Read Bibliya Yera 1951 Itanguriro 45 Bible Online

Itanguriro 45 - Bibliya Yera 1951 bible

Itanguriro 45

¹Maze Yosefu ntiyaba agishobora kwiyumanganya imbere y’abo bahagararanye bose; aca avuga n’ijwi rirenga, ati Ni mutaramure abantu bose. Nuko ntihagira uwundi muntu n’umwe asigarana na Yosefu, igihe yibarira bene se.

²Araturikisha ararira, Abanyegiputa baravyumva, no kwa Farawo baravyumva.

³Yosefu abarira bene se, at’ Erega ni jewe Yosefu! Aho data aracariho? Bene se babura ico bovuga, kuko barandutse imitima kubona bar’ imbere yiwe.

⁴Yosefu abarira bene se, at’ Enda ni munyegere. Baramwegera; aravuga, ati Ni jewe Yosefu mwene so, umwe mwaguze ngashōrwa muri Egiputa.

⁵None ntimubabare ngo mwirakire kuko mwanguze ngashōrwa ino: kukw Imana ari yo yatumye mbītangira imbere ngo mbe kirokora.

⁶Ikigoyi kimaze imyaka ibiri mu gihugu, kandi haracasigaye iyindi myaka itanu batazoruha barimamwo canke ngo bimbure.

⁷Imana ni yo yatumye mbītangira imbere kugira ngw ibabogore, mugire ico musiga mw isi, ibarokoze agakiza gakomeye.

⁸None rero si mwebge mwandungitse ino, n’Imana: kandi yampinduye nka se wa Farawo, n’umuzezwarugo wiwe wa vyose, no kuba umugaba w’igihugu cose ca Egiputa.

⁹Ni mwihute, mudūge kwa data, muze mushike mumubarira, mut’ Umwana wawe Yosefu yadutumye ngw Imana yamugize umugaba w’igihugu cose ca Egiputa: muti Manuka uze iy’ari, ntutebe.

¹⁰Muti Kand’ uzoshika uba mu gihugu c’i Gosheni, ube hafi yiwe, mwe n’abana bawe n’abuzukuru bawe, n’imikuku yawe n’amasho yawe, n’ivy’ ufise vyose.

¹¹Kandi mut’ Azogutungirayo, kuko hagisigaye imyaka itanu y’ikigoyi, woye kuzohava ufūtāna, mwe n’inzu yawe n’ab’ ufise bose.

¹²Kandi muravyibonera n’amaso yanyu, na mwene mama Benyamini aravyibonera, yukw ari jewe ubganje mvyikūriye mu kanwa.

¹³Kandi muze mubarire data icubahiro canje cose mfise muri Egiputa, n’ivyo mwiboneye vyose, kandi muze munyarukane data kumushikana ino.

¹⁴Yosefu araheza agwa mw izosi Benyamini mwene nyina, ararira; Benyamini na we aririra kw izosi rya Yosefu.

¹⁵Agūmbīra bene se bose, abaririrako; hanyuma y’ ivyo bene se bararemerana, bayāga na we.

¹⁶Inkuru y’ivyo ishika kwa Farawo, bat’ Ab’i wabo wa Yosefu baje; binezereza Farawo n’abantu biwe cane.

¹⁷Farawo abgira Yosefu, ati Barira ab’i wanyu bagenze bartya: baremēke ibintu vyabo indogoba, bagende, baje mu gihugu c’i Kanani;

¹⁸bazane so n’abo mu ngo zabo, baze i wanje: nanje nzobaha ku vyiza‐vyiza vyo mur’iki gihugu ca Egiputa, bazorya ku biryoshe vyo mu gihugu.

¹⁹Nuko none ndabikugeze: ubabarire, bagenze bartya: bajane imikogote imwe yo mur’ iki gihugu ca Egiputa ikwegwa n’amafarasi, yo kuzana abana babo bato n’abagore babo, bazane na so, baze ino.

²⁰Kandi ntibababazwe n’ ibintu vyabo: kukw ivyiza‐vyiza vyo mur’ iki gihugu cose ca Egiputa bizoba ivyabo.

²¹Nuko bene Isirayeli babigenza bartyo; Yosefu abaha imikogote, nk’uko Farawo yabigeze, abaha n’ impamba.

²²Kand’ uko bangana, aha umuntu wese imyambaro yo gukūranya; arikw aha Benyamini intete z’ifeza amajana atatu, amuha n’imyambaro yo gukūranya itanu.

²³Se na we iganuke yamurungikiye n’iri: indogoba cumi zigiye zīremētse ku vyiza‐vyiza vyo muri Egiputa, n’indogoba zivyara cumi zīremētse imihure y’impeke n’ivyo kurya n’impamba se azorīra mu nzira.

²⁴Nukw asēzera bene se: bakiriko baragenda, arababgira, ati Mwirinde, ntimutanekw ibirake muri mu nzira!

²⁵Nuko bava muri Egiputa, badūga mu gihugu c’i Kanani, bashika i muhira kwa se Yakobo.

²⁶Baramubarira, bati Yosefu aracariho, ni we wa mugaba w’igihugu cose ca Egiputa. Umutima wiwe uca ugwa igihumura, ntiyavyemera.

²⁷Bamudōndera amajambo yose Yosefu yabatumye; se Yakobo abonye ya mikogote Yosefu yarungitse kumujana, umutima wiwe urarabūka.

²⁸Isirayeli aravuga, ati Ni vyo bizi, ko Yosefu umwana wanje akiriho! Ndagenda nje kumubona ntarapfa!