Read Bibliya Yera 1951 Itanguriro 44 Bible Online

Itanguriro 44 - Bibliya Yera 1951 bible

Itanguriro 44

¹Maze Yosefu abarira umubgiriza wiwe, ati Ni mwuzuze amagunira y’abo bantu impeke, nk’izo bashobora gutwara, kand’ ushire n’amahera y’umuntu wese mu munwa w’igunira ryiwe.

²Ushire n’igikombe canje c’ifeza mu munwa w’igunira ry’umuhererezi wabo, hamwe n’amahera yazanye gusumisha. Abikora nk’uko Yosefu yamubariye.

³Bukeye mu gasisira barungika abo bantu, hamwe n’indogoba zabo.

⁴Bavuye mu gisagara, batarashika kure, Yosefu abarira umubgiriza wiwe, ati Va hasi, ukurikire ba bagabo, maze ni wabashikīra, ubabaze, uti N’iki catumye mugirira nabi uwabagiriye neza?

⁵Mbeg’ ico mwivye s’ico databuja anywesha, kand’ akakiragurisha? Uti Ko mwakoze murtyo, mwakoze icaha.

⁶Arabashikīra, ababarira ayo majambo.

⁷Baramwishura, bati Mugenzi, utewe n’iki kutubarira ben’ ivyo? Biragahera abasavyi bawe ko twokora nk’ivyo!

⁸Ereg’ amahera twasanze mu minwa y’ amagunira yacu twarayakugarukaniye tuyakūye mu gihugu c’i Kanani: none twoshobora dute kwiba ifeza cank’ izahabu vyo mu nzu ya shobuja?

⁹Uwo wokibonana wese muri twebge abasavyi bawe, akwiye gupfa, natwe duhinduke abaja ba shobuja.

¹⁰Arabishura, ati Nuko rero, birakora bibe nk’uko mubivuze. Uwo kija kubonekako ni we azohinduka umuja wanje, namwe abandi muzoba mweze.

¹¹Baca bakūra amagunira yabo ku ndogoba n’ ingoga, bayashira hasi, umuntu wese atekurura iryiwe.

¹²Arasaka, ahera k’uw’imfura ashitsa ku muhererezi: ca gikombe kiboneka mw igunira rya Benyamini.

¹³Baca bitantamurirakw impuzu zabo, umuntu wese asubiza ibintu vyiwe ku ndogoba, basubira mu gisagara.

¹⁴Nuko Yuda na bagenzi be bashika kwa Yosefu, basanga ari ho akiri: baca bamwitembagaza imbere.

¹⁵Yosefu arababaza, at’ Ico mwakoze ico n’igiki? Ntimuzi yuk’ umuntu ameze nkanje ashobora kuragura koko?

¹⁶Yuda aramwishura, ati None twovuga iki ga mugenzi? canke twokwishura iki, canke twokwiregura dute? Imana yamenye ibigabitanyo vy’ abasavyi bawe: ehe tubaye abaja bawe, databuja, twe n’uwo igikombe kibonetseko.

¹⁷Aramwishura, ati Biragahera ko nokora ntyo! Uwo igikombe kibonetseko ni we azoba umuja wanje; ariko mweho ni mwīgīre, mudūge kwa so amahoro.

¹⁸Maze Yuda aramwegera, aramubarira, ati Mugenzi, zirikana, ndagusabe ijambo mvuga, ntumpambarire, jewe umusavyi wawe: kuk’ umeze nka Farawo.

¹⁹Erega mugenzi, ni wewe watubajije, uti Muracafise so, canke har’ uwundi muvukana?

²⁰Natwe turakwishura, mugenzi, tuti Dufise data w’umutāma, hariho n’ uwundi muhungu yavyaye ashaje; na we mukuru we yarapfuye, none ni we asigaye ar’ikinege mu nda ya nyina, kandi se amukunda cane.

²¹Nawe uratubarira abasavyi bawe, uti Muramunzanira ndamurābe.

²²Natwe turakubarira, mugenzi, tut’ Uwo muhungu ntivyoshoboka kw atandukana na se, kuko botandukana se yopfa.

²³Nawe uratubgira, twebge abasavyi bawe, ut’ Umuhererezi wanyu ni mutamumanukana, ntimuzosubira kungaruka mu maso.

²⁴Nuko tudūze, dushikiriye data umusavyi wawe, tumubarira amajambo yawe, mugenzi.

²⁵Hanyuma data atubariye, ati Subira mugende, mudusumire utwo kurya;

²⁶turamuhakanira, tuti Ntidushobora kumanuka; arik’ umuhererezi wacu ni twajana, turamanuka: kuko bidashoboka guseruka uwo muntu mu maso, umuhererezi wacu tutari kumwe.

²⁷Maze data umusavyi wawe aratubarira, ati Murazi yuk’ umugore wanje twavyaranye abahungu babiri:

²⁸umwe akaba yaragiye amazimayongo, nkibgira, nt’ Igikōko caramutabaguye, nta kindi; nanje nkaba ntasubiye kumubona;

²⁹ati None ni mwanyaka n’uyu, akagira ico aba, muzoba mutumye imvi zanje zimanukana umubabaro i kuzimu.

³⁰Nuko none ni naramuka nshikiriye data umusavyi wawe tutari kumwe n’uwo muhungu, n’ukuntu umutima wiwe yawuhereje kur’ uwo muhungu,

³¹akabona tutazananye, yoca apfa: twebge abasavyi bawe twoba dutumye imvi za data umusavyi wawe zimanukana umubabaro i kuzimu.

³²Kuko jewe umusavyi wawe nishinze uyo muhungu kuri data, nti Ni ntamukugarukanira, nzoba ngukoreye icaha kitazomvako gushitsa ibihe bidashira.

³³None rero ndakwinginze, ndasavye nsigare mu gishingo c’uyu muhungu, mbe umuja wawe, mugenzi; uyu muhungu atahane na bagenzi be.

³⁴Mbega nosubira nte kuri data, ntari kumwe n’uwo muhungu? Reka noye kuzobona ivyago bizoba kuri data.