Read Bibliya Yera 1951 Itanguriro 30 Bible Online

Itanguriro 30 - Bibliya Yera 1951 bible

Itanguriro 30

¹Rakeli abonye atavyaranye na Yakobo akana, agirira ishari mukuru we; abarira Yakobo, ati Mpa abana; utabampaye, mpfuma mpfa.

²Maz’ uburake bga Yakobo buziriringira Rakeli, ati Mbega jewe ndi mu gishingo c’ Imana, kw ari yo yakwimye ivyara?

³Aramwishura, at’ Ehe nguyo incoreke yanje: n’umurārire, kugira ngw amvyarire abana, ndonkere ivyara kuri we.

⁴Amuha Biluha incoreke yiwe: nuko Yakobo aramurārira.

⁵Biluha asama inda, avyarana na Yakobo umuhungu.

⁶Rakeli aravuga, at’ Imana inciriye urubanza, ndatsinda, kandi yumvise ijwi ryanje, impa umuhungu: ni co catumye amwita Dani.[26]

⁷Maze Biluha, incoreke ya Rakeli araheta, asama inda, avyarana na Yakobo umuhungu wa kabiri.

⁸Rakeli aravuga, ati Nniganye na mwene mama bikomeye, ndamunesha: amwita Nafutali.[27]

⁹Leya abonye aretse kuvyara, yābīra Zilupa incoreke yiwe, amuha Yakobo.

¹⁰Zilupa incoreke ya Leya avyarana na Yakobo umuhungu.

¹¹Leya aravuga, ati Ngize imana! Amwita Gadi.[28]

¹²Maze Zilupa incoreke ya Leya avyarana na Yakobo umuhungu wa kabiri.

¹³Leya aravuga, ati Ndahiriwe! Kukw abandi bagore bazonyita umuhirwa: amwita Asheri.[29]

¹⁴Maze mw igenya ry’ingano, Reyubeni aragenda, ahūmuka ku madudayimu[30] mu ndimiro, ayazanira nyina Leya. Rakeli asaba Leya, ati Mpa se ku tududayimu umwana wawe azanye.

¹⁵Leya aramwishura, at’ Uvyise ivyoroshe kuntwara umugabo? Non’ ugomba kuntwara amadudayimu umwana wanje azanye? Rakeli aramwishura, ati None rero, iri joro arakurārira, n’umpe utududayimu tw’umwana wawe.

¹⁶Ku mugoroba Yakobo atashe, avuye mu ndimiro, Leya arasohoka aja kumutega, aramubgira, ati Ni jewe ukwiye kurārira, kuko nagutangiye ingero y’amadudayimu y’umwana wanje. Nukw amurārira iryo joro.

¹⁷Imana yumvira Leya, asama inda, avyarana na Yakobo umuhungu agira gatanu.

¹⁸Leya aravuga, at’ Imana irangereye, kuko nahaye umugabo wanje incoreke yanje. Amwita Isakari.[31]

¹⁹Leya asama iyindi nda, avyarana na Yakobo umuhungu agira gatandatu.

²⁰Leya aravuga, at’ Imana ingabiye ingabire nziza, noneh’ umugabo wanje azobana nanje, kuko mmuvyariye abahungu batandatu. Amwita Zebuloni.[32]

²¹Hanyuma avyara umukobga, amwita Dina.

²²Maz’ Imana yibuka Rakeli, iramwumvira, izibūra inda yiwe.

²³Asama inda, avyara umuhungu, at’ Imana irantēturuye:

²⁴amwita Yosefu,[33] at’ Uhoraho ampetere uwundi muhungu.

²⁵Nuko Rakeli amaze kuvyara Yosefu, Yakobo abarira Labani, ati Ndekura ngende, nsubire i wacu mu gihugu cacu.

²⁶Mpa abagore banje n’abana banje, abo nakoreye, nīgīre; kuk’ uzi ukuntu nagukoreye.

²⁷Labani aramwishura, at’ Icompa ukanezererwa kugumana nanje! Kuko nabonye rwose yuk’ Uhoraho yampaye umugisha kubgawe.

²⁸Ati Ncira ingero nzokugerera, nanje nzoyitanga.

²⁹Aramwishura, at’ Urazi ingene nagukoreye, n’ukuntu nagendanye imikuku yawe.

³⁰Kukw ivyo war’ ufise ntaraza vyari bike, none vyaragwiriye biba ibitayega; kand’ Uhoraho yaguhaye umugisha uhereye aho nashinze ikirenge hose: none jeho nzokwironderera ryari ivy’ urugo rwanje na rwo?

³¹Aramubaza, ati None nokugerera iki? Yakobo aramwishura, ati Nta co nkwātse: ndemeye gukomeza kukuragirira umukuku wawe no kuwuzigama, ni wemera kunkorera kino:

³²ko nogendagenda mu mukuku wawe wose uyu musi, ngasobanuramw’ igitungwa cose c’umufumberi n’ic’ amabara y’ibigabo, ar’ intama yose y’ikiyumbu, ar’ impene z’amabara y’ibigabo n’iz’ imifumberi: ben’ izo ni zo zizoba ingero yanje.

³³Uku ni k’ukuri kwanje kuzontsindira mu gihe c’imbere: ni waza kwitegereza ingero zanje zivuye i wawe, hakaramuka habonetsemw’ impene itar’ iy’ umufumberi cank’ iy’ amabara y’ibigabo, cank’ intama itar’ ikiyumbu, mu z’iwanje, uz’ uyite inyibano.

³⁴Labani aramwishura, ati Ndavyemeye: bize bibe nk’uk’ uvuze.

³⁵Ariko Labani ahenga uwo musi nyene, arobanura amapfizi y’impene y’ibibaba n’ay’ amabara y’ibigabo, n’izivyara zose z’imifumberi n’iz’ ibigabo, impene yose y’ibara ryera, n’intama zose z’ibiyumbu, aziragiza abahungu biwe.

³⁶Ashira itandukaniro hagati yabo na Yakobo ry’urugendo rw’imisi itatu. Nuko Yakobo aragira imikuku ya Labani isigaye.

³⁷Yakobo aca inkoni mbisi zitwa imilebeni n’izitwa shakedi n’ izitwa imyarumoni, azicakw amabara yera asa n’imisengo, agaragaza ahēra h’imbere ku nkoni.

³⁸Ashira izo nkoni yaciyekw amabara imbere y’imikuku ku migende no ku ngomero ah’imikuku iza kunywera: kand’ iyo zije kunywa zaca zima.

³⁹Imikuku yimira imbere y’izo nkoni, ikavyara iz’ ibibaba n’iz’ imifumberi n’iz’ amabara y’ibigabo.

⁴⁰Izivutse Yakobo yazishira ukwazo, maz’ imikuku akayibangurira iz’ ibibaba n’iz’ ibiyumbu zose mu mukuku wa Labani; agashira imikuku yiwe ukwayo, ntayisukiranye n’iya Labani.

⁴¹Kand’ ukw inziza zo mu mukuku zirinze, Yakobo yashira za nkoni imbere y’umukuku ku migende, kugira ngo zimire hagati y’izo nkoni.

⁴²Arikw iyo zibaye mbi‐mbi ntazishireho: bituma imbi ziba iza Labani, inziza ziba iza Yakobo.

⁴³Uwo mugabo agwiza itunga cane, agira imikuku myinshi n’abatungano b’abakobga n’abahungu n’ingamiya n’ indogoba.