Read Bibliya Yera 1951 Itanguriro 38 Bible Online

Itanguriro 38 - Bibliya Yera 1951 bible

Itanguriro 38

¹Mur’ iyo misi Yuda avana n’abo bavukana, aramanuka, asembera ku Munyadulamu yitwa Hira.

²Yuda abonay’ umukobga wa Shuwa Umunyakanani; aramujana, aramurongora.

³Asama inda, avyara umuhungu, amwita Eri.

⁴Asama inda y’ubuheta, avyara umuhungu, amwita Onani.

⁵Yongera kuvyara uwundi muhungu, amwita Shela; kand’ uyo yamuvyaye Yuda ar’ i Kezibu.

⁶Yuda asabira imfura yiwe Eri umugeni yitwa Tamari.

⁷Eri, imfura ya Yuda, yar’ umunyavyaha mu nyonga z’Uhoraho; nuk’ Uhoraho aramwica.

⁸Yuda abarira Onani, ati Cūra umugoranyu, umugirire nk’uko bibereye muramu w’umuntu, uhonore mwene nyoko.

⁹Onani amenya yuk’ umwana atazoba uwiwe; nukw iy’ aryamanye n’umugorabo, akarekurira hasi intanga, kugira ngo ntahonore mwene nyina.

¹⁰Ico kintu yakoze cari kibi mu nyonga z’Uhoraho, na we nyene aramwica.

¹¹Maze Yuda abarira Tamari umukazana wiwe, ati Genda ube uragumye kwa so ur’ umupfakazi, ushitse ah’ umwana wanje Shela azokurira: kuko yivuganya, at’ Uyo na we ntahave apfa nka bene nyina. Tamari aragenda aguma kwa se.

¹²Haciye igihe, muka Yuda arapfa, umukobga wa Shuwa. Yuda amaze kuganduka, aradūga aja i Timuna, ku bamukemurira intama, ari kumwe n’umugenzi wiwe Hira Umunyadulamu.

¹³Babarira Tamari, bati Sobukwe aradūze, agiye i Timuna gukemuza intama ziwe.

¹⁴Yiyambura imyambaro y’ubupfakazi, yitwikira umwitwikiro wiwe, yipfuka mu maso, aja kwicara kw irembo ry’igisagara Enayimu, ku nzira ija i Timuna; kuko yabonye ko Shela amaze gukura, ntibamumuha ngw amucūre.

¹⁵Yuda amubonye, agira ngo ni maraya, kuko yari yitwikiriye mu maso.

¹⁶Akebereza ah’ ari i ruhande y’inzira, ati Ndakwinginze, n’umpe turyamane: kukw atāmenye kw ar’umukazana wiwe. Aramwishura, ati Ni naguha ngo turyamane, urampēra iki?

¹⁷Aramwishura, ati Ndakurungikira isuguru y’impene nkūye mu mukuku. Aramubaza, at’ Urampa ingwati, kugeza ah’ uzoyirungikira?

¹⁸Na we aramubaza, at’ Ugomba ko ndaguha ingwati ki? Aramwishura, ati Mpa impeta yawe irikw ikimenyetso, hamwe n’umugozi wayo, n’iyo nkoni witwaje. Arabimuha, bararyamana, amutera inda.

¹⁹Tamari aca ava hasi, arīgīra, yiyambura wa mwitwikiro, yambara imyambaro yiwe y’ubupfakazi.

²⁰Yuda arungikana wa mugenzi wiwe w’Umunyadulamu ya suguru y’impene, kugira ngw acungure za ngwati kuri wa mugore: arikw aramubura.

²¹Aca abaza abagabo b’aho hantu, ati Maraya ari hehe, yar’i ruhande y’ inzira ya Enayimu? Baramwishura, bati Nta maraya yigeze ino.

²²Asubira kuri Yuda, aramubgira, ati Nta we nabonye, kandi n’abagabo baho bampakaniye, ngo Nta maraya yigezeyo.

²³Yuda aramwishura, ati N’abitware! Enda tureke kwiyambika ibara: rāba namurungikiye ya suguru, ntiwamubona.

²⁴Hahise amezi nk’atatu, babarira Yuda, bati Tamari umukazana wawe yarasambanye, mber’ afise n’inda. Yuda arababgira, ati Ni mugende mumusohokane, mumute mu muriro.

²⁵Bakimusohokana, atuma kuri sebukwe, ati Nyen’ ibi bintu ni we yanteye inda; kand’ ati Ndakwinginze, itegereze ivyo, inavyo uw’ari we: iyo mpeta irikw ikimenyetso, n’imigozi yayo, n’iyo nkoni.

²⁶Yuda yemera kw ar’ ivyiwe, at’ Arantsinze, kuko ntamuhaye Shela umwana wanje. Nuko Yuda ntiyongera kumwegera ukundi.

²⁷Maz’ igihe ciwe co kuvyara kigeze, inda yiwe yar’ amahasa.

²⁸Ari ku rwahi, umwe atangura kuzana igikonjo; umwākirizi aragifata, akizingirakw akanyuzi gasa n’agahama, at’ Uyu ni we Bukuru.

²⁹Igikonjo ciwe citeye, uwar’ inyuma aravuka: umwākirizi aravuga, ati N’iki gitumye wīcīra icuho? Ni co catumye bamwita Peresi.[45]

³⁰Hanyuma mugenzi we aravuka, afise rwa runyuzi rusa n’agahama ku gikonjo: bamwita Zera.