Read Bibliya Yera 1951 Itanguriro 31 Bible Online

Itanguriro 31 - Bibliya Yera 1951 bible

Itanguriro 31

¹Bukeye Yakobo yumva amagambo y’abahungu ba Labani, bat’ Ivyar’ ivya data Yakobo yavyinyagiye vyose, mbere mu vya data ni ho yakūye ubgo butunzi bgose.

²Yakobo abona yuko Labani atakimurāba ijisho ryiza nka mbere.

³Maz’ Uhoraho abarira Yakobo, ati Ngo usubire mu gihugu ca ba sogokuruza muri bene wanyu: nanje nzobana nawe.

⁴Nuko Yakobo atuma guhamagaza Rakeli na Leya ngo bamusange mu mukuku wiwe iy’ aragiye.

⁵Arababgira, ati Nabonye so atakindāba ijisho ryiza nka mbere; arikw Imana ya data yagumanye nanje.

⁶Namwe murazi yuko nakoreye so uko nashoboye kwose.

⁷Kandi so yagiye angunga, ahindura ingero zanje ibihetangabo cumi; arikw Imana ntiyamukundiye kugira ico ankorako.

⁸Iy’ ambariye, at’ Iz’ imifumberi ni zo zizoba ingero yawe, umukuku wose waca uvyara imifumberi; yambarira, ngw Iz’ ibibaba ni zo zizoba ingero yawe, umukuku wose ugaca uvyara iz’ ibibaba.

⁹Uko ni kw Imana yanyaze so ibitungwa vyiwe, ikabimpa.

¹⁰Kand’ igihe umukuku war’urinze, nunamuye amaso ndi mu nzozi, ndota mbona impfizi z’impene zūrira umukuku zar’iz’ ibibaba n’iz’ imifumberi n’iz’ ibidorodonzi.

¹¹Maz’ umumarayika w’ Imana ampamagarira mur’ izo nzozi, ati Yakobo! Nti Sabge!

¹²Arambarira, at’ Unamura amaso yawe, urābe: eh’ impfizi z’ impene zose zūriye umukuku n’iz’ ibibaba n’iz’ imifumberi n’iz’ ibidorodonzi: kuko nabonye ivyo Labani akugirira vyose.

¹³Ni jewe Mana yakubonekeye i Beteli, hamwe wasiga amavuta ku nkingi y’ibuye, ukahansezeranira isezerano: nuko none va hasi, uve mur’ iki gihugu, usubire mu gihugu wavukiyemwo.

¹⁴Rakeli na Leya baramwishura, bati Mbega mu rugo rwa data har’ umugabane tuhafise, cank’ ivyo tuzoragwa?

¹⁵Ntaduharūra nk’abanyamahanga? Ko yatuguze, akaba yarahejeje inkwano zacu.

¹⁶Ubutunzi bgose Imana yanyaze data n’ubgacu n’abana bacu: nukw ico Imana ikubgiye cose, ugikore.

¹⁷Maze Yakobo ava hasi, ashira abana biwe n’abagore biwe ku ngamiya;

¹⁸ashorera n’ubusho bgiwe bgose n’ubutunzi bgose yaronse, ubusho yaronkeye i Padan‐aramu, kugira ngw aje kwa se Isaka mu gihugu c’i Kanani.

¹⁹Maze Labani yari yagiye gukemuza intama ziwe; nuko Rakeli yiba ibigirwamana vya se.

²⁰Yakobo yiyiba Labani Umwaramu mu gucika, kukw ata co yarinze kumubarira.

²¹Nukw acikana ivyo yar’ afise vyose; arīkora, ajabuka uruzi, agenda atumbereye umusozi w’i Gileyadi.

²²Ku musi ugira gatatu babūrira Labani yuko Yakobo yacitse.

²³Ajana na bene wabo, amara imisi ndwi amwometse inyuma, araruha amuhambiriza ku musozi w’i Gileyadi.

²⁴Mw ijoro, Imana iza kuri Labani Umwaramu mu nzozi, iramubarira, iti Wirinde, ntugire iryo ubarira Yakobo iry’ ari ryo ryose.

²⁵Nuko Labani ashikīra Yakobo. Yakobo yar’ashinze amahema ku musozi, Labani na bene wabo na bo bashinga ku musozi w’i Gileyadi.

²⁶Labani abaza Yakobo, at’ Ico wakoze ico n’iki, catumye unyiyiba, ukajana abana banje nk’inyagano?

²⁷Wabitewe n’iki gucika mu mpisho, ukanyiyiba, ntumbarire ngo ngusēzeze ikiyāgo c’umunezero no kuririmba no kuvuza agashāko k’ingoma n’inanga,

²⁸ntunkundire kugūmbīra abuzukuru banje n’abana banje? Wakoze ivy’ ubupfu.

²⁹Nari kugira ico mbakorako, arikw Imana ya so yambariye mur’ iri joro, iti Wirinde ntugire iryo ubarira Yakobo iry’ ari ryo ryose.

