Read Bibliya Yera 1951 Itanguriro 21 Bible Online

Itanguriro 21 - Bibliya Yera 1951 bible

Itanguriro 21

¹Uhoraho agendera Sara nk’ uko yavuze, kand’ amugirira nk’uko yamubariye.

²Sara asama inda, avyarana na Aburahamu umuhungu mu butāma bgiwe, mu gihe cāshinzwe, kimwe Imana yari yaramubariye nyene.

³Umwana Aburahamu yavyaye amwita Isaka, uwo yavyaranye na Sara.

⁴Aburahamu akeba Isaka umwana wiwe amaze imisi munani avutse, nk’ ukw Imana yamubariye.

⁵Aburahamu yar’ amaze imyaka ijana igihe yavyara umwana wiwe Isaka.

⁶Sara aravuga, at’ Imana irantwengeje; kand’ abazovyumva bose bizobatwenza nkanje.

⁷Ati Har’ uwogize ico abarira Aburahamu, ngo Sara azokwonsa abana? yamar’ amvyayek’ umwana w’umuhungu mu butāma bgiwe.

⁸Umwana arakura, aracuka; ku musi Isaka yacutseko Aburahamu atumirira abantu benshi amazimano.

⁹Maze Sara abona wa mwana wa Hagari Umunyegiputakazi, uwo yavyaranye na Aburahamu, arikw aratwenga.

¹⁰Bituma abarira Aburahamu, at’ Irukana iyi ncoreke n’umwana wayo, kuk’ umwana w’iyi ncoreke atazoraganwa n’umwana wanje Isaka.

¹¹Aburahamu ababazwa cane n’ ivy’ uwo mwana wiwe.

¹²Imana ibarira Aburahamu, iti Reka kubabazwa n’ivy’ uwo mwana n’incoreke yawe: ivyo Sara akubariye vyose n’uvyemere: kuko kuri Isaka ari ho uruvyaro rwawe ruzokwītīrirwa.

¹³Kandi n’uwo mwana nyene w’iyo ncoreke nzomuhindura ihanga, kuko na we ar’ ubura bgawe.

¹⁴Aburahamu akoroka kare, yābīra impamba n’ umukuza w’urusato wuzuye amazi, abitekerera Hagari, abishira ku rutugu rwiwe, amuha n’uwo mwana, aramwirukana; aragenda, azimagirika mu bugaragwa bg’i Beri‐sheba.

¹⁵Amazi yari muri wa mukuza arashira; arambika umwana musi y’igisaka caho.

¹⁶Aragenda, yicara amutumbereye amwitanguye, nk’ahoraswa umwampi; kuko yari yibgiye, ati Noye kurāba ipfa ry’ umwana wanje. Nuko yicara amutumbereye, araturika ararira.

¹⁷Imana yumva ijwi ry’uwo muhungu; maz’ umumarayika w’ Imana ari mw ijuru, ahamagara Hagari, aramubaza, at’ Ubaye iki ga Hagari? Nta co utinya! kukw Imana yumvise ijwi ry’uwo muhungu ah’aryamye.

¹⁸Va hasi, uvyure uwo muhungu, umuramire mu maboko, kuko nzomuhindura ihanga rikomeye.

¹⁹Imana ihumūra amaso yiwe, abona iriba ry’amazi; aragenda, yuzuza wa mukuza amazi, aramiza uwo muhungu.

²⁰Nukw Imana ibana n’uwo muhungu, arakura; agerēra mu bugaragwa, aba umurashi.

²¹Aba mu bugaragwa bg’i Parani; nyina amusabira umugeni mu gihugu ca Egiputa.

²²Mur’ iyo misi, Abimeleki azanana na Fikoli umugabisha w’ ingabo ziwe, abarira Aburahamu, at’ Imana iri kumwe nawe mu vyo ukora vyose;

²³none rer’ enda n’undahirire Imana aha nyene yuk’ utazongunga, cank’ umwana wanje, cank’ umwuzukuru wanje: ariko k’uzonyishura ivyiza, twe n’iki gihugu wabayemw’ ur’ inyambukīra, nk’uko nabikugiriye nanje.

²⁴Aburahamu aramwishura, ati Ndarahira.

²⁵Maze Aburahamu ahishuka Abimeleki ku vy’iriba ry’amazi abantu ba Abimeleki bamunyaze ku manyama.

²⁶Abimeleki aramwishura, at’ Ivyo sinzi uwabikoze, kandi nawe ntiwigeze kubimbgira, kandi sinigeze no kuvyumva, atar’ uyu musi.

²⁷Nuko Aburahamu yābīra intama n’inka, abiha Abimeleki; bompi bacana amatigu.

²⁸Aburahamu arobanura imyagazi y’intama ndwi ivyara yo mu mukuku wiwe.

²⁹Abimeleki abaza Aburahamu, ati Mbeg’ iyo myagazi ndwi urobanuye, bisobanurwa ngw iki?

³⁰Aramwishura, at’ Enda nyakīrira iyi myagazi ndwi ntanze, kugira ngo bimbere icabona yukw ari jewe nimbishije iri riba.

³¹Ni co catumye yita aho hantu Beri‐sheba,[12] kukw ari ho barahiriye bompi.

³²Uko ni ko bācaniye amatigu i Beri‐sheba: maze Abimeleki arahaguruka, bo na Fikoli umugabisha w’ingabo ziwe, basubira mu gihugu c’i Bufilisitiya.

³³Aburahamu atera igiti citwa umwesheri i Beri‐sheba, yambarizay’ izina ry’Uhoraho, Imana ihoraho.

³⁴Aburahamu amara imisi myinshi ar’ inyambukīra mu gihugu c’i Bufilisitiya.