Read Bibliya Yera 1951 Itanguriro 24 Bible Online

Itanguriro 24 - Bibliya Yera 1951 bible

Itanguriro 24

¹Aburahamu yar’ ashaje, ageze mu zabukuru: kand’ Uhoraho yari yarahaye Aburahamu umugisha muri vyose.

²Aburahamu abarira umubgiriza wiwe, umukuru wo mu rugo rwiwe, yabgiriza ivyo yar’ afise vyose, at’ Enda n’ushire ukuboko kwawe musi y’ikibero canje,

³ndakurahize Uhoraho, ni we Mana Nyen’ ijuru, ni we Mana Nyen’ isi, yuk’ utazosabira umwana wanje umugeni wo mu Banyakananikazi, abo mbamwo;

⁴ariko k’uzoja mu gihugu cacu, muri bene wacu, kuba ari ho usabira umwana wanje Isaka umugeni.

⁵Uwo mubgiriza aramwishura, ati Kumbure uwo mwigeme ntazokwemera ko tuzanana mur’ iki gihugu: none bibaye birtyo, noba nkwiye gusubiza umwana wawe mu gihugu wavuyemwo?

⁶Aburahamu aramwishura, at’ Uz’ uzire akaziri, ntuz’ usubizey’ umwana wanje!

⁷Uhoraho, Imana Nyen’ ijuru, umwe yankūra mu nzu ya data no mu gihugu navukiyemwo, akambarira, akandahira, at’ Uruvyaro rwawe nzoruha iki gihugu; uyo ni we ubgiwe azotuma umumarayika wiwe akuje imbere, nawe az’ abe ari ho usabira umwana wanje umugeni.

⁸Kand’ uwo mukobga ni yaramuka yanse kuzanana nawe, ntuzoba ugifatwa n’iyo ndahiro nkurahije; mugabo ntuz’ usubizey’ umwana wanje.

⁹Nuk’ uwo mubgiriza ashira ukuboko musi y’ ikibero ca shebuja Aburahamu, amurahira nk’ukw ivyo biri.

¹⁰Uwo mubgiriza yābīra ingamiya cumi zo mu ngamiya za shebuja, aragenda; ajana ibintu vyiza‐vyiza vy’uburyo bgose shebuja amurungikanye; nukw arīkora, aja muri Aramu‐Naharayimu, ashika ku gisagara Nahori yabamwo.

¹¹Abarira izo ngamiya zipfukama inyuma y’igisagara kw iriba, hāri ku mugoroba, mu gihe c’amavoma.

¹²Arasenga, at’ Ewe Uhoraho, Mana ya databuja Aburahamu, ndakwinginze, mpa kugira amahirwe uyu musi, ugirire neza databuja Aburahamu.

¹³Ehe mpagaze kw iriba, kand’ abakobga b’ abo mu gisagara bahava basokoroka baze kuvoma;

¹⁴enda se bibe birtya: umwigeme ndibubgire, nti Ndakwinginze, ururutsa umubindi wawe, nnyweko; akanyishura, ati Nywako, n’ingamiya zawe ndaziha zinywe: uyo abe ari we watoranirije Isaka umusavyi wawe; ivyo ni vyo bimmenyesha yuk’ ugiriye neza databuja.

¹⁵Nukw akirikw aravuga, Rebeka arasokoroka, afise umubindi ku rutugu; yari mwene Betuweli, uwo Miluka yavyaranye na Nahori umugabo wiwe, murumuna wa Aburahamu.

¹⁶Kand’ uwo mwigeme yari mwiza cane w’umunyakaranga, yar’ inkumi, atigeze kumenyana n’icitwa umugabo: aramanuka, aja kw iriba, yuzuza umubindi wiwe, aradūga.

¹⁷Uwo mubgiriza arīkānya, aramusanganira, aramubgira, ati Ntabaza se utuzi two kunywa kur’ uwo mubindi wawe.

¹⁸Aramwishura, ati Nywako, mutungwa. Anyarutsa kwururukiriza umubindi wiwe ku kiganza, aramuha, aranywa.

¹⁹Ahejeje kumuha, aramubgira, ati Hinge mvomere n’ingamiya zawe, zihodoke.

²⁰Aranyaruka, asuka umubindi wiwe mu bgato, ariruka, asubira kw iriba kuvoma, avomera ingamiya ziwe zose.

