Read Bibliya Yera 1951 Itanguriro 18 Bible Online

Itanguriro 18 - Bibliya Yera 1951 bible

Itanguriro 18

¹Uhoraho abonekera Aburahamu ari kuri vya biti vya Mamure vyitwa imyeloni; yari yicaye mu muryango w’ihema ryiwe mu ndugumba yo mu gihe c’amashōka;

²yunamuye amaso abona abagabo batatu bahagaze bamutumbereye: ababonye, ava mu muryango w’ihema, yirukanga kubasanganira, akubita inkoro hasi,

³ati Mutungwa, namba nogira amahirwe imbere yawe, ukemera, ndakwinginze nturengane umusavyi wawe:

⁴nuko bazane utuzi mwoge ibirenge, muruhukire musi y’igiti:

⁵nanje nzane utwo kurya, mwihēmbūre, muheze mubone kugenda, ko mugendeye umusavyi wanyu. Bati Kora uko uvuze.

⁶Aburahamu yitera mw ihema aho Sara ari, ati Tunganya n’ingoga ivyibo bitatu vy’ifu igogōretse, urondere umutsima.

⁷Aburahamu arabandanya, aja mu busho, ahinda ishuri y’igitegetera nziza, ayiha umusuku wiwe, aca ayibāga n’ingoga.

⁸Yābīra amata y’urubu n’amakamano, n’inyama za ya shuri yabāze, abitereka imbere yabo; abahagarara mu mbavu musi ya ca giti, bararya.

⁹Baramubaza, bati Sara umugore wawe ari hehe? arabishura, at’ Ari mw ihema.

¹⁰Aramubgira, at’ Umwaka ugeze ah’ uyu ugeze, sinzobura kugaruka i wawe, Sara umugore wawe yavyaye umuhungu. Sara avyumviririza mu muryango w’ihema, ahahera inyuma yabo.

¹¹Kandi Aburahamu na Sara bari bashaje, bageze mu zabukuru: kandi Sara yari yaraciye.

¹²Maze Sara atwengera mu mutima, ati Ko mmaze gukecura noba nkigomba umugabo, kand’ umwami wanje akaba ashaje?

¹³Uhoraho abaza Aburahamu, ati N’iki gitumye Sara atwenga, akavuga ngw Aho n’ivy’ ukuri, noba nkivyara umwana nkecuye?

¹⁴Mbega har’ ikinanira Uhoraho? Igihe gishinzwe, umwaka ugeze ah’ uyu ugeze, nzogaruka i wawe Sara yavyaye umuhungu.

¹⁵Maze Sara arahakana, at’ Eka sintwenze: kukw atinye. Aramubarira, at’ Oya uratwenze.

¹⁶Abo bagabo barahaguruka, baragenda, batumbereye i Sodomu: Aburahamu abaja inyuma arabaherekeza.

¹⁷Maz’ Uhoraho arivuganya, ati Mbega Aburahamu nomuhisha ico ngira nkore,

¹⁸kand’ ari we azohinduka ihanga rinini rikomeye, amahanga yose yo mw isi akazohērwa umugisha muri we?

¹⁹Kukw ari we nahisemwo kugira ngw aze yihanikirize abana biwe n’ab’ inzu yiwe bazokwaruka hanyuma, ngo bakomeze inzira yanje, bakore ibiroranye n’ibigororotse; kugira ngo jewe Uhoraho nshitse kuri Aburahamu ivyo namuvuzeko.

²⁰Maz’ Uhoraho aravuga, at’ Induru zir’i Sodomu n’i Gomora kw ari nyinshi, kand’ ivyaha vyaho bikaba vyabaye ikirenga,

²¹ndamanutse ndābe yuko bakora ibihwanye rwose n’ukw induru zaho zanshikiriye; kandi namb’ atari ko biri, ndabimenye.

²²Abo bagabo barijura, bagenda batumbereye i Sodomu: ariko Aburahamu asigara ahagaze imbere y’Uhoraho.

²³Maze Aburahamu aramwegera, aramubaza, ati Mbega none worandurana abagororotsi n’abanyavyaha?

²⁴Kumbure mur’ ico gisagara hobamw’ abagororotsi mirongwitanu: none wokirandura ntugitunge, kandi kirimw’ abagororotsi mirongwitanu?

²⁵Icompa bikaba kure yawe, gukora ikintu nk’ico, kwicana abagororotsi n’abanyavyaha, abagororotsi n’abanyavyaha bakaringanira: icompa bikaba kure yawe! Non’ Umucamanza w’isi yose ntiyokora ibigororotse?

²⁶Uhoraho aramwishura, ati Ni nabona abagororotsi mirongwitanu mur’ ico gisagara c’i Sodomu, nzotunga aho hantu hose kubgabo.

²⁷Aburahamu arongera aramubgira, at’ Eh’ ingene mpāngāye gusiguza Umwami wanje, naho nd’ umukungugu n’umunyota gusa:

²⁸kumbure mu bagororotsi mirongwitanu hazoburamwo batanu, none worandura igisagara cose, kuko habuze batanu? Aramwishura, ati Sinzokirandura, mbonyeyo mirongwine na batanu.

²⁹Arongera aramubgira, ati Kumbure hobonekamwo mirongwine. Aramwishura, ati Na ho nyene nta co nzokora kubg’ abo mirongwine.

³⁰Arongera, ati Mwami ntumpambarire, ntunga mvuge n’iri: kumbure hobonekamwo mirongwitatu. Aramwishura, ati Na ho nyene nta co nzokora mbonyeyo mirongwitatu.

³¹Arongera, at’ Eh’ ingene mpāngāye gusiguza Umwami wanje: kumbure hobonekamwo mirongwibiri. Aramwishura, ati Na ho nyene sinokirandura kubg’ abo mirongwibiri.

³²Arongera, ati Mwami ntumpambarire, ntunga nongere mvuge iri rimwe gusa: kumbure hobonekamw’ icumi. Aramwishura, ati Na ho nyene sinokirandura kubg’ abo cumi.

³³Uhoraho aca arīgīra, ahejeje kuvugana na Aburahamu; Aburahamu na we asubira i we.