Read Bibliya Yera 1951 Itanguriro 22 Bible Online

Itanguriro 22 - Bibliya Yera 1951 bible

Itanguriro 22

¹Hanyuma y’ivyo, Imana igeza Aburahamu; iramuhamagara, iti Aburahamu! Aritaba, ati Sabge.

²Iramubgira, it’ Enda jana umwana wawe, umwana wawe w’ikinege ukunda, Isaka nyene, uje mu gihugu c’i Moriya; umutangireyo kw ikimazi co kwoswa, ku musozi nzokubarira.

³Aburahamu azinduka kare mu gatondo, ashira amatandiko ku ndogoba yiwe, ajana na babiri bo mu mikangara yiwe, na Isaka umwana wiwe; nukw asatuje inkwi zo kwosa ikimazi, ava hasi, aja ha hantu Imana yamubariye.

⁴Ku musi ugira gatatu, Aburahamu atuma amaso, abona aho hantu hakiri kure.

⁵Nuko Aburahamu abgira iyo mikangara yiwe, ati Ni musigarane iyi ndogoba hano, twe n’ uyu mwana tugiye hariya gusenga, turaheza tugaruke.

⁶Aburahamu yābīra za nkwi zo kwosa ikimazi, azikorera Isaka umwana wiwe; na we yitwarira umuriro n’imbugita; nuko bompi barajana.

⁷Isaka abaza se Aburahamu, ati Mbega da? Aramwitaba, ati N’iki ga mwana wanje? Ati Mbeg’ umuriro n’inkwi kw ari ngibi, non’ umwagazi w’intama uri hehe, wo gutanga kw ikimazi co kwoswa?

⁸Aburahamu aramwishura, at’ Erega mwananje, Imana ni yo iribgironkere umwagazi w’ikimazi co kwoswa. Nuko bompi barajana.

⁹Bashika ahantu Imana yamubariye; Aburahamu ahubaka igicaniro, akinyuranyako za nkwi, aboha Isaka umwana wiwe, amurambika kur’ ico gicaniro hejuru y’inkwi.

¹⁰Aburahamu atuma ukuboko, yābīra ya mbugita, ngw akerere umwana wiwe.

¹¹Maz’ umumarayika w’Uhoraho amuhamagara ari mw ijuru, at’ Ewe Aburahamu, Aburahamu! Aritaba, ati Sabge.

¹²Aramubarira, ati Ntukoze ukuboko kur’ uwo muhungu, ntugire ico umugira: kuko noneho mmenye ko wubaha Imana, kuk’ utanyimye umwana wawe, kand’ ar’ ikinege.

¹³Maze Aburahamu yunamuye amaso, areraguza, inyuma yiwe ahabona impfizi y’intama ifashwe mu mahembe mu gisaka c’inzitane. Aburahamu aragenda, afata ino ntama, ayitanga kw ikimazi co kwoswa mu gishingo c’umwana wiwe.

¹⁴Aburahamu yita aho hantu Yehova‐yire,[13] nk’uko bavuga na bugingo n’ubu, bati Ku musozi w’Uhoraho ni ho bironkeka.

¹⁵Maz’ umumarayika w’Uhoraho ari mw ijuru arongera ahamagara Aburahamu,

¹⁶ati Ndirahiye, ni k’Uhoraho agize, k’ukoze ivyo, ntunyime umwana wawe, kand’ ar’ ikinege,

¹⁷eka mbere no kuguha umugisha nzowuguha, kandi no kugwiza nzogwiza uruvyaro rwawe, rungane n’inyenyeri zo kw ijuru, canke n’umusenyi wo mw isēsero ry’ikiyaga; kandi ruzokwegukira amarembo y’abansi barwo;

¹⁸kandi mu ruvyaro rwawe ni ho amahanga yose yo mw isi azohērwa umugisha, kuko wanyumviye.

¹⁹Aburahamu asubira aho ya mikangara yiwe iri, barikora, basubirana na we i Beri‐sheba; kuko Aburahamu ari ho yaba nyene.

²⁰Hanyuma y’ivyo babarira Aburahamu, bat’ Erega Miluka na we yavyaranye abana na murumunawe Nahori.

²¹Imfura yiwe ni Usi, murumuna we ni Buzi, na we akurikirwa na Kemuweli, ari we se wa Aramu;

²²na bo bakurikirwa na Kesedi na Hazo na Piludashi na Yidilafu na Betuweli.

²³Kandi Betuweli yavyaye Rebeka: abo ukw ar’ umunani Miluka yabavyaranye na Nahori murumuna wa Aburahamu.

²⁴Kand’ incoreke yiwe yitwa Reyuma, na yo yavyaranye na we Teba na Gahamu na Tahashi na Mayaka.