Read Bibliya Yera 1951 Itanguriro 25 Bible Online

Itanguriro 25 - Bibliya Yera 1951 bible

Itanguriro 25

¹Aburahamu arongora uwundi mugore, yitwa Ketura.

²Bavyarana Zimurani na Yokishani na Medani na Midiyani na Yishibaki na Shuwa.

³Yokishani avyara Sheba na Dedani. Abakomōtse kuri Dedani n’Abashuri n’Abaletushi n’Abaleyumi.

⁴Bene Midiyani ni Efa na Eferi na Hanoki na Abida na Eludaya. Abo bose n’uruvyaro rwa Ketura.

⁵Aburahamu araga Isaka ivyo yar’ afise vyose.

⁶Arikw abana bo ku ncoreke Aburahamu yar’ afise, arabagabira; araheza arabarungika, akiriho, ngw abatandukanye na Isaka umwana wiwe, bagende berekeye i burasirazuba, baje mu gihugu c’i burasirazuba nyene.

⁷Nukw imisi Aburahamu yamaze n’imyaka ijana na mirongwirindwi n’itanu.

⁸Aburahamu aracīkāna, atāmbūra ageze mu zabukuru, apfa yisāziye neza; ahamvya ababo.

⁹Isaka na Ishimayeli abana biwe bamuhamba mw isenga y’i Makipela, iri mw itongo ryar’ irya Efuroni mwene Sohari Umuheti, aharābana n’i Mamure;

¹⁰ari ryo tongo Aburahamu yaguze n’Abaheti: ni ho Aburahamu yahambge, bo na Sara umugore wiwe.

¹¹Aburahamu amaze gupfa, Imana iha umugisha Isaka umwana wiwe; kandi Isaka yaba hafi y’Iriba ry’i Lahayi‐royi.

¹²Uru ni rwo ruvyaro rwa Ishimayeli mwene Aburahamu, uwo yavyaranye na Hagari Umunyegiputakazi, incoreke ya Sara.

¹³Aya ni yo mazina ya bene Ishimayeli, ayo bitwa nk’uko bakurikiranye: imfura ya Ishimayeli ni Nebayoti, hakurikira Kedari na Adibeli na Mibusamu,

¹⁴na Mishima na Duma na Masa,

¹⁵na Hadadi na Tema na Yeturi na Nafishi na Kedema:

¹⁶abo ni bo bana ba Ishimayeli, ayo ni yo mazina yabo, nk’ukw ibisagara vyabo biri, nk’ukw ingo zabo ziri; baba abatware cumi na babiri, nk’ukw amoko yabo ari.

¹⁷Iyi ni yo myaka Ishimayeli yamaze: n’ijana na mirongwitatu n’indwi; araheza aracīkāna, ahamvya ababo.

¹⁸Abiwe bahēra i Havila basagaza gushitsa i Shura, aharābana na Egiputa, mu nzira ija muri Ashuri; kandi Ishimayeli yari yapfuye aho yishingiye amahema asita bene wabo bose.

¹⁹Uru ni rwo ruvyaro rwa Isaka mwene Aburahamu: Aburahamu yavyaye Isaka.

²⁰Isaka yar’amaze imyaka mirongwine igihe yarongora Rebeka mwene Betuweli Umwaramu w’i Padan‐aramu, mushiki wa Labani Umwaramu.

²¹Isaka atakambira Uhoraho kubg’ umugore wiwe, kukw atāvyara: Uhoraho yumva gutakamba kwiwe, Rebeka umugore wiwe asama inda.

²²Abana basitanira mu nda yiwe: maz’ aribaza, ati Ko bimeze birtya, igituma nkiriho n’iki? Aragenda aja kubisiguza Uhoraho.

²³Uhoraho aramwishura, at’ Inda yawe irimw’ amahanga abiri, Amoko abiri azokwitandukanya uhereye bakiva mu bura bgawe: Ubgoko bumwe buzorusha ubundi inkomezi, Kandi Bukuru azoshumbira Butoyi.

²⁴Maz’ igihe ciwe co kuvyara kigeze, basanga yar’ atwaye inda y’ amahasa.

²⁵Bukuru avuka ar’ inzobe y’umuyugubge, yar’akatse wese nk’impuzu y’ivyoya, bamwita Esau.[14]

²⁶Hakurikira Butoyi, afashe igitsintsiri ca Esau; bamwita Yakobo;[15] kandi Isaka yar’amaze imyaka mirongwitandatu, igihe bāvuka.

²⁷Abo bahungu barakura; Esau aba umuhigi w’umuhinga, w’ umunyeshamba; Yakobo we yaratekereza, yībēra mu mahema.

²⁸Kandi Isaka yakunda Esau, kuko yama arya ku nyama yahīgūkanye; Rebeka we yakunda Yakobo.

²⁹Umusi ur’ izina, Yakobo ateka ivyo kurya; Esau arinjira, avuye mw ishamba, ashonje, acitse intege.

³⁰Esau abarira Yakobo, ati Mpa se utwo ntamira kur’ ivyo bitukura, ku bitukura utetse, kuko numva ncitse intege. Ni co catumye yitwa Edomu.[16]

³¹Yakobo aramwishura, ati Shit’ ubanje kungurira, nkegukira kuba samuragwa mu gishingo cawe.

³²Esau aramwishura, ati Rāba ngira mpfe! non’ ivyo kuba samuragwa bizommarira iki?

³³Yakobo aramwishura, ati Banza undahire. Aramurahira, agura na Yakobo ivyo kuba samuragwa kwiwe.

³⁴Yakobo araheza aha Esau umutsima n’ibiharage; nukw ararya aranywa, yivira hasi, arīgīra. Uko ni ko Esau yakēngereye ivyo kuba samuragwa.