Read Bibliya Yera 1951 Itanguriro 39 Bible Online

Itanguriro 39 - Bibliya Yera 1951 bible

Itanguriro 39

¹Yosefu bamumanukana muri Egiputa; maze Potifari, Umunyegiputa, umugendanyi wa Farawo, yaganza abamushibamira, amugura n’Abishimayeli bamumanukanyeyo.

²Uhoraho abana na Yosefu, bituma aroranirwa; aba mu rugo rwa shebuja Umunyegiputa.

³Shebuja abona yuk’ Uhoraho ari kumwe na we, kandi k’Uhoraho yamuhaye kugira ikiganza ciza ku co akoze cose.

⁴Yosefu atona kuri we, aba ingendanyi yiwe; maz’ amuhindura umubgiriza wo mu rugo rwiwe, amuzeza ivy’ afise vyose.

⁵Maz’ uhereye igihe yamugize umubgiriza wo mu rugo rwiwe, akamuzeza ivy’ afise vyose, Uhoraho aca aha umugisha urugo rw’uwo Munyegiputa, kubga Yosefu; umugisha w’Uhoraho uba ku vyo yar’ afise vyose, vyo mu rugo n’ivyo mu ndimiro.

⁶Yegurira Yosefu ivyo yar’ afise vyose; ntiyagira ikindi yibaza, atar’ ivy’ arya gusa. Kandi Yosefu yari mwiza w’umunyakaranga.

⁷Hanyuma y’ivyo, inabuja agomwa Yosefu, aramubgira, ati Ngo turyamane.

⁸Maz’ ariyankira, yishura inabuja, at’ Erega databuja nta co yibazako ku vyo ngaba vyo mu rugo, mbere yanjeje ivy’ afise vyose;

⁹nta wunduta mur’ uru rugo, kandi nta co yisigarije ngw akinyime atari wewe, kuk’ ur’ umugore wiwe: none noshobora nte gukora icaha kingana girtyo, ngacumura ku Mana?

¹⁰Akama abibgira Yosefu uko bukeye, na we ntamwumvire, ngw aryamane na we, canke ngw agumane na we.

¹¹Umusi ur’ izina yinjira mu nzu gukora igikorwa ciwe, ata bandi bagabo bo mur’ urwo rugo bari mu nzu.

¹²Uwo mugore asūmira impuzu yiwe, aramubgira, ati Ngo turyamane. Amutana impuzu yiwe, arahunga, arasohoka.

¹³Maz’ abonye kw amutanye impuzu yiwe agahunga agasohoka,

¹⁴atabaza abagabo b’abanyarugo, arababarira, at’ Ehe rāba yatuzaniye Umuheburayo wo kudukēngēra! Yaje iyo ndi ngw aryamane nanje, ndaheza ntabaza n’ijwi rirenga:

¹⁵maz’ abonye nshize ijwi hejuru ntabaje, antana impuzu yiwe, arahunga, arasohoka.

¹⁶Arekera iyo mpuzu i ruhande yiwe, gushitsa aho shebuja wa Yosefu atahiye.

¹⁷Maz’ amubgira amagambo amwe n’ayo, ati Wa mugurano w’ Umuheburayo watuzanira yazanywe iyo ndi n’agakēngērwe.

¹⁸Maze nanje nshize ijwi hejuru ntabaje, antana impuzu yiwe, arahunga, arasohoka.

¹⁹Maze shebuja yumvise amagambo umugore wiwe amubariye, y’ingen’ uwo mugurano wiwe yamugiriye, uburake bgiwe buraziriringa.

²⁰Nuko shebuja wa Yosefu aramufata, amushira mw ibohero, aho bārindira abo umwami aboshe: nukw aba ngaho mu nzu y’imbohe.

²¹Arik’ Uhoraho aba kumwe na Yosefu, amugirira neza, amuha gutona ku murinzi w’ibohero.

²²Uwo murinzi aha Yosefu kugaba imbohe zose zari mur’ iryo bohero; ivyo bākorayo vyose, ni we yabikoresha.

²³Umurinzi w’ ibohero ntiyagira ikintu yibaza ku vyo yamushikirije, kuk’ Uhoraho yari kumwe na we; kand’ Uhoraho amuha kugira ikiganza ciza ku co akoze cose.