Read Bibliya Yera 1951 Itanguriro 4 Bible Online

Itanguriro 4 - Bibliya Yera 1951 bible

Itanguriro 4

¹Kand’ uwo mugabo abana na Eva umugore wiwe; nukw asama inda, avyara Kayini, aravuga, ati Ndonse umuhungu kubg’ Uhoraho.

²Asubizako, avyara murumuna we Abeli. Abeli aba umwungere w’intama, Kayini aba umurimyi.

³Igihe kiragera, Kayini azana ishikanwa ku vyeze mu ndimiro, ngw abishikanire Uhoraho.

⁴Abeli na we azana ku ntungwa z’uburiza zo mu mukuku wiwe, no ku binure vyazo. Uhoraho yākīrira Abeli ishikanwa ryiwe,

⁵ariko ntiyākīrira Kayini ishikanwa ryiwe. Maze Kayini araraka cane, mu maso hiwe harijirwa.

⁶Uhoraho abaza Kayini, ati N’iki kikurakije, kandi n’iki gitumye wijiriwe mu maso?

⁷Ni wakora neza ntuzokwemerwa? ariko n’utākora neza, icaha kibunze ku rugi: kandi ni wewe cifuza, arik’ ukwiye kukinesha.

⁸Nuko Kayini abarira Abeli murumuna we, ati Ngo dusohoke tuje mu gahinga.[6] Maze bari mu gahinga, Kayini agurukira kuri Abeli murumuna we, aramwica.

⁹Uhoraho abaza Kayini, ati Abeli murumunawe ari hehe? Aramwishura, ati Ndabizi? Nar’ umwungere wa murumunanje?

¹⁰Na we aramubaza, at’ Ico wakoze ico n’igiki? Ijwi ry’amaraso ya murumunawe ririko rirantakambirira kw isi.

¹¹Uhereye none ubaye ikivume, ugerewe kuyerēra kure y’aho hantu hasamitse akanwa kaho kwākīra amaraso ya murumunawe ukuboko kwawe kwavishije.

¹²Kuva ubu ni warima isi ntizogira ico ikumerera; uzogenda urāraguza, ur’ inyererezi mw isi.

¹³Kayini abgira Uhoraho, at’ Igihano umpaye kirenze ico nokwihanganira.

¹⁴Rāba, uyu musi unyirukanye kw isi, nshiburiwe kure yo mu nyonga hawe; nzogenda ndāraguza, nd’ inyererezi mw isi, kand’ ūzombona wese azonyica.

¹⁵Uhoraho aramwishura, ati Ni co gituma uwokwica Kayini azobihanirwa kurenza we ibihetangabo ndwi. Uhoraho ashira ikimenyetso kuri Kayini, kugira ng’ ūzomubona ntamwice.

¹⁶Nuko Kayini ava imbere y’Uhoraho, aba mu gihugu c’i Nodi, ku ruhande rwa Edeni ahahera i burasirazuba.

¹⁷Maze Kayini abana n’umugore wiwe, asama inda, avyara Henoki, yubaka igisagara, acita Henoki, acitiranije n’ umwana wiwe.

¹⁸Henoki avyara Iradi: Iradi avyara Mehuyayeli: Mehuyayeli avyara Metushayeli: Metushayeli avyara Lameki.

¹⁹Lameki yābīra abagore babiri: umwe yitwa Ada uwundi Zila.

²⁰Ada avyara Yabalu, ni we sekuruza w’abungere b’inka bagenda baba mu mahema.

²¹Murumuna we yitwa Yubalu, ni we sekuruza w’abavuzi b’inanga n’imyironge.

²²Zila na we avyara Tubali‐Kayini, umucuzi w’ikintu cose c’ubugi kiva mu miringa no mu vyuma. Mushiki wa Tubali‐Kayini ni Nayama.

²³Lameki abarira abagore biwe, at’ Ewe Ada na Zila, ni munyumve, Bagore ba Lameki, ni mwumvirize amajambo yanje! Kuko nishe umugabo ndamwihōye uruguma ankomerekeje, N’umusore ndamwihōye igipfupfuri.

²⁴Asangwa uwokwishe Kayini yobihaniwe ibihetangabo ndwi, N’ukuri uwokwica Lameki yobihanirwa ibihetangabo mirongwirindwi n’indwi!

²⁵Adamu yongera kubana n’ umugore wiwe, avyara umuhungu, amwita Seti, ati Kukw Imana inshumbushije urundi ruvyaro mu gishingo ca Abeli, kuko Kayini yamwishe.

²⁶Seti na we arahava avyara umuhungu, amwita Enoshi: ico gihe abantu ni ho batanguriye kwambaza izina ry’Uhoraho.