Read Bibliya Yera 1951 Itanguriro 28 Bible Online

Itanguriro 28 - Bibliya Yera 1951 bible

Itanguriro 28

¹Nuko Isaka ahamagara Yakobo, aramuhezagira, aramwihanikiriza, ati Ntuz’ usabe Umunyakananikazi.

²Va hasi, uje i Padan‐aramu kwa Betuweli sogokuru; uz’ usabey’ umugeni mu bakobga ba Labani nyokorome.

³Kand’ Imana Ishobora vyose iguhe umugisha, iguhe kurondoka, ikugwize, kugira ng’uhindukemw’ isinzi ry’amahanga.

⁴Kand’ iguhe umugisha yahaye Aburahamu, wewe n’uruvyaro rwawe na rwo, kugira ngo wegukire iki gihugu wabayemwo kitār’ icanyu, ico Imana yemereye guha Aburahamu.

⁵Nuko Isaka arungika Yakobo: aragenda, aja i Padan‐aramu kwa Labani mwene Betuweli Umwaramu, musaza wa Rebeka, nyina wa Yakobo na Esau.

⁶Maze Esau abona yuko Isaka ahezagiye Yakobo, akamurungika i Padan‐aramu gusabay’ umugeni; kandi ko yamwihanikirije akimuhezagira, ati Ntuz’ usabe Umunyakananikazi;

⁷kandi ko Yakobo yumviye se na nyina, akaja i Padan‐aramu.

⁸Nuko Esau abonye yukw Abanyakananikazi batanezereye se wiwe Isaka,

⁹aca aja kwa Ishimayeli, asabayo Mahalati mushiki wa Nebayoti, umukobga wa Ishimayeli, Ishimayeli mwene Aburahamu, amuharika ba bagore yar’asanganywe.

¹⁰Yakobo ava i Beri‐sheba, agenda atumbereye i Harani.

¹¹Ashika ahantu araharāra, kukw izuba ryari ricokeye: yābīra ibuye mu mabuye yaho, araryisegura, aryama aho hantu arasinzira.

¹²Ararota, abona icuririzo gishinzwe hasi, umutwe waco ugashika mw ijuru: abona abamarayika b’ Imana bakidūgako, bakimanukako.

¹³Kand’ Uhoraho yar’ ahagaze hejuru yaco, aramubarira, ati Nd’ Uhoraho, Imana ya Aburahamu sogokuru, Imana ya Isaka: iki gihugu uryamyemwo, nzokiguha, mwe n’uruvyaro rwawe;

¹⁴kand’ uruvyaro rwawe ruzongana n’umukungugu wo hasi, ruzogasāra i burengerazuba n’i burasirazuba n’i burārūko n’i bumanuko: kandi muri wewe no mu ruvyaro rwawe ni ho imiryango yose yo mw isi izohērwa umugisha.

¹⁵Kand’ ehe rāba ndi kumwe nawe, nzokuzigamira ah’uzoja hose, kandi nzokugarukana mur’ iki gihugu; kuko ntazokureka ntarakora ivyo nkubariye.

¹⁶Yakobo arikangura, aravuga, ati N’ukuri Uhoraho ar’ aha hantu; nanje sinari ndabizi.

¹⁷Aratinya, aravuga, at’ Ereg’ aha hantu hateye ubgoba! At’ Aha n’inzu y’Imana s’ikindi, aha ni ho rembo ry’ijuru.

¹⁸Yakobo azinduka kare mu gatondo, yābīra rya buye yiseguye, ararishinga ngo ribe inkingi, arisukakw amavuta ya elayo.

¹⁹Aho hantu aca ahita Beteli,[20] arik’ ubga mbere ico gisagara citwa Luzi.

²⁰Yakobo asezerana isezerano, at’ Imana ni yabana nanje, ikanzigamira mur’ uru rugendo ndimwo, ikampa ivyo kurya n’ivyo kwambara,

²¹nkazogaruka kwa data nkir’ amahoro, Uhoraho azoba Imana yanje,

²²n’iri buye nshinze kw inkingi rizoba inzu y’ Imana: ati Kandi ku vy’uzohora umpa vyose, sinzobura kuguhamw’ ikigiracumi.