Read Bibliya Yera 1951 Itanguriro 32 Bible Online

Itanguriro 32 - Bibliya Yera 1951 bible

Itanguriro 32

¹Nuko Yakobo akomeza urugendo, maz’ abamarayika b’ Imana bahūra na we.

²Yakobo ababonye, aravuga, at’ Aha ni ho ingabo z’Imana zishagaje: yita aho hantu Mahanayimu.[37]

³Yakobo atuma intumwa ngo zimwītangire imbere zije kwa Esau mukuru we mu gihugu c’i Seyiri, mu ntāra ya Edomu.

⁴Arababarira, at’ Uku abe ari ko muzobgira nyakwubahwa Esau, mut’ Umusavyi wawe Yakobo, muti Yabana na Labani kugeza ubu;

⁵muti Kand’ afise inka n’indogoba n’imikuku n’abatungano b’abahungu n’abakobga: muti Non’ adutumye kubikumenyesha, mugenzi, kugira ngw agirirwe akagongwe imbere yawe.

⁶Izo ntumwa zigaruka kuri Yakobo, ziti Twarashitse kwa mukurwawe Esau, non’ araje kugusanganira, kand’ azananye n’ingabo amajana ane.

⁷Yakobo aca aranduka umutima, arihebūra; maz’ agabanyamwo kubiri abantu bāri kumwe na we, n’imikuku n’amasho n’ingamiya;

⁸ati Esau ni yaramuka aserukiye ku muce umwe akawunyaga, ūsigaye wokira.

⁹Maze Yakobo aratakamba, ati Mana ya sogokuru Aburahamu, Mana ya data Isaka, ewe Uhoraho, si wewe wambariye, uti Subira mu gihugu canyu, no muri bene wanyu, uti Nanje nzokugirira neza?

¹⁰Izo mbabazi zose wagiriye umusavyi wawe, n’ukuntu utampemukiye, sinari mbereye kugirirwa na bikeya; kuko najabutse Yorodani uru nitwaje akoho gusa, none nahindutse imice ibiri.

¹¹Ndakwinginze, n’unkize, unkūre mu maboko ya mukurwanje Esau: kuko ndamutinya, yoye kuza akanyicana n’abana na ba nyina.

¹²Kand’ ari wewe wambariye, uti Sinzobura kukugirira neza, uti Nzohindura uruvyaro rwawe, rungane n’umusenyi wo ku kiyaga, w’isinzi utōharūrika.

¹³Arāra ngaho iryo joro; yābīra ku vyo yar’ afise, ngw abihe Esau mukuru we kw indamukanyo:

¹⁴impene zivyara amajana abiri, n’iz’ amasuguru mirongwibiri, n’ intama zivyara amajana abiri, n’iz’ amasuguru mirongwibiri,

¹⁵n’ ingamiya zonsa mirongwitatu n’ ivyana vyazo, n’inka mirongwine n’amapfizi cumi, n’indogoba zivyara mirongwibiri n’ivyana cumi.

¹⁶Abiha abantu biwe, ubusho bgose ukwabgo; arababarira, ati Ni munyītangire imbere mujabuke, kandi mugende muhānye inta hagati y’ubusho n’ubundi.

¹⁷Abgira uwa mbere, ati Mukurwanje Esau ni mwahūra, akakubaza, at’ Ur’ uwa nde, kand’ uja hehe? n’ ivyo ushoreye n’ivya nde?

¹⁸uheze umwishure, uti N’ivy’ umusavyi wawe Yakobo, n’indamukanyo akurungikiye, databuja Esau; uti Kandi na we nyene ar’ inyuma yacu.

¹⁹Maz’ abarira n’ uwa kabiri n’uwa gatatu kuno nyene, n’abashoreye ayo masho bose, at’ Ukw abe ari ko mubarira Esau, ni mwamubona:

²⁰kandi muvuge, muti Mbere n’umusavyi wawe Yakobo ar’ inyuma yacu. Kuko yiyumviriye, ati Reka ndamuhōyahōyeshe indamukanyo zinyītangiye imbere, mpeze mbone guseruka imbere yiwe: kumbure yondeka akampangaza.

²¹Nukw izo ndamukanyo zimwītangira imbere, ziragenda; ariko we arāra ngaho iryo joro ah’ abiwe bashagaje.

²²Avyuka mur’ iryo joro, ahitana abagore biwe bompi n’incoreke ziwe zompi n’abana biwe ukw ar’ icumi n’umwe, ajabuka icambu ca Yaboki.

²³Arabajana, abajabutsa uwo mugezi, ajabutsa n’ivyo yar’ afise vyose.

²⁴Maze Yakobo asigarayo wenyene. Haza umugabo, baranigana, bashitsa mu mutwenzi.

²⁵Uwo mugabo abonye yukw atamushoboye, akora ku mutsi wo ku nyonga y’itako ryiwe, umutsi wo ku nyonga y’itako rya Yakobo urahinyagara bakiriko baranigana.

²⁶Uwo mugabo aramubarira, ati Ndekura, kuk’ umutwenzi utambitse. Aramwishura, ati Sinkurekura, utampezagiye.

²⁷Na we aramubaza, ati Witwa nde? Ati Ndi Yakobo.

²⁸Aramubarira, ati Ntucitwa Yakobo ukundi, ariko wiswe Isirayeli;[38] kuko waniganye n’Imana n’abantu, ukanesha.

²⁹Yakobo aramubgira, ati Ndakwinginze, nyibarira. Aramubaza, at’ Umbariza iki izina ryanje? Amuhezagirira aho hantu.

³⁰Yakobo yita aho hantu Peniyeli:[39] ati Mbonye Imana imbonankubone, non’ ehe ndacariho!

³¹Izuba rirasa akirenga Peniyeli, agenda acumbagira itako ryiwe.

³²Ico ni co gituma Abisirayeli batarya umutsi w’ifyinga uri ku nyonga y’itako, na bugingo n’ubu; kuko wa mugabo yakoze ku mutsi wo ku nyonga y’itako rya Yakobo.