Read Bibliya Yera 1951 Itanguriro 26 Bible Online

Itanguriro 26 - Bibliya Yera 1951 bible

Itanguriro 26

¹Hatera iyindi nzara ya kabiri mur’ ico gihugu, itar’ imwe ya mbere yo mu gihe ca Aburahamu. Isaka aja i Gerari kwa Abimeleki umwami w’Abafilisitiya.

²Uhoraho aramwiyereka, ati Ntumanuke ng’uje muri Egiputa: uz’ ube mu gihugu nzokubarira.

³Ba urasuhukiye mur’ iki gihugu, nanje nzobana nawe, nguhe umugisha; kuko wewe n’ uruvyaro rwawe nzobaha ibi bihugu vyose; kandi nzokomeza indahiro narahiye Aburahamu so;

⁴nzogwiza uruvyaro rwawe, rungane n’inyenyeri zo kw ijuru, kand’ uruvyaro rwawe nzoruha ibi bihugu vyose; kandi mu ruvyaro rwawe ni ho amahanga yose yo mw isi azohērwa umugisha;

⁵kuko Aburahamu yanyumviye, agashitsa ivyo namwihanikirije n’ amabgirizwa yanje n’ivyo nashinze n’ivyagezwe vyanje.

⁶Nuko Isaka aba i Gerari:

⁷abantu baho bamubaza ivy’ umugore wiwe; arabishura, ati Ni mushikanje; kuko yatinye kuvuga kw ar’umugore wiwe, ngw abantu baho bomwica kubga Rebeka, kuko yari mwiza w’umunyakaranga.

⁸Amazey’ igihe kirekire, Abimeleki umwami w’Abafilisitiya arungurukira mw idirisha, abona Isaka akinisha Rebeka umugore wiwe.

⁹Abimeleki ahamagaza Isaka, aramubarira, at’ Erega biraboneka kw ar’ umugore wawe! None n’iki cakuvugishije kw ari mushikawe? Isaka aramwishura, ati N’uko natinye ko bonyica kubgiwe.

¹⁰Abimeleki aramwishura, at’ Ico wadukoreye ico n’ iki? Ereg’ umwe mu bantu banje yari kuryamana n’umugore wawe ata co yicura, ukaba uturemētse icaha.

¹¹Abimeleki yihanikiriza abantu biwe bose, at’ Ūzokora kur’ uyu mugabo canke ku mugore wiwe, ntibizobura kumucisha umutwe.

¹²Maze Isaka abiba mur’ ico gihugu, mur’ uwo mwaka nyene yimbura ibirenze ivyo yabivye ingero ijana. Uhoraho amuha umugisha.

¹³Uwo mugabo aba umutunzi, agenda arushiriza, gushitsa aho yabereye umutunzi bihebuje.

¹⁴Kandi yar’ afise ibitayega vy’imikuku n’amasho, n’abantu bahinda: atera Abafilisitiya ishari,

¹⁵bituma basivya amariba yose, bayuzuza ivu, ayo abantu ba se bari barimvye, mu gihe ca se nyene Aburahamu.

¹⁶Maze Abimeleki abarira Isaka, ati Genda utuvemwo, kuk’ uturuta.

¹⁷Nuko Isaka avayo, ashinga amahema yiwe mu kibande c’i Gerari, abayo.

¹⁸Isaka asibūza ya mariba, amwe bāri bārimvye mu gihe ca se Aburahamu, kukw Abafilisitiya bari bayashibije, Aburahamu amaze gupfa. Ayita amazina nyene se yari yarayise.

¹⁹Bukeye abantu ba Isaka bimba mur’ ico kibande, babonamw’ iriba ry’amazi adudubiza.

²⁰Abungere b’i Gerari batonganira ayo mazi n’ abungere ba Isaka, bat’ Aya mazi n’ayacu! Isaka yita iryo riba Eseki,[17] kuko bāritātiye.

²¹Bongera kwimba irindi riba, na ryo bararitonganira: aca aryita Sitina.[18]

²²Avayo arunguruza, yimbisha irindi riba, ryo ntibaritonganira: aca aryita Rehoboti;[19] aravuga, ati Noneh’ Uhoraho adushize ahiyaguye, tuzogasāra mu gihugu.

²³Avayo aradūga, aja i Beri‐sheba.

²⁴Uhoraho amwiyereka iryo joro, aramubgira, ati Nd’ Imana ya so Aburahamu: ntutinye, kuko ndi kumwe nawe, kandi nzoguha umugisha, ngwize uruvyaro rwawe, kubg’ umusavyi wanje Aburahamu.

²⁵Yubakay’ igicaniro, yambaza izina ry’ Uhoraho, ashingayo amahema yiwe; na ho nyene abantu ba Isaka bahimba iriba.

²⁶Maze Abimeleki ava i Gerari, aja iy’ari, ari kumwe na Ahuzati umumenyekana wiwe na Fikoli umugabisha w’ingabo ziwe.

²⁷Isaka arababaza, ati N’iki kibazanye iyo ndi, kandi munyanka, mwaranyirukanye i wanyu?

²⁸Baramwishura, bati Twabonye rwose yuk’ Uhoraho ari kumwe nawe; tuti Hinge tuje gushira indahiro hagati yacu na we, dusezerane isezerano na we;

²⁹kugira ngo nawe ntuz’ utugirire nabi, nk’uko natwe tutakuriye n’urwara, ata co twakugize atar’ ivyiza gusa, kandi tukaba twagusēzeye amahoro. Tubonye k’Uhoraho yaguhaye.

³⁰Nuko Isaka abarondereza amazimano, bararya, baranywa.

³¹Bakoroka kare, bashirah’ indahiro. Maze Isaka arabasēzera, bavayo bagenda amahoro.

³²Kur’ uwo musi abantu ba Isaka baraza, bamubarira ivya rya riba bimvye, bati Turabonye amazi.

³³Aryita Shiba: ni co gituma ico gisagara citwa Beri‐sheba na bugingo n’ubu.

³⁴Esau amaze imyaka mirongwine arongora Yuditi mwene Beyeri Umuheti, na Basemati mwene Eloni Umuheti:

³⁵batuntuza imitima ya Isaka na Rebeka.