²¹Uwo mugabo amushinga ijisho anumye, kugira ngw amenye yuk’ Uhoraho yahaye urugendo rwiwe umugisha, cank’ ata wo.

²²Nukw izo ngamiya zimaze guhodoka, uwo mugabo yābīra impeta y’izahabu, kuriba kwayo kwar’ igihimba ca shekeli, n’ivyo kumwambika ku maboko bibiri vy’ izahabu, kuriba kwavyo kwari shekeli cumi;

²³aramubaza, at’ Uri mwene nde? Ndakwinginze, nyibarira. Kandi mbeg’ i wanyu har’ indāro tworonka?

²⁴Aramwishura, ati Ndi mwene Betuweli, uwo Miluka yavyaranye na Nahori.

²⁵Yungamwo, aramubarira, ati Turi n’ivyarire n’ivyo kurya bizihāgije, dufise n’aho kurāra.

²⁶Uwo mugabo yunamika amaso, ahimbaza Uhoraho,

²⁷aravuga, at’ Uhoraho ashemagizwe, Imana ya databuja Aburahamu, itāretse kugirira imbabazi databuja, no kumubera umwizigirwa! nanje nyene, Uhoraho yandōngōye inzira ija kwa bene wabo wa databuja.

²⁸Maz’ uwo mwigeme arirukanga, abarira abo mu nzu kwa nyina ayo majambo.

²⁹Kandi Rebeka yar’ afise musaza we yitwa Labani: Labani uwo arasohoka, abandanya ah’uwo mugabo ari, kw iriba.

³⁰Yari yitegereje impeta na vya bindi vyo ku maboko, ivyo mushiki we yari yambaye, yumvise n’amajambo Rebeka mushiki we amudōndeye, at’ Ivyo ni vyo uwo mugabo ambariye; ni kwo guca aja ah’uwo mugabo ari. Asanga agihagaze i ruhande ya za ngamiya, kw iriba.

³¹Aramubgira, ati Ngwino, nyaguhabga n’ Uhoraho! n’iki kikugumije ku gahinga? ko nteguye inzu, bo n’ah’ ingamiya.

³²Nuk’ uwo mugabo ashika mu rugo; Labani akūra ibintu ku ngamiya, atanga icarire n’ ivyo kurya vy’ingamiya, n’amazi y’uwo yo kwoga ibirenge, bo n’abo bari kumwe.

³³Bamuzanira izimano ngw arye: maz’ aravuga, ati Sindya, ntaravuga ivyo natumwe. Uwundi ati Vuga.

³⁴Ati Jewe nd’ umuntu wa Aburahamu.

³⁵Kand’ Uhoraho yahaye databuja umugisha mwinshi, ahinduka ūhambaye; kandi yamuhaye imikuku n’amasho n’amafeza n’amazahabu n’abatungano b’abahungu n’abakobga n’ingamiya n’indogoba.

³⁶Kandi na Sara muka databuja yavyaye umuhungu ashaje, ni we databuja yaraze ivyiwe vyose.

³⁷Kandi databuja yarandahije ngo sinze nsabire umwana wiwe umugeni mu Banyakananikazi, ben’ igihugu abamwo:

³⁸ariko ngo nze nje mu b’inzu ya se no muri bene wabo, ngw abe ari ho nsabira umwana wiwe umugeni.

³⁹Maze nishura databuja, nti Kumbure uwo mwigeme ntazokunda ko tuzanana.

⁴⁰Aranyishura, at’ Uhoraho, nama ngendera imbere, azotuma umumarayika wiwe ajane nawe, azoha urugendo rwawe umugisha; maze nawe uz’ usabire umwana wanje umugeni muri bene wacu, mu b’ inzu ya data.

⁴¹Nuko ni washika muri bene wacu, ni ho iyo ndahiro nkurahije itazogufata: na bo baramutse bamukwimye, ntuzoba ugifatwa n’iyo ndahiro.

⁴²Maz’ uyu musi nshitse kw iriba, ndasenga, nt’ Ewe Uhoraho, Mana ya databuja Aburahamu, ni waba uhaye urugendo rwanje nagenze umugisha,

⁴³ehe mpagaze kw iriba: nt’ Enda se ni bibe birtya: umwigeme asokoroka kuvoma, nkamubgira, nti Ntabaza se utuzi two kunywa kur’ uwo mubindi wawe,

⁴⁴akanyishura, ati Nywako, nteko mvomere n’ingamiya zawe: uyo abe ari we, wewe Uhoraho utoranirije mwene databuja.

