Read Bibliya Yera 1951 Itanguriro 20 Bible Online

Itanguriro 20 - Bibliya Yera 1951 bible

Itanguriro 20

¹Aburahamu ava aho yar’ ari, agenda yerekeye igihugu c’i Negebu; aja kuba hagati y’i Kadeshi n’i Shura, yikubita n’i Gerari.

²Aburahamu avuga ko Sara umugore wiwe ari mushiki we; Abimeleki, umwami w’i Gerari, atumiza Sara, aramutwara.

³Ariko mw ijoro Imana ibonekera Abimeleki mu nzozi, iramubarira, it’ Urapfuye, kubg’ uwo mugore watwaye: kukw afise ina we.

⁴Mugabo, Abimeleki ntiyaribgamwēgēre: nukw arabaza, ati Mwami, wogeseza abantu kand’ ata co bacumuye?

⁵Ubgiwe si we yambariye ngo ni mushiki we? Na nya mugore nyene yavuze kw ari musaza we. Ico nakoze nagikoze ata mutima undega ikibi, ata maboko yanje nanduje.

⁶Imana imwishurira mu nzozi, iti Koko, nzi yuko wakoze ivyo ufise umutima utakurega ikibi, kandi nanje nakubujije kuncumurako: ni co catumye ntagukundiye kumukorako.

⁷None rero subiza uwo mugabo umugore wiwe, kukw ar’ūvugishwa nanje; na we azogusengera, ubone kubaho. Ariko n’utamumusubiza, umenye yuk’ utazobura gupfa, mwe n’abawe bose.

⁸Abimeleki akoroka kare mu gatondo, ahamagaza abanyarugo biwe bose, abiganira ivyo vyose: abo bagabo baratinya cane.

⁹Maze Abimeleki ahamagaza Aburahamu, aramubaza, ati Watugize ibiki? Nagukoreye icaha ki, catumye undemeka icaha kingana girtyo, twe n’igihugu canje? Wankoreye ibidakwiye gukorwa.

¹⁰Abimeleki arongera abaza Aburahamu, at’ Ivyo wabitewe n’iki?

¹¹Aburahamu aramwishura, ati N’uko nibgiye rwose yukw ata gutinya Imana kuriho ino; nti Kandi bazonyica bampora umugore wanje.

¹²Kandi koko ni mushikanje: ni mwene data ariko si mwene mama, maze namugize umugore wanje.

¹³Nuko rero, uhereye ah’ Imana yankūriye mu rugo kwa data, ikankwiragiza, naramubariye, nt’ Uku ni k’ukwiye kuzogenda untabara: aho tuzoshika hose, uz’ uvuge, uti Ni musazanje.

¹⁴Abimeleki yābīra intama n’ inka n’abagurano b’abahungu n’ abakobga, abiha Aburahamu amusubiza na Sara umugore wiwe.

¹⁵Abimeleki aramubarira, at’Eh’ igihugu canje ngico: genda ube ah’ugomba hose.

¹⁶Abarira na Sara, ati Rāba mpaye musazawe intete z’ifeza igihumbi; zizoba ico kugutēturura imbere y’abo muri kumwe bose; ngukūyekw iceyi kuri bose.

¹⁷Maze Aburahamu asenga Imana, ikiza Abimeleki n’ umwamikazi wiwe n’incoreke ziwe; baravyara.

¹⁸Kuk’ Uhoraho yari yazivye inda z’abo mu rugo rwa Abimeleki bose, abahōye Sara umugore wa Aburahamu.