Read Bibliya Yera 1951 Itanguriro 43 Bible Online

Itanguriro 43 - Bibliya Yera 1951 bible

Itanguriro 43

¹Kigoyi kirushiriza kuba cinshi mu gihugu.

²Bamaze za mpeke bakuye muri Egiputa, se arababgira, at’ Enda ni musubireyo, mudusumire utwo kurya.

³Yuda aramwishura, ati Wa mugabo yararenzwe, avuga ko tutazomugaruka mu maso tutajanye na murumuna wacu.

⁴Ni waturungikana na murumuna wacu turamanukayo, tugusumire;

⁵ariko n’utamuturungikana, ntitumanukayo: kuk’ uwo mugabo yatubariye, ati Ntimuzongaruka mu maso mutazananye na murumuna wanyu.

⁶Isirayeli arababaza, ati N’iki catumye mungirira nabi murtyo, mukabarira uwo mugabo ko mufise uwundi muvukana?

⁷Baramwishura, bat’ Uwo mugabo yaratubazaguje ku vyacu, no ku vya bene wacu, ati Mbega so aracariho? Har’ uwundi muvukana? Tumwishura nk’uko yatubajije: twari gushobora dute kumenya kw atubarira kumanukana murumuna wacu?

⁸Yuda abarira se Isirayeli, ati Rekura uwo muhungu ajane nanje, duheze tuve hasi, tugende; tubone kubaho, twoye gupfa, twe nawe n’abana bacu.

⁹Jewe ndamwishinze, abe ari jewe uzomubaza: ni ntamukugarukanira, ngo mmugushikirize, nzoba ngukoreye icaha kitazomvako gushitsa ibihe bidashira.

¹⁰Ereg’ iyo tudateba, none tuba tugarutse ubga kabiri.

¹¹Se Isirayeli arababgira, at’ Enda ko bimeze birtyo, ni mugenze murtya: mujane mu magunira yanyu ibiba mur’ iki gihugu birusha ibindi kuba vyiza, mubishīre uwo mugabo kw ingemurano: umuti wo gusomōra ugeze, n’ ubūki bugeze, n’imibavu, n’isenga, n’ibiyoba, na shakedi;

¹²kandi ku mahera ya mbere mugerekekw ayandi angana cabugerwe, kugira ngo musubiraney’ amwe yagaruka mu magunira yanyu: kumbure babaye kubiyoberwa;

¹³muheze mujane murumuna wanyu, muhaguruke, musubire kuri wa mugabo;

¹⁴Imana Ishobora vyose ibahe guhāngazwa na we, ngw abarekurire mwene nyoko wundi, arekure na Benyamini. Nanje namba nzoba nyakamara, mbe ko!

¹⁵Abo bagabo bābīra za ngemurano, bajana ya mahera n’ayandi angana na yo cabugerwe, bajana na Benyamini; barahaguruka, baramanuka, bashika muri Egiputa, bahagarara imbere ya Yosefu.

¹⁶Yosefu abonye Benyamini ari kumwe na bo, abarira umubgiriza wiwe, ati Jana aba bantu i wanje, utek’ ubabāgire, urondeze, kuko turiburīre hamwe ku murango.

¹⁷Uwo mugabo agenza nk’uko Yosefu amubariye; ajana abo bantu mu nzu ya Yosefu.

¹⁸Baratinya kukw abinjije mu nzu ya Yosefu: baravugana, bati Ya mahera yagaruka mu magunira yacu, hamwe twaza mbere, ni yo atumye twinjizwa, ngw atwidandagazeko, adusūmire, atugire abaja, anyage n’indogoba zacu.

¹⁹Begera uwo mubgiriza wa Yosefu, bavuganira na we ku muryango w’inzu,

²⁰bat’ Udutunge mugenzi, mbere twaramanutse tuje gusuma;

²¹hanyuma rero dutāhūtse, dushitse ku ndāro, dutekurura amagunira yacu, maz’ umuntu wese asanga amahera yiwe ari mu munwa w’ igunira ryiwe, amahera yacu uko yakanganye kwose: none turayagarukanye.

²²Kandi twazanye n’ayandi mahera yo gusumisha. Ariko ntituzi uwashubije ayo mahera yacu mu magunira.

²³Arabishura, ati Ni musubize imitima mu nda, mureke gutinya: Imana yanyu, Imana ya so, ivyo n’ivyo yabihēreye mu magunira yanyu: jeho amahera yanyu narayahawe. Asohora Simeyoni, aramubazanira.

²⁴Nuko wa mugabo yinjiza abo bantu mu nzu ya Yosefu, abaha amazi, boga ibirenge, agaburira n’ indogoba zabo.

²⁵Batunganya za ngemurano, kugira ngo bazishikirize Yosefu ah’ azira ku murango, kuko bari bumvise yuko bariburīre aho.

²⁶Yosefu atashe, binjirana za ngemurano bazanye, barazimushikiriza, bakubita inkoro hasi imbere yiwe.

²⁷Na we arabagumisha, arababaza, ati Mbega so aragumye, wa mutāma mwavuga? Aracariho?

²⁸Baramwishura, bat’ Ego me, umusavyi wawe aracariho, aragumye. Bicisha bugufi, baramwunamira.

²⁹Maze Yosefu, ashikije amaso kuri Benyamini murumuna we, uwo basangiye nyina, arababaza, at’ Uwo ni we muhererezi wanyu mwambariye? Maz’ aramubarira, at’ Imana ikugirire neza, mwana wanje.

³⁰Nuko Yosefu arinyusha, kuko mu mutima yari n’ikigumbagumba ca mwene nyina, arondera ah’ aririra, yikebereza haruguru, aririrayo.

³¹Araheza yiyuhagira mu maso, aragaruka, ariyumanganya, aravuga, ati Ni muzane ivyo kurya.

³²Bamuha ukwiwe, abo bandi ukwabo, n’Abanyegiputa bārīra hamwe na we ukwabo, kukw Abanyegiputa batāsangira n’Abaheburayo, kuko car’ umuziro ku Banyegiputa.

³³Babicarika imbere yiwe uko bakurikirana, uhereye ku mfura ugashitsa ku muhererezi; abo bagabo bararābana, baratangara.

³⁴Yosefu avuga ko babakamatira no ku bindi biryoshe bir’ imbere yiwe; ariko kw ivya Benyamini bisumba ivyabo gatanu. Nuko baranywa, barahimba, banezeranwa na we.