⁴⁵Maze ngisengera mu mutima wanje, ngize ntya mbona Rebeka arasokorotse, afise umubindi ku rutugu; amanuka kw iriba, aravoma; ndamubarira, nti Ntabaza utwo kunywa.

⁴⁶Anyarutsa kwururutsa umubindi wiwe ku rutugu, at’ Enda nywa, n’ingamiya zawe ndaziha zinywe. Nuko ndanywa, aha n’ingamiya na zo.

⁴⁷Nca ndamubaza, nt’ Uri mwene nde? ati Ndi mwene Betuweli, uwo Nahori yavyaranye na Miluka. Nca ndamwambika impeta ku zuru, n’ ivyambarwa ku maboko.

⁴⁸Nca nunamika amaso, mpimbaza Uhoraho, nshemagiza Uhoraho Imana ya databuja Aburahamu, yandōngōye inzira ikwiye, ngo nsabire umwana wiwe umugeni ku muhungwabo wa databuja.

⁴⁹Nuko ni mwemera kugirira databuja ivyiza mu buryo bukwiye, ni mumbarire; mutavyemeye, na ho nyene mumbarire, ngo mmenye ico nkora.

⁵⁰Labani na Betuweli baca baramwishura, bat’ Ivyo bivuye k’Uhoraho: nta kindi twoshobora kukubarira ic’ ari co cose.

⁵¹Ehe rāba Rebeka nguyo, n’umujane wīgīre, abe umugore w’umwana wa shobuja, nk’uk’ Uhoraho abigize.

⁵²Nuk’ uwo muntu wa Aburahamu yumvise ayo majambo, akubita inkoro hasi imbere y’Uhoraho.

⁵³Uwo muntu asokorora utugenegene tw’ifeza n’utw’ izahabu, n’impuzu, abiha Rebeka: kand’ aha na musaza we na nyina ibintu vy’igiciro.

⁵⁴Baraheza bararya, baranywa, bo n’abo bāzananye, barāra ngaho buraca: bavyuka mu gatondo, aravuga, ati Ni munsezere, nsubire kwa databuja.

⁵⁵Musaza wa Rebeka na nyina baramwishura, bati Hinge uyu mwigeme tumarane iyindi misi nk’ icumi cank’ isaga, muheze mubone kugenda.

⁵⁶Arabishura, ati Nta co muntebereza, kuk’ Uhoraho yahaye urugendo rwanje umugisha: ni munsezere, nsubire kwa databuja.

⁵⁷Baramwishura, bati Hinge duhamagare uwo mwigeme, twumve irimuva mu kanwa.

⁵⁸Bahamagara Rebeka, baramubaza, bat’ Uremera kujana n’uyu mugabo? arabishura, ati Ndemeye.

⁵⁹Basezera Rebeka mushiki wabo, bamurungikana n’umurezi wiwe, basezera na wa muntu wa Aburahamu n’abantu biwe.

⁶⁰Bahezagira Rebeka, baramubgira, bat’ Ewe mushiki wacu, uz’ uvyare usasagare, ugire ibihumbi n’ibihumbi, kand’ uruvyaro rwawe ruze rwegukire amarembo y’abansi barwo.

⁶¹Nuko Rebeka arīkora, bo n’incoreke ziwe, bagendera kuri za ngamiya, bajana n’uwo mugabo. Uko ni k’uwo muntu yajanye Rebeka, aragenda.

⁶²Kandi Isaka yari yaravuye kw Iriba ry’i Lahayi‐royi, yaba mu gihugu c’i Negebu.

⁶³Bukeye Isaka arasohoka, aja mu gahinga kwiherēra, hāri ku kagoroba: yunamura amaso, agize artya abona ingamiya zije.

⁶⁴Maze Rebeka yunamura amaso; abonye Isaka, ava ku ngamiya,

⁶⁵abaza wa muntu, at’ Uriya muntu ni nde, agiye guhūra natwe, aza mu gahinga? Uwo muntu aramwishura, ati Ni databuja. Rebeka aca yābīra umwitwikiro wiwe, yitwikira mu maso.

⁶⁶Uwo muntu yīgānira Isaka ivyo yakoze vyose.

⁶⁷Isaka ajana Rebeka mw ihema risiga nyina wiwe Sara, aramurongora, aba umugore wiwe, aramukunda. Isaka ivyo bimwirura umubabaro wa nyina.