Read Bibliya Yera 1951 Itanguriro 27 Bible Online

Itanguriro 27 - Bibliya Yera 1951 bible

Itanguriro 27

¹Isaka ashaje, amaso yiwe asigaye abona ivyijiji, ahwihwisha gusa, ahamagara imfura yiwe Esau, at’ Ewe mwana wanje! Aritaba, ati Sabge!

²Aramubgira, ati Rāba ndashaje, sinzi umusi ruzompitana.

³Non’ enda rero, ni wābīre ivyo uhīgisha, umutana wawe n’umuheto wawe, ugende mw ishamba uhīge, undonderere akanyama,

⁴uheze uteke zīcumbe, nk’izo nsanzwe nkunda, uzinzanire ndye, mbone kuguhezagira ntarapfa.

⁵Rebeka yumviriza Isaka ivyo abarira Esau umwana wiwe. Nuko Esau aja mw ishamba kurondera ico ahīga ngw akizanire se.

⁶Maze Rebeka abarira Yakobo umwana wiwe, ati Numvise so abarira Esau mukurwawe,

⁷ngw agende amuzanire ico ahize, amutekere zīcumbe, arye, amuhezagirire imbere y’Uhoraho atarapfa.

⁸Nuko rero mwana wanje, enda ni wumve ivyo nkubarira:

⁹genda mu mukuku, unzanirey’ amasuguru y’impene abiri meza‐meza; nanje ndonderere so, mmutekere zīcumbe, nk’ iz’ asanzwe akunda:

¹⁰nawe uheze uzishīre so, arye, kugira ngw aguhezagire atarapfa.

¹¹Yakobo yishura Rebeka nyina wiwe, at’ Ehe rāba, Esau mukurwanje n’umuntu yakatse ivyoya, nanje umubiri wanje n’inkūte.

¹²Kumbure data yonkorakora, ngasa n’ingunge kuri we, nkikwegera umuvumo mu gishingo c’umuhezagiro.

¹³Nyina aramwishura, ati Mwana wanje, umuvumo wovumwe uz’ube kuri jewe; pfa kunyumvira gusa, ugende uzinzanire.

¹⁴Aragenda arazizana, aziha nyina; nyina ateka inyama zazo, zirīcumba, ziba nk’ izo se asanzwe akunda.

¹⁵Rebeka yābīra imyambaro myiza ya Esau imfura yiwe, iyo yar’ afise mu nzu, ayambika Yakobo ari we Butoyi.

¹⁶Kand’ ashira insāto za ya masuguru y’impene ku bikonjo vyiwe, no kw izosi ah’ar’ inkūte.

¹⁷Ahereza uwo mwana wiwe Yakobo za nyama zīcumvye, n’umutsima yacumvye,

¹⁸na we aja iyo se ari, aramuhamagara, ati Data! aritaba, at’ Ee? at’ Uri nde ga mwana wanje?

¹⁹Yakobo yishura se, ati Ni jewe Esau imfura yawe; nkoze ivyo wambariye; enda se vyuka wicare, urye ku vyo nahīze, kugira ng’umpezagire.

²⁰Isaka abaza umwana wiwe, ati Ko waronse n’ingoga, ga mwana wanje? Ati N’uk’ Uhoraho Imana yawe ampaye kugira ibakwe.

²¹Isaka abarira Yakobo, at’ Enda īgira hino mwana wanje, ngukorakore, mmenye k’uri Esau umwana wanje koko, canke k’ utari we.

²²Nuko Yakobo yegera se wiwe Isaka; aramukorakora, aravuga, at’ Ijwi n’irya Yakobo, arikw ibikonjo n’ivya Esau.

²³Ntiyamenya uw’ari we, kukw ibikonjo vyiwe vyarik’ ubgoya, nk’ ivya mukuru we Esau: nukw aramuhezagira.

²⁴Aramubaza, ati Mbeg’ uri Esau umwana wanje koko? Aramwishura, ati Ndi we.

²⁵Aramubarira, ati Vyīgize hino, nanje ndye ku vyo wahīze, mwana wanje, kugira ngo nguhezagire. Arabimwegereza, ararya: amuzanira vino, arashōza.

