Read Bibliya Yera 1951 Itanguriro 23 Bible Online

Itanguriro 23 - Bibliya Yera 1951 bible

Itanguriro 23

¹Sara yamaze imyaka ijana na mirongwibiri n’indwi: iyo ni yo myaka Sara yamaze.

²Sara araheza apfira i Kiriyati‐Araba (ari ho Heburoni), mu gihugu c’i Kanani: Aburahamu aza kuririra Sara, no kumuborogera.

³Aburahamu ava hasi, ava i ruhande y’ uwo muvyimba, abgira Abaheti,

⁴ati Jewe ko nd’akavantara n’inyambukīra muri mwebge; none ni mumpe i wanyu aho nokwīzīzira ho guhamba, kugira ngo mpambe umuntu wanje amve mu maso.

⁵Abaheti bishura Aburahamu,

⁶bati Mugenzi, n’utwumve: ur’ umuntu ahambaye cane muri twebge; mu masenga yacu duhambamwo, iyo wohitamwo yose abe ari yo uhambamw’ umuntu wawe: nta wo muri twebge yokwima isenga yiwe, ngo woye guhamba umuntu wawe.

⁷Aburahamu ava hasi, yikubita imbere ya ben’ igihugu, ari bo Baheti.

⁸Arababgira, at’ Asangwa mwemeye ko mpamba umuntu wanje ngw amve mu maso, ni muntabare, munyingingire Efuroni mwene Sohari,

⁹ampe isenga y’i Makipela afise, iri ku mpera y’itongo ryiwe; ayingurire hagati yanyu ibiguzi bikwiranye biyiciye, habe aho nīzīziye, ho guhamba.

¹⁰Nuko Efuroni yari yicaye hagati mu Baheti: Efuroni Umuheti abarira Aburahamu, Abaheti bumva, bo n’abariko baraca mw irembo ry’igisagara cabo bose,

¹¹ati Mushingantahe, oyaye, enda umviriza: iryo tongo ndariguhaye, bo n’isenga irimwo ndayiguhaye; mbiguhereye imbere y’ubgoko bgacu: hamba umuntu wawe.

¹²Aburahamu yikubita imbere ya ben’ igihugu.

¹³Abarira Efuroni, ben’ igihugu bumva, at’ Enda se ndakwinginze, nyumviriza! ndaguha igiciro c’iryo tongo; emera nkiguhe, mpahambe umuntu wanje.

¹⁴Efuroni yishura Aburahamu,

¹⁵ati Mushingantahe, ni wumve: non’ agatongo gaciye shekeli z’ifeza amajana ane konteranya nawe? nuko hamba umuntu wawe.

¹⁶Aburahamu yumvise ivya Efuroni, amugerera ku munzane za feza yaciriye, Abaheti bumva, shekeli amajana ane z’ifeza, kimwe n’izo abadandaza bācurūza.

¹⁷Nukw iryo tongo rya Efuroni ryar’ i Makipela, aharābana n’i Mamure, bo n’isenga yarimwo, n’ ibiti vyose vyari mur’ iryo tongo birizengutse impande zose, vyegukira Aburahamu

¹⁸kuba aho yīzīziye, imbere y’Abaheti no mu maso y’abaca mw irembo ry’igisagara cabo bose.

¹⁹Ivyo biheze, Aburahamu aca ahamba Sara umugore wiwe mur’ iyo senga yo mw itongo ry’i Makipela, aharābana n’i Mamure, (ari ho Heburoni), mu gihugu c’i Kanani.

²⁰Nukw iryo tongo n’iyo senga irimwo, Abaheti barabirundura ngo Aburahamu ahegukire kuba aho yīzīziye ho guhamba.