Read Bibliya Yera 1951 Itanguriro 37 Bible Online

Itanguriro 37 - Bibliya Yera 1951 bible

Itanguriro 37

¹Yakobo aba mu gihugu se yabayemw’ ar’ inyambukīra, ni co gihugu c’i Kanani.

²Ivy’ uruvyaro rwa Yakobo n’ibi. Yosefu, amaze imyaka cumi n’ indwi, yaragirana umukuku na bene se; kandi yar’ akir’ umwana kuri bene Biluha na bene Zilupa baka se: kandi yama abarira se inkuru z’ibibi bakora.

³Isirayeli yafyinisha Yosefu kuruta abana biwe bose, kuko yamuvyaye ashaje: amubarīriza umwambaro muremure w’amaboko.[44]

⁴Bene se babona yuko se amukunda kumubarutisha bose; baramwanka, ntibaba bakimubarira neza atar’ ukumuhirika.

⁵Yosefu arota inzozi, azirotorera bene se, barushiriza kumwanka.

⁶Arababarira, at’ Enda ni mwumve inzozi narose:

⁷narose dutekera imikama y’ingano, uwanje mukama uriyegura, urēma; maz’ iyanyu mikama iraza, ikikiza uwanje, irawunamira.

⁸Bene se baramubaza, bat’ Aho ni wewe uzotuganza? ni wewe uzodutwara? Izo nzozi ziwe n’ayo majambo yiwe bituma barushiriza kumwanka.

⁹Yongera kurota izindi nzozi, azirotorera bene se, ati Nongeye kurota izindi nzozi; narose izuba n’ ukwezi n’inyenyeri cumi n’imwe binyunamira.

¹⁰Azirotorera se na bene se. Se aramukankamira, at’ Izo nzozi n’inzozi ki? Aho jewe na nyoko na bakuru bawe tuzoza dukubite inkoro hasi imbere yawe?

¹¹Bene se bamugirira ishari, ariko se azigama ayo majambo mu mutima wiwe.

¹²Maze bene se baja kuragira umukuku wa se i Shekemu.

¹³Isirayeli abarira Yosefu, ati Harya bakuru bawe ntibaragiye umukuku i Shekemu? Enda ngwino ngutume kuri bo. Aramwishura, ati Ntuma.

¹⁴Aramubarira, ati Genda urābe ko bakuru bawe bar’ amahoro, n’umukuku k’ur’ amahoro, uheze ugaruke umbarire. Nukw aramutuma, ava mu kiyaya c’i Heburoni, ashika i Shekemu.

¹⁵Arikw arazimagirika ku misozi, bahūra bukwi na bukwi n’umugabo. Uwo mugabo aramubaza, at’ Urondera iki?

¹⁶Aramwishura, ati Ndondera abo tuvukana: ntabara undangire aho baragiye.

¹⁷Uwo mugabo aramwishura, ati Baravuye ino, kuko numvise bavugana, bati Tuje i Dotani. Nuko Yosefu akurikira bene se, abasanga i Dotani.

¹⁸Bamubona akiri kure, maz’ atarabashikīra, bamugīra inama yo kumwica.

¹⁹Baravugana, bati Nguriya karosi araje!

²⁰Ni muze tumwice, tumuterere mu rwobo rumwe mur’ ibi, duheze tuvuge, tut’ Igikōko c’inkazi caramuriye: tuze turābe inzozi ziwe uko zizoba!

²¹Reyubeni avyumvise, arondera uburyo bgo kumubakiza, arababgira, at’ Enda tureke kumwica.

²²Kand’ ati Ntimuvishe amaraso, ariko mumuterere mur’ uru rwobo rur’ aha mu bugaragwa, ariko ntimumukozekw amaboko. Kwar’ ukugira ngw amurokore, amukūre mu maboko yabo, amusubize se.

²³Maze Yosefu ashikiriye bene se, bamukiza wa mwambaro wiwe muremure w’amaboko yari yambaye,

²⁴baramukwega, bamuterera muri rwa rwobo rwimbiwe kubikamw’ amazi; ariko rwari gusa, nta mazi yarimwo.

²⁵Baraheza baricara ngo barye; bunamuye amaso babona igugu ry’Abishimayeli bavuye i Gileyadi, bari n’ingamiya zīremētse imibavu n’imiti yo gusomōra n’isenga, babimanukana muri Egiputa.

²⁶Yuda abarira abo bavukana, ati Vyotumarira iki kwica mwene data, no kumuzimanganya?

²⁷Enda ni muze tumugure na barya Bishimayeli, amaboko yacu yoye kumukorako, kukw ari mwene data, tukaba akara kamwe. Baca baramwumvira.

²⁸Hahita Abamidiyani b’abadandaza; bakwega Yosefu, bamukūra muri rwa rwobo, bamugura na ba Bishimayeli amahera y’ifeza mirongwibiri. Bashōra Yosefu muri Egiputa.

²⁹Reyubeni agaruka kuri rwa rwobe, asanga Yosefu atarimwo; yitantamurirakw impuzu ziwe.

³⁰Asubira kuri barumuna be, at’ Umwana ntakiriyo; none jeho ndakwirwa hehe?

³¹Bābīra wa mwambaro wa Yosefu, babāga isuguru y’impene, bawujobeka mu maraso yayo;

³²barungikira se wa mwambaro muremure w’amaboko, bamutumako, bat’ Uwo mwambaro twarawutoye: rāba ko woba uw’ umwana wawe, canke kw atari wo.

³³Arawumenya, aravuga, ati N’umwambaro w’umwana wanje! Igikōko c’inkazi caramuriye! Yosefu yaratabaguwe, nta kindi!

³⁴Yakobo yitantamurirakw impuzu ziwe, akenyera amagunira, amara imisi myinshi agandariye umwana wiwe.

³⁵Abahungu biwe bose n’abakobga biwe bose baza kumwirura; ariko yanka kwirurwa; ati Nzorinda mpamvya umwana wanje i kuzimu nkirira. Nuko se amuririra artyo.

³⁶Ba Bamidiyani, bashikanye Yosefu muri Egiputa, bamugura na Potifari, umugendanyi wa Farawo, yaganza abamushibamira.