Read Bibliya Yera 1951 Itanguriro 29 Bible Online

Itanguriro 29 - Bibliya Yera 1951 bible

Itanguriro 29

¹Yakobo araheza akomeza urugendo, ashika mu gihugu c’ababa i burasirazuba.

²Agize artya, abona iriba ku musozi, ririkw imikuku y’intama iri gutatu, ziryamye; kuko kur’ iryo riba ari ho bāshōra imikuku. Kand’ ikibuye gipfundikiye umunwa w’iriba cari kinini.

³Aho ni ho imikuku yose yakoranira, bagatembagaza ico kibuye, bakagikūra ku munwa w’iriba, bakavomera intama, bagaheza bakagisubiza ku munwa w’ iriba, aho cahora.

⁴Yakobo abaza abungere, ati Bagenzi, mbega mur’ aba hehe? Baramwishura, bati Tur’ Abanyaharani.

⁵Arababaza, ati Mbega Labani mwene Nahori muramuzi? Bati Turamuzi.

⁶Arababaza, at’ I we n’ amahoro? Baramwishura, bati N’ amahoro; kandi ngurya n’umwigeme wiwe Rakeli azanye intama.

⁷Arababgira, at’ Ehe rāba, izuba riracariho, amataha ntaragera ngo mwegeranye intama: ni muzishōre, muje kuba muraziragiye.

⁸Baramwishura, bati Ntitubishobora, imikuku yose itarakorana; kukw ikoranye, ni ho batembagaza ikibuye, bakagikūra ku munwa w’ iriba, tukabona kuvomera intama, zigashōka.

⁹Akivugana na bo, Rakeli arashika, azanye intama za se, kukw ari we yaziragira.

¹⁰Nuko Yakobo abonye Rakeli mwene Labani inarume, n’intama za inarume nyene Labani, aca yegera iriba, atembagaza ca kibuye agikūra ku munwa w’iriba, avomera umukuku wa Labani inarume, zirashōka.

¹¹Yakobo agūmbīra Rakeli, araheza araturika ararira.

¹²Yakobo yibarira Rakeli kw afitanye akamwe na se, kw ar’ umwana wa Rebeka: na we aca arirukanga, abibgira se.

¹³Nuko Labani yumvise inkuru ya Yakobo mwishwa we, arirukanga, aramusanganira, amugwa mu nda aramugūmbīra, amujana i we. Na we adondera Labani ivyabaye vyose.

¹⁴Labani aramubgira, ati N’ukuri ur’ ubura bganje, ur’ amaraso yanje.[21] Bamaranye ukwezi kumwe,

¹⁵Labani abarira Yakobo, ati Mbega kuko dufitaniye akamwe, ico cotuma unkorera ku busa? Enda mbarira: nze nkugerere iki?

¹⁶Kandi Labani yar’ afise abakobga babiri: umukuru yitwa Leya, umutoya yitwa Rakeli.

¹⁷Leya yar’ afise amaso atarābika neza, ariko Rakeli yari mwiza wese w’umunyakaranga.

¹⁸Yakobo agomwa Rakeli; yishura Labani, ati Nzogukorera imyaka ndwi, uz’ umpe umwigeme wawe mutoya Rakeli.

¹⁹Labani aramwishura, ati Kumuha wewe biruta kumuha uwundi muntu wese: igumire ngaho.

²⁰Nuko Yakobo akora imyaka ndwi kugira ngw ahabge Rakeli; imuhindukira nk’imisi mikeya, kubg’ urukundo amukunda.

²¹Maze Yakobo abarira Labani, ati Mpa umugeni wanje, ndamurongore, kukw imisi wanciriye yashitse.

²²Labani atorera ubukwe abantu bose b’aho hantu, atereka amazimano.

²³Ahenga mu kagoroba, azana Leya umwana wiwe aramumuha, aramurongora.

²⁴Labani atanga Zilupa incoreke yiwe, amuha Leya umwana wiwe ngw amucorekere.

²⁵Bukeye Yakobo agize artya, asanga ni Leya: abaza Labani, at’ Ivyo wangize n’ ibiki? Sinagukoreye kuri Rakeli? Icatumye umpenda n’iki?

²⁶Labani aramwishura, at’ I wacu ntibagenza bartyo, gutanga umutoya umukuru akir’ aho.

²⁷Mara imisi ndwi yo mu nkinga, mwe n’ uyo, duheze tuguhe uwundi na we, nawe uz’unkorere iyindi myaka ndwi.

²⁸Yakobo abigenza artyo, amara iyo misi ndwi y’inkinga; Labani araheza amushingira Rakeli umwana wiwe wundi.

²⁹Labani aha uwo mwana wiwe Rakeli incoreke yiwe Biluha, ngw amucorekere.

³⁰Yakobo arongora Rakeli na we, maz’ aramukundwakaza amurutisha Leya; nuko akorera Labani iyindi myaka ndwi.

³¹Maz’ Uhoraho abona yuko Leya yanswe, aca azibūra inda yiwe; ariko Rakeli aragumbaha.

³²Leya asama inda, avyara umuhungu, amwita Reyubeni,[22] ati N’uk’ Uhoraho yabonye umubabaro wanje; noneh’ umugabo wanje azonkunda.

³³Asama inda y’ubuheta, avyara umuhungu, at’ Uhoraho kuko yumvise ko nanswe, ni co gitumye anyongera n’uyu: amwita Simeyoni.[23]

³⁴Yongera gusama inda, avyara umuhungu; ati Noneh’ umugabo wanje arifatanya nanje, kuko mmuvyariye abahungu batatu: ni co catumye yitwa Lewi.[24]

³⁵Yongera gusama inda, avyara umuhungu; at’ Ubuho ndashima Uhoraho: ni co catumye amwita Yuda.[25] Nukw aba araretse kuvyara.