Read Bibliya Yera 1951 Itanguriro 46 Bible Online

Itanguriro 46 - Bibliya Yera 1951 bible

Itanguriro 46

¹Nuko Isirayeli afata urugendo, arajonjora n’utwiwe twose, ashika i Beri‐sheba, aha Imana ibimazi arabikerera, Imana ya se Isaka.

²Maze mw ijoro Imana ihamagara Isirayeli ari nko mu nzozi, iti Yakobo we! ewe Yakobo! Aritaba, ati Sabge!

³Iramubarira, iti Nd’Imana, Imana ya so; ntutinye kumanuka muri Egiputa, kukw ari ho nzoguhindurira ihanga rikomeye.

⁴Jewe ubganje nzomanukana nawe muri Egiputa, kandi ni jewe nzogukūrayo; kandi Yosefu ni we azohwamikira ingohe ku maso yawe igihe uzopfa.

⁵Yakobo arahaguruka, ava i Beri‐sheba: bene Isirayeli bajana se Yakobo n’abana babo bato n’ abagore babo muri ya mikogote ikwegwa n’amafarasi Farawo yarungitse kumwimura.

⁶Yakobo bo n’uruvyaro rwiwe rwose baja muri Egiputa, bajanye ibiyevera vyabo n’ibintu vyabo baronkeye mu gihugu c’i Kanani;

⁷ashikana muri Egiputa n’abahungu biwe n’abuzukuru biwe b’abahungu, n’ abakobga biwe n’abuzukuru biwe b’abakobga, n’uruvyaro rwiwe rwose.

⁸ Aya ni yo mazina y’Abisirayeli bagiye muri Egiputa, ni we Yakobo n’abana biwe. Imfura yiwe ni Reyubeni;

⁹bene Reyubeni ni Henoki, na Palu, na Hesironi, na Karumi.

¹⁰Bene Simeyoni ni Yemuweli, na Yamini, na Ohadi, na Yakini, na Sohari, bo na Sauli umwana yavyaye ku Munyakananikazi.

¹¹Bene Lewi ni Gerushoni na Kohati na Merari.

¹²Bene Yuda ni Eri, na Onani, na Shela, na Peresi na Zera: ariko Eri na Onani bapfiriye mu gihugu c’i Kanani. Bene Peresi ni Hesironi na Hamuli.

¹³Bene Isakari ni Tola, na Puva, na Yobu, na Shimuroni.

¹⁴Bene Zebuloni ni Seredi na Eloni na Yakileli.

¹⁵Abo ni bo bamutse ku bo Leya yavyaranye na Yakobo bakir’ i Padan‐aramu, bavyara n’umukobga yitwa Dina: nukw abana biwe bose b’abahungu n’abakobga ni mirongwitatu na batatu.

¹⁶Bene Gadi ni Sifiyoni, na Hagi, na Shuni, na Esiboni, na Eri, na Arodi, na Areli.

¹⁷Bene Asheri ni Imuna, na Ishiva, na Ishivi, na Beriya, na mushiki wabo Sera; bene Beriya ni Heberi na Malukiyeli.

¹⁸Abo ni bo bamutse ku bo Zilupa yavyaranye na Yakobo, Zilupa ari we Labani yahaye Leya umukobga wiwe kumucorekera: n’ icumi na batandatu.

¹⁹Bene Rakeli muka Yakobo, ni Yosefu na Benyamini.

²⁰Yosefu yavyaye Manase na Efurayimu, ari mu gihugu ca Egiputa, abavyara kuri Asenati umukobga wa Potifera, umuherezi wo mu gisagara Oni.

²¹Bene Benyamini ni Bela, na Bekeri, na Ashibeli, na Gera, na Namani, na Ehi, na Roshi, na Mupimu, na Hupimu, na Arudi.

²²Abo ni bo bamutse ku bo Rakeli yavyaranye na Yakobo: bose n’ icumi na bane.

²³Mwene Dani ni Hushimu.

²⁴Bene Nafutali ni Yakiseli, na Guni, na Yeseri, na Shilemu.

²⁵Abo ni bo bamutse ku bo Biluha yavyaranye na Yakobo, Biluha ari we Labani yahaye Rakeli umukobga wiwe kumucorekera: bose n’ indwi.

²⁶Abantu bose bajanye na Yakobo muri Egiputa, bakomōtse kuri we, udashizemw’ abakazana biwe, bose na bose bari mirongwitandatu na batandatu.

²⁷Abahungu Yosefu yavyaye ari muri Egiputa ni babiri; nukw abantu bose b’inzu ya Yakobo bagiye muri Egiputa bari mirongwirindwi.

²⁸Yakobo atuma Yuda ngw amwītangire imbere aje kwa Yosefu, ngw amurangire inzira ija i Gosheni: nuko bashika mu gihugu c’i Gosheni.

²⁹Yosefu azirikisha umukogote wiwe ku mafarasi, adūga i Gosheni ngw asanganire se Isirayeli; aramwibarira, amugwa mw izosi, aririra kw izosi ryiwe umwanya munini.

³⁰Isirayeli abarira Yosefu, ati Ni vyo bizi, naho nopfa, ko nkubonye ukiriho!

³¹Maze Yosefu abarira bakuru be n’ab’i wabo, ati Ngiye kubgira Farawo yuko bakuru banje n’ab’i wacu bahora mu gihugu c’i Kanani bashitse ino,

³²kandi kw ar’ abama baragira, kukw ar’ abanyenka; kandi ko bazanye imikuku yabo n’amasho yabo, n’ivyo bafise vyose.

³³Nuko Farawo ni yabahamagaza, akababaza,

³⁴at’ Umwuga wanyu n’umuki? muze mumwishure, mut’ Abasavyi bawe tur’ abanyenka, guhera mu buto bgacu kugeza n’ubu, twebge ubgacu uhereye no kuri ba sogokuruza. Muvuge murtyo kugira ngo mugerērwe mu gihugu c’i Gosheni, kuk’ ūragira wese ar’ umunenwa ku Banyegiputa.