Read Bibliya Yera 1951 Itanguriro 34 Bible Online

Itanguriro 34 - Bibliya Yera 1951 bible

Itanguriro 34

¹Dina, umukobga Leya na Yakobo bavyaranye, aragenda aja kuramutsa abakobga bo mur’ ico gihugu.

²Maze mwene Hamori Umuhiwi, atwara ico gihugu, yitwa Shekemu, aramubona; aramufata, aramusindira, aryamana na we.

³Ahereza umutima kuri Dina mwene Yakobo; akunda uwo mwigeme, amubarira amagambo asosa.

⁴Shekemu abarira se Hamori, ati Nsabira uyu mukobga.

⁵Nuko Yakobo yumva yuko Shekemu yononye Dina umwana wiwe; arikw abahungu biwe bari mu musozi baragiye. Nuko Yakobo arihorera gushitsa baje.

⁶Maze Hamori se wa Shekemu aja kwa Yakobo ngo babonane.

⁷Bene Yakobo bumvise ivyabaye, bava iyo baragiye, barataha: kandi barababara, bararaka cane, kuko yakoze ikizira ku Bisirayeli, ni co kuryamana n’umukobga wa Yakobo, ar’ikidakwiye gukorwa.

⁸Hamori avugana na bo, at’ Umutima w’umwana wanje wazimiriye ku mukobga wanyu: ndabinginze, ni mumumuhe.

⁹Kandi mushingirane natwe: mudushingire abakobga banyu, namwe murongore abacu.

¹⁰Kandi mubane natwe, n’igihugu ngico, muraja aho mugomba; mukibemwo, mukidandazemwo, mwikūriremw’ amaronko.

¹¹Na Shekemu abarira se wa Dina na basaza be, ati Ni munkunde, munyemere, maz’ ico muncira cose ndakibaha.

¹²Inkwano mwoncira n’ingabire mwonsaba, uko biribungane kwose, ndabibaha uko mubinyatse: ariko mumpe uwo mwigeme.

¹³Bene Yakobo bishura Shekemu na se wiwe Hamori mu buryarya, kuko Shekemu yononye Dina mushiki wabo.

¹⁴Baramubgira, bati N’ikintu tutoshobora, gushingira mushiki wacu umuntu atākebge; kukw ico coba akamāramāza kuri twebge.

¹⁵Icobitwemeza n’iki kimwe gusa, n’uko mwoba nkatwe, umuntu wese muri mwebge agakebga;

¹⁶ni ho twobashingira abakobga bacu, tukarongora abanyu, tukabana namwe, tugahinduka ubgoko bumwe.

¹⁷Ariko ni mutatwumvira, ngo mukebge, tuzohitana umukobga wacu, twīgīre.

¹⁸Amajambo yabo anezereza Hamori na Shekemu umwana wiwe.

¹⁹Uwo muhungu ntiyatebagana kubikora, kuko yakunda umukobga wa Yakobo: kandi Shekemu yarubahwa gusumba abo mu nzu ya se bose.

²⁰Nuko Hamori n’ umwana wiwe Shekemu baja kw irembo ry’igisagara cabo, baja inama n’abagabo bo mur’ ico gisagara,

²¹bat’ Abo bantu n’abagwaneza; enda ni tubareke babe mu gihugu, bakidandazemwo; kukw igihugu cagutse, bagikwirwamwo; turongore abakobga babo, natwe tubashingire abacu.

²²Arikw icobemeza kubana natwe, no guhinduka ubgoko bumwe, n’iki kimwe gusa, n’uk’ umuntu wese muri twebge yokebga, nk’uko na bo bakebga.

²³Mbeg’ inka zabo n’ibintu vyabo n’ibiyevera vyabo vyose ntibizoba ivyacu? Mugabo tubemerere gusa, na bo babane natwe.

²⁴Abaca mw irembo ry’igisagara cabo bose bumvira Hamori n’umwana wiwe Shekemu; izinamuhungu wese arakebga, uwaca mw irembo ry’igisagara cabo wese.

²⁵Maze ku musi ugira gatatu, abo bagikanashijwe, bene Yakobo babiri, Simeyoni na Lewi, basaza ba Dina, bahitana inkota zabo, batera igisagara giturumbuka, bica abagabo baho bose.

²⁶Bicisha Hamori inkota, n’umuhungu wiwe Shekemu, bahitana Dina mu nzu ya Shekemu, bavayo.

²⁷Bene Yakobo bakoba imivyimba, basahura igisagara, babahōra kwonona mushiki wabo.

²⁸Banyaga imikuku yabo n’amasho yabo n’indogoba zabo, n’ivyari mu gisagara n’ivyari mu misozi;

²⁹banyaga ubutunzi bgabo bgose, bafata mpiri abana babo bose n’abagore babo, n’ivyari mu nzu vyose.

³⁰Maze Yakobo abarira Simeyoni na Lewi, ati Munkwegeye ibara, kuko mutumye nzinukwa na ben’ igihugu, Abanyakanani n’Abaferizi; kandi ko tur’ inkehwa, bazokwikoraniriza hamwe, bantere, mpeze ndanduke, ndanduranwe n’inzu yanje.

³¹Baramwishura, bati Mbega vyari bibereye kw agirira mushiki wacu artyo, nk’ aho yari maraya?