Read Bibliya Yera 1951 Itanguriro 41 Bible Online

Itanguriro 41 - Bibliya Yera 1951 bible

Itanguriro 41

¹Hahise imyaka ibiri yiramvuriye, Farawo arota ahagaze i ruhande y’uruzi.

²Agize artya abona mu ruzi havuye inka ndwi z’inyambo zivyibushe; zirisha mu rufunzo.

³Maz’ izindi nka ndwi zinanutse z’umwaku ziva mu ruzi, zirazikurikira; zihagararana na za zindi ku nkombe y’uruzi.

⁴Maze za nka zinanutse z’ umwaku zirya za zindi z’inyambo zivyibushe, ukw ari ndwi. Farawo araheza aribambura.

⁵Arongera aribikira, arota inzozi za kabiri; agize artya, abona imihuruhumbi ndwi y’ingano imeze ku giti kimwe, zitunungutse, nziza.

⁶Maze mu nyuma zayo haca hamera iyindi mihuruhumbi ndwi y’ibihumbirane, yumishijwe n’umuyaga uvuye i burasirazuba.

⁷Iyo mihuruhumbi y’ibihumbirane iyongobeza ya mihuruhumbi itunungutse itengengeye, ukw ari ndwi. Nuko Farawo aribambura, amenya kw ar’ inzozi.

⁸Bukeye, ahagarika umutima, atuma guhamagaza abanyamareba bose bo muri Egiputa n’abanyabgenge baho bose: Farawo abarotorera inzozi ziwe: ariko ntihagira ūshobora kuzimusobanurira.

⁹Maze wa mukevyi mukuru abarira Farawo, at’ Uyu musi nibutse ivyaha vyanje!

¹⁰Ca gihe waturakira, twebge abasavyi bawe, ga Nyaguhora ku ngoma, ukanshirisha mw ibohero ryo mu rugo rw’ ūganza abashibamyi, twe n’umusukūzi mukuru;

¹¹nuko twaroteye ijoro rimwe twempi; turota inzozi zisobanurwa kubiri.

¹²Twari kumwe n’umuhungu w’Umuheburayo aho hantu, umugurano w’ūganza abashibamyi; tumurotorera inzozi zacu, arazidusobanurira; nk’uko twazirose, azidusobanurira, umwe ukwiwe uwundi ukwiwe.

¹³Kand’ uko yazidusobanuriye ni ko vyashitse: jewe nashubijwe kw ibango ryanje, uwundi na we aramanikwa.

¹⁴Maze Farawo atuma guhamagaza Yosefu, bamuturumbura mw ibohero n’ingoga, arimosha, yambara izindi mpuzu, arenguka kwa Farawo.

¹⁵Farawo abarira Yosefu, ati Narose inzozi, none nta wushobora kuzinsobanurira: maze numvise bavuga ko wewe, bakurotorera inzozi gusa, ugashobora kuzisobanura.

¹⁶Yosefu yishura Farawo, ati Si jewe mbishobora, Nyaguhora ku ngoma, Imana ni yo ija kukwishura ivy’amahoro.

¹⁷Nuko Farawo abarira Yosefu, ati Narose mpagaze ku nkombe y’uruzi:

¹⁸ngize ntya mbona mu ruzi havamw’ inka ndwi z’inyambo zivyibushe, zirisha mu rufunzo;

¹⁹maze zikurikirwa n’ izindi nka ndwi mbi‐mbi, zinanutse z’umwaku rwose; sinaribgabone inka zinganya ububi n’izo mu gihugu cose ca Egiputa.

²⁰Izo nka zinanutse z’umwaku zirya za nka zivyibushe zabanje, ukw ari ndwi;

²¹zimaze kuzirya, ntiwomengo zaziriye, zikomeza kuba umwaku kwa kundi. Nuko ndikangura.

²²Kandi nongera kurota, mbona imihuruhumbi ndwi y’ingano imeze ku giti kimwe, zitengengeye nziza;

²³maze mu nyuma zayo haca hamera iyindi mihuruhumbi ndwi ikabiranye y’ibihumbirane, yumishijwe n’umuyaga uvuye i burasirazuba:

²⁴iyo mihuruhumbi y’ibihumbirane iyongobeza ya mihuruhumbi myiza, ukw ari ndwi. Maze nzirotorera abanyamareba, ariko ntihagira ūshobora kuzinsobanurira.

²⁵Yosefu abarira Farawo, at’ Inzozi zawe ni zimwe, Nyaguhora ku ngoma: ivyo Imana igira ikore yabikumenyesheje.

²⁶Za nka ndwi nziza n’imyaka ndwi, na ya mihuruhumbi myiza n’imyaka ndwi nyene: inzozi ni zimwe.

²⁷Na za nka zinanutse z’umwaku zazikurikiye n’imyaka ndwi, na ya mihuruhumbi ndwi y’imishīshi yumishijwe n’umuyaga uvuye i burasirazuba, na yo n’uko: izoba imyaka ndwi y’ikigoyi.

²⁸Ico ni co nakubariye, Nyaguhora ku ngoma, nt’ Ivyo Imana igira ikore yabikumenyesheje.

