Read Bibliya Yera 1951 Itanguriro 42 Bible Online

Itanguriro 42 - Bibliya Yera 1951 bible

Itanguriro 42

¹Maze Yakobo yumva ko muri Egiputa har’ amasumo; abaza abana biwe, ati N’iki gituma murābana?

²Kand’ ati Numvise yuko muri Egiputa har’ amasumo: enda ni mumanuke mujeyo, mudusumire, kugira ngo tubeho, twoye gupfa.

³Bene se ba Yosefu ukw ari cumi baramanuka, baja gusuma imihure y’impeke muri Egiputa.

⁴Ariko Benyamini, mwene nyina wa Yosefu, Yakobo ntiyamutumana na bakuru be, kuko yiyumvira, ati Kumbure yogira ic’ aba.

⁵Nuko bene Isirayeli bajana n’ abandi gusuma, kuko kigoyi cāteye mu gihugu c’i Kanani.

⁶Kandi Yosefu yari yagizwe segaba w’igihugu ca Egiputa; ni we yasumira abo mur’ ico gihugu bose; nuko bene se ba Yosefu baraza, bakubita inkoro hasi, baramwunamira.

⁷Maze Yosefu abonye bene se arabamenya, yihindura nka murundi kuri bo, abatera imirarwe, ati Muva hehe? Baramwishura, bati Tuva mu gihugu c’i Kanani tuje gusuma.

⁸Yosefu amenya bene se, ariko bo ntibamumenya.

⁹Maze Yosefu yibuka za nzozi yarose kuri bo, arababarira, ati Mur’ abatasi! Muje kurāba ah’ igihugu coroshe!

¹⁰Baramwishura, bati Haba na mba, mugenzi: abasavyi bawe twangajwe no gusuma.

¹¹Twese tuvuka kur’ umwe; tur’ abanyakuri, abasavyi bawe ntitur’ abatasi na gatoya.

¹²Arabishura, ati Na mba! Kurāba ah’ igihugu coroshe ni co kibazanye.

¹³Baramwishura, bati Twebge abasavyi bawe twavukana tur’ icumi na babiri, tur’ ab’umuntu umwe wo mu gihugu c’i Kanani; umuhererezi yasigaranye na data, uwundi na we ntakiriho.

¹⁴Yosefu arabishura, at’ Aho rero, sinavuze ko mur’ abatasi?

¹⁵Iki ni co kizobeza: ndabarahiye Farawo mukazova ino umuhererezi wanyu adashitse aha!

¹⁶Ni mutume umwe muri mwebge, agende azane murumuna wanyu, namwe musigare mur’ imbohe, kugira ngw amagambo yanyu aseruke kw ar’ay’ ukuri: biramutse bitabaye birtyo, muzoba mur’ abatasi, ndabarahiye Farawo!

¹⁷Bose abamaza gatatu mw ibohero.

¹⁸Ku musi ugira gatatu, Yosefu arababarira, at’ Enda genza murtya, mwoye gupfa, kuko ntinya Imana:

¹⁹namba mur’ abanyakuri, umwe muri mwebge asigare hano mw ibohero; abandi mugende, mujane imihure y’impeke yo kubamara inzara mu ngo zanyu:

²⁰muheze munzanire umuhererezi wanyu; ni ho amagambo yanyu azomenyekana kw ar’ay’ ukuri, bikabakiza ntimupfe. Baca bagenza bartyo.

²¹Maze baravugana, bati Turikw inkurikizi ya murumuna wacu, s’ikindi, kuko twabonye intuntu yar’ afise mu mutima, hamwe yatwinginga, tukanka kumwumviriza; ni vyo bituzaniye ibi vyago.

²²Maze Reyubeni arababgira, ati Sinababariye, nti Ntimugire ico mugira uwo mwana, mukanka kunyumvira? ni co gitumye amaraso yiwe aturondererwako.

²³Ariko ntibamenya ko Yosefu abumva, kuko yasobanurirwa n’uwundi.

²⁴Arora irya, ararira; araheza agaruka kuri bo, arabasigurira, abakūramwo Simeyoni, amubohera mu maso yabo.

²⁵Maze Yosefu agera ko babuzuriza impeke amagunira yabo, kandi ngo basubize amahera y’umuntu wese mw igunira ryiwe, kandi ngo babahe n’impamba: babagirira bartyo.

²⁶Baremēka indogoba zabo izo mpeke, bavayo baragenda.

²⁷Maz’ aho barāye, umwe muri bo ahamburuye igunira ryiwe ngw agaburire indogoba yiwe, abona ya mahera yiwe, ari mu munwa w’igunira.

²⁸Abarira bagenzi biwe, at’ Amahera yanje aragarutse! Eh’ ari mw igunira ryanje! Baranduka imitima, barābana bahinda agashitsi, bat’ Ibi n’ibiki, Imana itugiriye?

²⁹Bashitse i muhira kwa se Yakobo, mu gihugu c’i Kanani, bamudōndera ivyababayeko vyose,

³⁰bat’ Umugabo aganza ico gihugu yatubariye adutera imirarwe, atugirira nk’aho tur’ abatasi batata igihugu.

³¹Turamubarira, tuti Tur’ abanyakuri, ntitugira gutata na gatoya.

³²Tuti Twavukana tur’icumi na babiri, dusangiye data umwe; tut’ Umwe ntakiriho, umuhererezi na we yasigaranye na data, mu gihugu c’i Kanani.

³³Uwo mugabo aganza ico gihugu, aratubarira, at’ Iki ni co kizommenyesha ko mur’ abanyakuri: ati Ni munsigarane umwe mu bo muvukana, mujane ivyo kubamara inzara mu ngo zanyu, mugende.

³⁴Ati Muheze munzanire umuhererezi wanyu; ati Ni ho nzomenya ko mutar’ abatasi, ariko ko mur’ abanyakuri; mpeze mbasubize mugenzi wanyu, mubone kugenda uburarame mur’ iki gihugu.

³⁵Maze bacuranuye ibiri mu magunira yabo, basanga itu ry’amahera ry’umuntu wese riri mw igunira ryiwe: abo bose bo na se babonye ayo matu yabo y’ amahera, baratinya.

³⁶Se Yakobo arababarira, ati Muntōtōyekw abana: ehe Yosefu ntakiriho, na Simeyoni ntakiriho, none mugomba kunyaka na Benyamini: ivyo vyose ni jewe vyeguriweko!

³⁷Reyubeni abarira se, ati Ni ntamukugarukanira, uze wice abahungu banje bompi; n’ umumpe, nzomukugarukanira.

³⁸Aramwishura, at’ Umwana wanje ntazomanukana namwe; kuko mukuru we yapfuye, akaba asigaye ar’ ikinege: yogira ic’ aba mu nzira, mugatuma imvi zanje zimanukana umubabaro i kuzimu.