Read Bibliya Yera 1951 Itanguriro 19 Bible Online

Itanguriro 19 - Bibliya Yera 1951 bible

Itanguriro 19

¹Ba bamarayika bompi bashika i Sodomu ku kagoroba: kandi Loti yari yicaye kw irembo ry’igisagara c’i Sodomu. Loti ababonye, ava hasi kubasanganira, akubita inkoro hasi,

²arababarira, ati Batungwa, ndabinginze ni muze i wanje ku musavyi wanyu, muharāre iri joro, mwoge ibirenge, buce mwizindukira, mufate inzira, mugende. Baramwishura, bat’ Oya, turarāra mw ibarabara buce.

³Arabagōbēra cane, barakevya, binjira mu nzu i we, abarondereza amazimano, abacumbishiriza imitsima itambiwe, bararya.

⁴Maze batararyama, abagabo bose bo mur’ ico gisagara c’i Sodomu bakikiza iyo nzu, uhereye ku bakuru n’abato, abantu bose bavuye impande zose.

⁵Bahamagara Loti, baramubaza, bat’ Abagabo binjiye i wawe mur’ iri joro bari hehe? basohore, tubonone.

⁶Loti arasohoka aja aho bari ku muryango, akinga urugi inyuma yiwe.

⁷Arababgira, ati Bene data, ndabinginze, ntimukore icaha kingana girtyo.

⁸Ehe rāba, mfise abigeme babiri, batazi icitwa umugabo; reka ndabasohore aho muri, namwe mubagenze uko mugomba kwose. Arikw abo bagabo mwoye kugira ico mubakorako, kuko bashitse mu nzu yanje.

⁹Baramubgira, bati Va ngaho! Bat’ Uru rugabo rw’inyakamwe, rwaje ar’ inyambukira, none rwīgize umucamanza! None rero turakugirira nabi birenze uko twari kugirira abo. Basunika Loti cane, begera urugi ngo barusāvye.

¹⁰Maze ba bagabo batuma amaboko, bashīngira Loti bamwinjiza mu nzu, bugara urugi.

¹¹Basuka uruhumyi kur’ abo bagabo bo ku rugi, uhereye ku bakuru n’abato; bacumukura barondera urwo rugi.

¹²Abo bagabo babaza Loti, bati Har’ abandi bantu ufise hano? abakwe bawe n’abahungu bawe n’abakobga bawe n’ab’ufise bose mur’ iki gisagara, bakūre aha hantu.

¹³Kuko tugira tuhahonnye, kukw induru zihavugirizwa zibaye nyinshi cane imbere y’Uhoraho, kand’ akaba adutumye kuharandura.

¹⁴Nuko Loti arasohoka, abarira abakwe biwe basavye abakobga biwe, ati Vyuka, muve aha hantu, kuk’ Uhoraho agira arandure iki gisagara. Ariko ku bakwe biwe yar’ ameze nk’uwizāgira.

¹⁵Umutwenzi utambitse, ba bamarayika bahutagiza Loti, bati Va hasi, ujane umugore wawe n’aba bakobga bawe bompi bari hano, kugira ngo woye kurandukira mu guhanwa kw’iki gisagara.

¹⁶Maze akijujura, abo bagabo bamufata ukuboko, n’ukw’ umugore wiwe n’abakobga biwe bompi. Uhoraho amugiriye ikigongwe, bamukūrayo, bamuterera inyuma y’igisagara.

¹⁷Bamaze kubakūrayo, umwe muri bo aravuga, ati Hunga ntupfe! Ntukebēre inyuma, kandi nturuhe uhagarara utararangiza iki kiyaya cose; hungira kur’ iriya misozi, woye kuranduka.

¹⁸Loti arabishura, at’ Oyaye mugenzi, s’ uko!

¹⁹Rāba umusavyi wawe ko ngiriwe akagongwe imbere yawe, kand’ ukaba ungwijijekw imbabazi zawe, izo ungiriye ng’ ukize ubugingo bganje: erega sinoba ngihunga ngo nshike kur’ iriya misozi, ico cago kitanshitseko, kikanyica:

²⁰rāba, kariya gasagara ni ko kari hafi ko guhungirako, kandi ni na gato, nyemerera se mpungireyo, — mbega si gato nyene? — mbone gukiza ubugingo.

²¹Aramwishura, ati Nuko ndakwemereye no ku co uvuze ico, kutarandura igisagara uvuze;

²²arikw ihute, uhungireyo; kukw ata co nshobora gukora utarashikayo. Ni co catumye ico gisagara citwa Sowari.[11]

²³Loti ashika i Sowari izuba rirashe.

²⁴Uhoraho atiburira kuri Sodomu na Gomora umuriro n’ amazuku, bivuye kuri we mw ijuru;

²⁵akomvomvora ivyo bisagara n’ ico kiyaya cose, n’ababa mur’ ivyo bisagara bose, n’ivyari vyarahameze vyose.

²⁶Ariko muka Loti amukurikiye, akebuka inyuma, aca ahinduka inkingi y’umunyu.

²⁷Aburahamu ahenga mu gatondo arazinduka, aja ha handi aho yar’ ahagaze imbere y’Uhoraho:

²⁸yerekeza amaso ahahera i Sodomu n’i Gomora n’igihugu cose ca ca kiyaya, aritegereza, abona imyotsi y’ico gihugu ipfūndūka nk’ imyotsi y’itanure.

²⁹Igihe Imana yarandura ibisagara vyo mur’ ico kiyaya, yibutse Aburahamu, irungika Loti ngw ave mur’ ako gatikizo, igihe yakomvomvora ibisagara Loti yabamwo.

³⁰Maze Loti ava i Sowari, adūga ku musozi, abayo, bo n’abigeme biwe bompi; kuko yatinya kuba i Sowari: nukw abana mw isenga n’abo bigeme biwe bompi.

³¹Maz’ umukuru abgira murumuna we, ati Data arashaje, kandi nta muntu agisigaye kw isi wo kuturongora, nk’uk’ umugenzo wo mw isi yose uri.

³²Enda dutereke data vino, turyamane na we, kugira ngo duhonore data.

³³Batereka se vino mur’ iryo joro, umukuru aragenda, aryamana na se; se ntiyamenya ingen’ uwo mukobga yaje kuryama n’ingene yavyutse.

³⁴Bukeye bg’aho, umukuru abgira murumuna we, at’ Iri joro ryakeye naryamanye na data: twongere tumutereke n’iri joro, nawe ugende uryamane na we, duhonore data.

³⁵Iryo joro na ryo bongera gutereka se, umutoya ava hasi, aryamana na we; maze ntiyamenya ingen’ uyo na we yaje kuryama n’ingene yavyutse.

³⁶Uko ni kw abakobga ba Loti bompi batwaye inda bakūye kuri se.

³⁷Umukuru avyara umuhungu, amwita Mowabu: uwo ni we yandurutsweko n’Abanyamowabu na bugingo n’ubu.

³⁸Umutoya na we avyara umuhungu nyene, amwita Benami: uwo ni we yandurutsweko n’Abamoni na bugingo n’ubu.