²⁶Maze se wiwe Isaka aramubarira, ati Nyegera mwana wanje, ungūmbīre.

²⁷Aramwegera, aramugūmbīra: yumva ubutāmirane bg’imyambaro yiwe, aramuhezagira, at’ Ubutāmirane bg’umwana wanje Bumeze nk’ubg’ umurima Uhoraho yahaye umugisha:

²⁸Nukw Imana iguhe ku kime kiva mw ijuru, No ku biboribori vyo mu ndimiro, Hakikimbe impeke na vino:

²⁹Amoko az’ agukorere, Amahanga az’ akwikubite imbere: Uz’ uganze abo muvukana, Bene nyoko bakwikubite imbere; Ūzokuvuma wese avumwe, Ūzoguhezagira wese ahezagirwe.

³⁰Nuko Isaka arangije guhezagira Yakobo, Yakobo akiva imbere ya se wiwe Isaka, Esau mukuru we aca arahīgūka.

³¹Na we ateka inyama zirīcumba, azizanira se; abarira se, ati Data, n’uvyuke urye ku vyo nahīze, jewe umwana wawe, kugira ng’umpezagire.

³²Isaka se aramubaza, at’ Uri nde? Aramwishura, ati Ni jewe Esau, umwana wawe w’imfura.

³³Isaka aca ahinda agashitsi kenshi cane, ati None ni nde yahīze, akanzanira kuri vyo, nkaba nariye, kuri vyose utaraza, nkamuhezagira? Kandi nta kabuza, umuhezagiro azowugira.

³⁴Esau yumvise amajambo ya se, araturikisha, aborogana umubabaro mwinshi cane, abarira se, ati Mpezagira nanje se muvyeyi wanje!

³⁵Aramwishura, ati Murumunawe yaciye mu bugunge, atwara umuhezagiro wawe.

³⁶Aramwishura, ati Yakobo ni Yakobo koko; izina ni ryo muntu! Yambereye intōnyōtsi kabiri kose: yannyaze kuba samuragwa, non’ asubiriye n’umuhezagiro wanje! Arongera aramubaza, ati Nta muhezagiro wansigarije na mba?

³⁷Isaka yishura Esau, at’ Erega namaze kumuha kukuganza, kand’ ab’i wabo nabamuhaye ngo bamusabe; kandi namweguriye ingano na vino; none nogukorera iki ga mwana wanje?

³⁸Esau abaza se, ati Mbega muvyeyi, war’ ufise umuhezagiro umwe gusa? Mpezagira nanje se muvyeyi wanje! Esau araturika ararira.

³⁹Se wiwe Isaka aramwishura, at’ Uzoba kure y’ibiboribori vyo mu ndimiro, Uzoba kure y’ikime kiva mw ijuru;

⁴⁰Inkota yawe ni yo izokubeshaho, kand’ uzokorera murumunawe; Kand’ igihe kizogera uzokwigobōtora, Wikunkumure ingōgo yakwambitse mw izosi.

⁴¹Esau agirira Yakobo urwanko, kubg’ umuhezagiro se yamuhezagiye: maze Esau arivuganya mu mutima, ati Data ashigaje igihe gito tukaja ku kigandaro: ni ho nzokwica murumunanje Yakobo.

⁴²Babarira Rebeka amagambo ya Esau imfura yiwe; ahamagaza Yakobo ari we Butoyi, aramubgira, at’ Umve, Esau mukurwawe agira yimare ishavu wamuteye, akwice.

⁴³None rero mwana wanje, umve nkubarire: kūra hasi, uhunge, uje i Harani kwa Labani musazanje,

⁴⁴ube uramazey’ imisi mikeya, gushitsa ah’ ishavu rya mukurwawe rizoshirira,

⁴⁵akazika agufitiye kagashira kuri wewe, akibagira ivyo wamukoreye: maze nzoca ngutumako, ugaruke: none nobaburira rimwe mwempi?

⁴⁶Maze Rebeka abarira Isaka, ati Numva ndundumiwe kubg’ abo Bahetikazi, nopfuma mpfa! Yakobo yorongora Umuhetikazi nka ba bandi, noba nkibēreyeh’ iki?