Read Bibliya Yera 1951 Itanguriro 2 Bible Online

Itanguriro 2 - Bibliya Yera 1951 bible

Itanguriro 2

¹Ijuru n’isi binonosorwa kuremwa, bo n’ibirimwo vyose vy’ isinzi.

²Ku musi ugira indwi Imana inonosora ibikorwa vyayo yakoze; iruhuka ku musi ugira indwi ibikorwa vyayo vyose yakoze.

³Nukw Imana ihezagira uwo musi w’indwi, iraweza: kukw ari wo Imana yaruhukiyekw ibikorwa vyayo vyose, ivyo yaremye kandi yakoze.

⁴Aya ni yo mamo y’ijuru n’isi igihe vyaremwa, umusi Uhoraho Imana yaremeyekw isi n’ijuru.

⁵Kandi nta gati ko ku misozi karibgabeho kw isi, nta n’akatsi ko ku misozi karibgamere, kuk’ Uhoraho Imana ataribgarekurire imvura kw isi, kandi nta muntu yariho wo kuyirima;

⁶arikw igipfungu cadūga kiva kw isi kigatosa isi yose.

⁷Uhoraho Imana abumba umuntu mu mukungugu wo hasi, amuhumekera mu mazuru impwemu y’ubugingo; umuntu aca aba ūfise ubugingo.

⁸Uhoraho Imana atunganya itongo muri Edeni, mu ruhande rw’i burasirazuba: arishiramw’ uwo muntu yabumvye.

⁹Uhoraho Imana ahameza igiti cose c’igikundiro kibereye kuribga, ameza n’igiti c’ubugingo hagati mur’ iryo tongo, ameza n’igiti kimenyekanisha iciza n’ikibi.

¹⁰Kand’ uruzi ruturuka muri Edeni rwo kunywesha iryo tongo; ruharenganye, rwigabanyamwo kune.

¹¹Urwa mbere rwitwa Pishoni: ni rwo rukīkūje igihugu cose c’i Havila, kirimw’ izahabu:

¹²kand’ izahabu yo mur’ ico gihugu ni nziza; aho ni ho haba ivyitwa budola[1] n’utubuyenge twitwa shohamu.

¹³Uruzi rwa kabiri rwitwa Gihoni: ni rwo rukīkūje igihugu cose c’i Kushi.

¹⁴Uruzi rwa gatatu rwitwa Hidekeli, ni rwo ruca hino y’igihugu citwa Ashuri. Uruzi rwa kane rwitwa Efurate.

¹⁵Uhoraho Imana ajana wa muntu, amushira mur’ iryo tongo ryo muri Edeni, ngw aririme, arizigame.

¹⁶Uhoraho Imana abarira uwo muntu, at’ Igiti cose co mur’ iryo tongo ukiryek’ uk’ ugomba;

¹⁷arikw igiti kimenyekanisha iciza n’ikibi ntuz’ ukiryeko: kuk’ umusi wakiriyeko, uzopfa nta kabuza.

¹⁸Uhoraho Imana aravuga, ati Si vyiza k’uyu muntu yibana wenyene; hinge ndamuronderere umufasha bikwiranye.

¹⁹Nukw ibikōko vyose vyo ku misozi n’ibiguruka mu kirere vyose, ivyo Uhoraho Imana yari yabumvye mw ivu, abizanira uwo muntu ngw arābe ingen’ avyita amazina: kand’ uwo muntu uko yise ikiri n’ubugingo cose, rica riba izina ryaco.

²⁰Uwo muntu avyita amazina uhereye ku bitungano vyose no ku biguruka mu kirere no ku bikōko vyo mw ishamba vyose: ariko ntihabonekamw’ umufasha akwiranye n’umuntu.

²¹Maz’ Uhoraho Imana asinziriza uwo muntu ubutikoma, arasinzira: amukūramw’ urubavu rumwe, ahōmeka inyama mu gishingo carwo.

²²Urwo rubavu Uhoraho Imana akūye mur’ uwo muntu, arukūramw’ umugore, amuzanira uwo muntu.

²³Maz’ uwo muntu aravuga, at’ Uyu n’ igufa ryo mu magufa yanje, n’akara ko mu mara yanje: azokwitwa Umugore kuko yakūwe mu Mugabo.[2]

²⁴Ni co gituma umuntu azosiga se na nyina, akabana n’ umugore wiwe akaramata, bakaba umubiri umwe.

²⁵Kand’ uwo mugabo n’umugore wiwe bompi bāgenda amēnya, ariko ntivyabatera isoni.