, kandi nzomuhindura ubgoko bukomeye.

²¹Ariko, isezerano ryanje nzorikomeza na Isaka, uwo muzovyarana na Sara mu gihe nk’iki c’ umwaka utaha.

²²Imana ihejeje kuvugana na we, ica iradūga, iva aho Aburahamu ari.

²³Aburahamu aca ajana Ishimayeli umwana wiwe, bo n’abanyarugo bose bāvukiye i we, n’abo yaguze amahera bose, izinamuhungu wese mu bo mu rugo rwiwe, abakeba kur’ iryo zuba nyene, nk’ukw Imana yamubariye.

²⁴Aburahamu yar’ amaze imyaka mirongwicenda n’icenda igihe yakebga.

²⁵Ishimayeli umuhungu wiwe na we yar’ amaze imyaka cumi n’itatu igihe yakebga.

²⁶Aburahamu akebanwa na Ishimayeli umuhungu wiwe ku zuba rimwe.

²⁷N’abanyarugo biwe bose, ar’ abavukiyeho, ar’ abo yaguze n’abanyamahanga amahera, bakebanwa na we.