³⁰None ko war’ ugomvye kugenda ni koko, kuk’ ukumbuye cane i wanyu; ariko n’iki catumye wiba imana zanje?

³¹Yakobo yishura Labani, at’ Irya mbere, n’uko natinye ko wonnyaga abakobga bawe;

³²irya kabiri, uwo uribubonane imana zawe, akwiye gupfa: enda n’usake icawe coba mu vyanje, ngaha imbere ya bene wacu, ukijane! Kuko Yakobo atar’ azi ko Rakeli yazivye.

³³Nuko Labani yinjira mw ihema rya Yakobo, no mu rya Leya, no mu rya za ncoreke zompi; arazibura. Ava mw ihema rya Leya, yinjira mu rya Rakeli.

³⁴Ariko Rakeli yari yabiriye vya bigirwamana, abishira mu matandiko y’ingamiya, avyicarako. Labani asaka mw ihema hose, arabura.

³⁵Rakeli abgira se, ati Ntungirire umwikomo ko ntaguhagurukiye, nyakwubahwa, n’uke ndi mu mihango y’abagore. Nukw arasaka, ariko ntiyabona vya bigirwamana.

³⁶Yakobo araraka, atonganya Labani; aramubaza, ati Nagucumuyekw iki, nakoze icaha ki, catumye uzinga bufuri ukanyoma inyuma?

³⁷None k’usatse mu bintu vyanje vyose, ubonye iki co mu vyo mu rugo rwawe? Kizane hano, ugishire hagati y’izi ncuti zanje n’izawe, badutātūre.

³⁸Mur’ iyi myaka mirongwibiri twamaranye, intama zawe n’impene zawe ntizaramburuye, amapfizi y’intama yo mu mukuku wawe sinayariye.

³⁹Iyatabaguwe n’igikōko sinakuzanira ikirangara, yapfira jewe; izibge warazindihisha, ar’izo ku murango canke mw ijoro.

⁴⁰Eh’ ayo nabonye: ku murango nicwa n’indugumba, mw ijoro nkicwa n’ imbeho; itiro rikaguruka ku maso.

⁴¹Mur’ iyi myaka ukw ari mirongwibiri naba i wawe, nagukoreye imyaka cumi n’ine nca abakobga bawe bompi, n’iyindi itandatu ngucak’ umukuku w’intungwa: kandi wahinduye ingero zanje ibihetangabo cumi.

⁴²Iy’ itaba Imana ya data yarabanye nanje, Imana ya Aburahamu, iyo Isaka nyene yubaha, ntiwari kubura kundungika nd’inkokore. Imana yabonye umubabaro wanje n’ubutame bganje, maz’ iri joro yarāye irwahukanije.

⁴³Maze Labani yishura Yakobo, at’ Ereg’ aba bakobga n’abanje, n’aba bana n’abanje, n’iyi mikuku n’iyanje, n’ivyo ubona ibi vyose n’ivyanje: none noshobora nte kugira ico ngirira aba bakobga banje, cank’ abana bāvyaye?

⁴⁴None rero ngo ducane urusāgi twe nawe, habe icabona hagati yanje nawe.

⁴⁵Yakobo yābīra ibuye, arishinga nk’inkingi.

⁴⁶Yakobo abarira incuti ziwe, ati Ni mukoranye amabuye; nuko barayazana, bayagira ikigūngūzi;[34] basangirira aho nyene kur’ ico kigūngūzi.

⁴⁷Labani acita Yegari‐sahaduta: Yakobo na we acita Galedi.[35]

⁴⁸Labani aravuga, at’ Iki kigūngūzi kibaye icabona hagati ya twe nawe uyu musi. Ni co catumye citwa Galedi:

⁴⁹bo na Mizipa,[36] kuko Labani yavuze, at’ Uhoraho yame ahagaze hagati ya twe nawe tumaze gutandukana.

⁵⁰Ni waramuka ugiriye nabi abakobga banje, canke ni wabaharika, umenye yuko, nah’ ata wundi muntu azoba ariho, Imana izoba ari yo cabona hagati ya twe nawe.

⁵¹Kandi Labani abarira Yakobo, ati Ngiki ikigūngūzi n’iyi nkingi nshinze hagati yacu.

⁵²Iki kigūngūzi ni kibe icabona, n’iyi nkingi na yo nyene n’ibe icabona, yuko ntazorenga iki kigūngūzi nzanywe no kukugirira nabi, nawe k’utazorenga iki kigūngūzi n’iyi nkingi uzanywe no kungirira nabi.

⁵³Imana ya Aburahamu, Imana ya Nahori, Imana ya se w’abo bompi, n’ibe kamaramagambo hagati yacu. Yakobo arahira Iyo se Isaka yubaha.

⁵⁴Yakobo atangira ikimazi kur’ uwo musozi, ahamagara izo ncuti ziwe ngo basangire: nuko bararya, barāra iryo joro kur’ uwo musozi.

⁵⁵Labani azinduka kare mu gatondo, agūmbīra abuzukuru biwe n’abakobga biwe, arabahezagira: nuko Labani arataha, asubira i wabo.