Read Bibliya Yera 1951 Itanguriro 40 Bible Online

Itanguriro 40 - Bibliya Yera 1951 bible

Itanguriro 40

¹Hanyuma y’ivyo, umukevyi ahēreza igiturire umwami wa Egiputa, n’umusukūzi wiwe bacumura kuri shebuja, umwami wa Egiputa.

²Farawo arakira abo banyarugo biwe bompi, umukevyi mukuru n’umusukūzi mukuru.

³Abashirisha mw ibohero ryari mu rugo rw’uwaganza abashibamyi, aho Yosefu yar’ arindiwe.

⁴Uwaganza abashibamyi b’umwami abahēreza Yosefu, na we arabakorera. Bamaze igihe bari mw ibohero,

⁵wa mukevyi w’umwami wa Egiputa na wa musukūzi wiwe, barindiwe mur’ iryo bohero, bompi barotera ijoro rimwe, umwe iziwe uwundi iziwe, zigasobanurwa zimwe ukwazo izindi ukwazo.

⁶Maze mu gitondo Yosefu yinjira aho bari; abarāvye, abona bajonjogoye.

⁷Abaza abo banyarugo ba Farawo barindanywe mw ibohero ryo mu rugo rwa shebuja wiwe, ati Mbeg’ uyu musi ko mujonjogoye n’iki?

⁸Baramwishura, bati N’uko twarose inzozi, kand’ akaba ata wushobora kuzidusobanurira. Yosefu arabishura, ati Mbeg’ Imana si yo Nyene gusobanura? Enda ni muzindotorere.

⁹Umukevyi mukuru arotorera Yosefu inzozi ziwe, ati Narose mbona umuzabibu imbere yanje,

¹⁰kand’ uwo muzabibu war’ ufise amashami atatu: mbona usa n’ūpfunditse, usambura amashurwe, amahando yawo arahishira;

¹¹maz’ igikombe ca Farawo nari ngifise mu minwe, nuko nābīra izo nzabibu, nzikānyira muri co, ndaheza ngihēreza Farawo.

¹²Yosefu aramubarira, at’ Uku ni ko zisobanurwa: ayo mashami atatu n’imisi itatu;

¹³imisi itatu itarashira Farawo azokubohora, agusubize kw ibango ryawe: kand’ uzohēreza Farawo igikombe nk’uko wahora ukora ur’umukevyi wiwe.

¹⁴Maz’ uz’ unyibuke, ni wamara kumererwa neza, uz’ untabare, ndakwinginze, umvugire kuri Farawo, unkūze mur’ iyi nzu.

¹⁵Kuko nasahuwe, nkūwe mu gihugu c’Abaheburayo: n’ino na ho nta caha nakoze cotumye banshira mur’ iri bohero.

¹⁶Wa musukūzi mukuru abonye kw amusobanuriye ivyiza, abarira Yosefu, ati Nanje narose nikoreye intimbiri zitatu z’imitsima y’ifu igogōretse;

¹⁷kand’ intimbiri yo hejuru y’izindi yarimw’ ivyo kurya bikaranze vy’uburyo bgose nshīra Farawo; maz’ ibisīga bibindīra ku mutwe, mur’ iyo ntimbiri.

¹⁸Yosefu aramwishura, at’ Uku ni ko zisobanurwa: izo ntimbiri zitatu n’imisi itatu;

¹⁹imisi itatu itarashira, Farawo azokubohora akumanike, ibisīga bikugabangane.

²⁰Ku musi ugira gatatu, ari wo musi wo kwibuka ukuvuka kwa Farawo, atumirira amazimano abamenyekana biwe bose; araheza abohora wa mukevyi mukuru na wa musukūzi mukuru hagati y’abo bamenyekana.

²¹Asubiza umukevyi mukuru mw ibango ryiwe, ahēreza Farawo igikombe;

²²maz’ amanika wa musukūzi mukuru, nk’uko Yosefu yabasobanuriye inzozi zabo.

²³Ariko wa mukevyi mukuru ntiyaruha yibuka Yosefu: aramwibagira.