²⁹Hazoba imyaka ndwi y’uburumbuke bginshi mu gihugu ca Egiputa iyo kiva kikagera:

³⁰hanyuma hazokurikirakw imyaka ndwi y’ikigoyi, ubgo burumbuke bgose bgibagirane mu gihugu ca Egiputa; ico kigoyi kizokumba igihugu;

³¹ubgo burumbuke ntibuzoba bucibukwa, kubg’ ikigoyi kibukurikiye: kuko kizoba ari cinshi cane.

³²Kand’ icatumye urota izo nzozi kabiri n’ukw ivyo vyashinzwe n’ Imana, kand’ izobishitsa vuba.

³³Nuko rero Nyaguhora ku ngoma, n’urondere umuntu w’umunyabgenge w’umuhanga, umuhe ubutware mu gihugu ca Egiputa.

³⁴Kandi mugenzi, ushireho n’ abimburisha, bimburishe ikigira gatanu c’ivyera mu gihugu ca Egiputa, mur’ iyo myaka y’uburumbuke ukw ari ndwi.

³⁵Bakoranye ivyo vyimburwa vyose vy’iyo myaka myiza igiye kuza, babungabunge mu bisagara imihure y’ impeke yo gutunga abantu, bayibike, igabge nawe, Nyaguhora ku ngoma.

³⁶Kand’ izo ndya zizobera igihugu ibiziganirijwe iyo myaka ndwi y’ikigoyi kizotera mu gihugu ca Egiputa, kugira ngw igihugu coye guhona kubg’ ikigoyi.

³⁷Iyo nama ishimwa na Farawo n’abishikira biwe bose.

³⁸Farawo abaza abo bishikira biwe, ati Twobona hehe umuntu ameze nk’ uyu, arimw’ impwemu y’Imana?

³⁹Farawo abarira Yosefu, ati Kw Imana ikweretse ivyo vyose, nta wundi munyabgenge w’umuhanga muhwanye;

⁴⁰nguhaye kugaba urugo rwanje, kand’ abantu banje bose baze bumvire ico uzovuga: ku ngoma yanje yonyene ni ho nzogusumba.

⁴¹Kandi Farawo yungamw’ abarira Yosefu, ati Rāba nguhaye kugaba igihugu cose ca Egiputa.

⁴²Nuko Farawo aca yiyambura impeta irikw ikimenyetso, yo ku rutoke rwiwe, ayambika Yosefu ku rutoke, amwambika impuzu zera nziza, amwambika n’umugufu w’izahabu mw izosi,

⁴³amuha kugendagendera mu mukogote wa kabiri ku wiwe; bakagenda barasemererera imbere yiwe, bati Ni mumupfukamire! Nukw amuha kugaba igihugu cose ca Egiputa.

⁴⁴Farawo abarira Yosefu, ati Jewe Farawo ndabivuze: nta wuzotaramura ukuboko canke ngw ashingure ikirenge mu gihugu cose ca Egiputa, utavyemeye.

⁴⁵Farawo yita Yosefu irindi zina, Safenati‐paneya: amushingira Asenati mwene Potifera, umuherezi wo mu gisagara Oni. Yosefu araheza agendagenda igihugu ca Egiputa.

⁴⁶Yosefu yar’ amaze imyaka mirongwitatu igihe yarenguka imbere ya Farawo. Nukw arijura, ava imbere ya Farawo, agendagenda igihugu cose ca Egiputa.

⁴⁷Maze mu myaka y’uburumbuke, ukw ari ndwi, igihugu kirera, gisegenyura ivyo kurya.

⁴⁸Akoranya imyimbu yose yo mur’ iyo myaka ndwi y’uburumbuke yo mu gihugu ca Egiputa, ayimburira mu bisagara: kand’ imirima ikikije igisagara cose akayimburira muri co.

⁴⁹Nuko Yosefu abīka imihure y’impeke y’isinzi, nk’umusenyi wo ku kiyaga, gushitsa aho yarekeye guharūra, kuko bitari bigiharūrika.

⁵⁰Yosefu avyara abahungu babiri ikigoyi kitaratera, abavyara kuri Asenati mwene Potifera umuherezi wo mu gisagara Oni.

⁵¹Yosefu uw’imfura amwita Manase,[46] ati Kukw Imana yanyibagije ubutame bganje bgose n’abo mu nzu ya data bose.

⁵²Uwa kabiri amwita Efurayimu,[47] ati Kukw Imana yampaye kurondokera mu gihugu nagorewemwo.

⁵³Nuko ya myaka ndwi y’uburumbuke bgabaye mu gihugu ca Egiputa irarangira.

⁵⁴Ya myaka ndwi y’ikigoyi itangura gushirako, nk’uko Yosefu yavuze: ikigoyi gitera mu bihugu vyose, ariko mu gihugu cose ca Egiputa ho hār’ ivyo kurya.

⁵⁵Maz’ igihe igihugu cose ca Egiputa gitewe n’ inzara, abantu batakambira Farawo ngw abahe ivyo barya. Farawo abarira Abanyegiputa bose, ati Ni muje kuri Yosefu: ico ababarira mugikore.

⁵⁶Ikigoyi gisāngānya isi yose: maze Yosefu yugurura ibigega vyose, agurira Abanyegiputa; ikigoyi kirushiriza kuba cinshi mu gihugu ca Egiputa.

⁵⁷Abo mu bihugu vyose baja muri Egiputa kuri Yosefu gusuma imihure y’impeke, kukw ikigoyi cari cinshi mw isi yose.