Read Bibliya Yera 1951 Itanguriro 35 Bible Online

Itanguriro 35 - Bibliya Yera 1951 bible

Itanguriro 35

¹Imana ibarira Yakobo, iti Va hasi, udūge i Beteli, ugerēreyo: unyubakire igicaniro, jewe Imana nakubonekeye igihe wahunga Esau mwene nyoko.

²Maze Yakobo aca abarira abiwe n’ abari kumwe na we bose, ati Ni mukūreh’ ibigirwamana vy’abanyamahanga biri muri mwebge, mwihumanure, mwambare izindi mpuzu:

³tuve hasi, tudūge, tuje i Beteli, nanje nubakirey’ Imana igicaniro, imwe yanyumvira ku musi w’ivyago vyanje, kandi yagendanye nanje mu nzira nagenzemwo zose.

⁴Baha Yakobo ibigirwamana vy’abanyamahanga vyose bari bafise, n’impeta zari ku matwi yabo; Yakobo abizīka musi y’ igiti citwa umweloni cari hafi y’i Shekemu.

⁵Nuko baragenda; Imana itera ubgoba ibisagara bibakikije, ntibakurikira bene Yakobo.

⁶Nuko Yakobo ashika i Luzi, ari ho Beteli, ho mu gihugu c’i Kanani, bo n’abantu bose bāri kumwe.

⁷Ahubaka igicaniro, yita aho hantu Eli‐beteli: kukw ari ho Imana yamwiyerekeye, igihe yahunga mukuru we.

⁸Kandi Debora, umurezi yari yarareze Rebeka arapfa; bamuhamba hepfo y’i Beteli, musi y’igiti citwa umweloni: bacita Aloni‐bakuti.[42]

⁹Igihe Yakobo yar’ agarutse avuyei Padan‐aramu, Imana yongeye kumwiyereka, iramuhezagira.

¹⁰Imana iramubarira, it’ Izina ryawe ryari Yakobo; ariko ntucitwa Yakobo ukundi, wiswe Isirayeli. Nukw imwita Isirayeli.

¹¹Imana iramubarira, iti Ni jewe Mana Ishobora vyose; urondoke, ugwire; ihanga rizogukomōkako, mbere n’igugu ry’amahanga, n’abami bazokomōka mu rura rwawe;

¹²kand’ igihugu nemeye ko mpaye Aburahamu na Isaka nzokiguha nawe, n’uruvyaro rwawe ruzogukurikira nzorugiha.

¹³Imana imusiga aho bivuganiye, iradūga.

¹⁴Yakobo ashinga inkingi y’ibuye ah’avuganiye na yo: ayisukakw ishikanwa ry’ibiturire, ayisukako n’amavuta ya elayo.

¹⁵Aho hantu Imana ivuganiye na we, Yakobo ahita Beteli.

¹⁶Bava i Beteli, baragenda; bari bashigaje akarere, bagashika muri Efurata, Rakeli araramukwa, aragumirwa.

¹⁷Maz’ akigumiwe, umwākirizi aramubarira, ati Nta co utinya, kuk’ uhava uvyara uwundi muhungu.

¹⁸Maz’ arikw aracīkāna, kuko yaciye ahwera, yita uwo mwana Benoni, ariko se amwita Benyamini.[43]

¹⁹Nuko Rakeli arapfa, bamuhamba ku nzira ija muri Efurata, ari ho Betelehemu.

²⁰Yakobo ashinga inkingi ku mva yiwe: ni yo nkingi y’imva ya Rakeli, ikiriho na bugingo n’ ubu.

²¹Isirayeli akomeza inzira, ashinga amahema hirya y’umunara wo muri Ederi.

²²Maze Isirayeli akiri mur’ ico gihugu, Reyubeni aragenda asambana na Biluha incoreke ya se: Isirayeli arabimenya. Nukw abahungu ba Yakobo bari cumi na babiri:

²³aba Leya ni Reyubeni imfura ya Yakobo, na Simeyoni, na Lewi, na Yuda, na Isakari, na Zebuloni;

²⁴aba Rakeli ni Yosefu na Benyamini;

²⁵aba Biluha incoreke ya Rakeli, ni Dani na Nafutali;

²⁶aba Zilupa incoreke ya Leya, ni Gadi na Asheri: abo ni bo bahungu ba Yakobo yavyariye i Padan‐aramu.

²⁷Yakobo ashika kwa se Isaka, i Mamure, i Kiriyati‐Araba, ari ho Heburoni, aho Aburahamu na Isaka bāba nk’abashitsi.

²⁸Imisi Isaka yamaze n’imyaka ijana na mirongumunani.

²⁹Isaka aracīkāna, apfa yisāziye neza, ageze mu zabukuru, ahamvya ababo: Esau na Yakobo abana biwe baramuhamba.