Read Bibliya Yera 1951 Itanguriro 47 Bible Online

Itanguriro 47 - Bibliya Yera 1951 bible

Itanguriro 47

¹Yosefu araheza aragenda, abgira Farawo, ati Data n’abo tuvukana bashitse ino bavuye mu gihugu c’i Kanani, bo n’imikuku yabo n’amasho yabo n’ivyo bafise vyose; none bari ngaho mu gihugu c’i Gosheni.

²Maz’ arobanura batanu muri bene se, abashīra Farawo.

³Farawo abaza bene se ba Yosefu, at’ Umwuga wanyu n’umuki? Bishura Farawo, bat’ Abasavyi bawe tur’ abama baragira, twebge ubgacu uhereye no kuri ba sogokuruza.

⁴Kandi baramubarira, bati Tuzanywe no gusuhukira mur’ iki gihugu, kukw abasavyi bawe twabuze ubgatsi bg’ imikuku yacu, kukw ikigoyi ari cinshi cane mu gihugu c’i Kanani; none rero turasavye, wemerere abasavyi bawe, tube mu gihugu c’i Gosheni.

⁵Farawo abarira Yosefu, ati So n’abo muvukana ko baje kuri wewe,

⁶igihugu ca Egiputa ngico: ubagerēre aharuta ahandi ubgiza, babe mu gihugu c’i Gosheni; kandi namb’ uzi abahanga muri bo, ubagire abatongore b’ inka zanje.

⁷Yosefu araheza yinjiza na se Yakobo, amushikana imbere ya Farawo: Yakobo ahezagira Farawo.

⁸Farawo abaza Yakobo, at’ Imyaka umaze n’ingahe?

⁹Yakobo yishura Farawo, at’ Imyaka y’ukuyerera kwanje kw isi n’ijana na mirongwitatu: iyo myaka mbayeho ibaye mike kandi mibi, ntingana n’imyaka ba sogokuruza bamaze, mu misi y’ukuzenzagira kwabo.

¹⁰Yakobo ahezagira Farawo, araheza ava imbere yiwe.

¹¹Yosefu agerēra se n’abo bavukana, abaha ishamvu mu gihugu ca Egiputa, aharuta ahandi ubgiza, mu ntāra y’i Ramesesi, nk’uko Farawo yageze.

¹²Yosefu aha se n’abo bavukana n’abo mu rugo rwa se bose ivyo kubatunga, uko mu nzu zabo bangana.

¹³Nuko mu gihugu cose ntihaba hakiboneka ivyo kurya, kukw ikigoyi cari cinshi cane, bituma abo mu gihugu ca Egiputa n’abo mu gihugu c’i Kanani bagwa isari kubg’ inzara.

¹⁴Yosefu akoranya amahera yose yari mu gihugu ca Egiputa no mu gihugu c’i Kanani bazanye gusumisha, ayajana kwa Farawo.

¹⁵Amahera yose ashize mu gihugu ca Egiputa no mu gihugu c’i Kanani, Abanyegiputa bose baja kuri Yosefu, bati Duhe ivyo kurya, twoye kugwa imbere yawe, kukw amahera yacu ashize.

¹⁶Yosefu arabishura, ati Ni muzane amatungo yanyu, nanje ndabagurira ivyo kurya ku matungo yanyu, asangwa amahera yashize.

¹⁷Bazanira Yosefu amatungo yabo; Yosefu abagurira ivyo kurya ku mafarasi n’imikuku n’amasho n’indogoba: abasumira ivyo kurya uwo mwaka, abibaguriye ku matungo yabo yose.

¹⁸Uwo mwaka ushize, mu mwaka ugira kabiri, baza kuri we, baramubarira, bati Mugenzi, ntitwoguhisha yukw amahera yacu yose yashize, kand’ amasho yacu yose yacitse ayawe, mugenzi. Non’ urabona kw ata co tugisigaranye, mugenzi, atar’ imibiri yacu n’amatongo yacu:

¹⁹none twoye kugwa imbere yawe, amatongo yacu ngw ahinduke imisaka, n’uduhe utwo kurya, ube utuguranye n’amatongo yacu, ducike abagurano ba Farawo, atuganzanye n’amatongo yacu: uduhe n’imbuto, ntidupfe, tubeho, igihugu coye guhinduka imisaka.

²⁰Nuko Yosefu agurira Farawo amatongo yose yo muri Egiputa, kuk’ Umunyegiputa wese yagura indimiro yiwe, kukw ikigoyi cabateye cane: nukw igihugu cose gicika ishamvu ya Farawo.

²¹Abantu na bo abagira abagurano, mu gihugu cose ca Egiputa, iyo kiva kikagera.

²²Amatongo y’ abaherezi ni yo yonyene atāguze: kukw abaherezi bari bafise ivyo kubatunga bagerewe na Farawo, bikaba ari vyo barya: ni co catumye batagura amatongo yabo.

²³Yosefu abarira abantu, at’ Eh’ uyu musi ndabaguze, mubaye aba Farawo, mwe n’amatongo yanyu: none ngizi imbuto zo kuja kubiba.

²⁴Arik’ uko muzokwimbura kwose, muzokwama muha Farawo igihimba ca gatanu c’ivyo mwimbuye; namwe ibihimba bine bizoba ivyanyu, ngo mubikūrekw imbuto, bibe n’ivyo kurya vyanyu n’abo mu ngo zanyu n’abana banyu.

²⁵Baramubarira, bat’ Udukijije urupfu! Komeza uduhangaze, mugenzi, natwe tuzoba abagurano ba Farawo.

²⁶Nuko Yosefu abigira icagezwe, kikiriho na bugingo n’ubu, yukw igihimba ca gatanu c’ivyimburwa vyo mu gihugu ca Egiputa kizoba ica Farawo: amatongo y’abaherezi yonyene ni yo atabaye aya Farawo.

²⁷Abisirayeli baba mu gihugu ca Egiputa, mu ntāra y’i Gosheni; baronkeray’ ibintu, bararondoka, baragwira cane.

²⁸Yakobo amara imyaka cumi n’indwi ari mu gihugu ca Egiputa: nukw imyaka Yakobo yamaze n’ ijana na mirongwine n’indwi, iyo ni yo myaka y’ukubaho kwiwe.

²⁹Nukw igihe co gupfa kwa Isirayeli kiri hafi, ahamagaza umwana wiwe Yosefu, aramubarira, ati Ni waba uzongirira neza, ndakwinginze, n’ushire ukuboko kwawe musi y’ikibero canje, wemere kunyobokera, no kumbera umwizigirwa. Ndakwinginze, ntuz’ umpambe muri Egiputa:

³⁰ariko ni nagera guhamvya ba sogokuru, uz’ unkūre muri Egiputa, umpambe mw isenga yabo bāhambgemwo. Aramwishura, ati Nzogenza uk’ umbariye.

³¹Aramubarira, ati Ndahira: aramurahira. Isirayeli araheza yūnama ku musego wo ku buriri bgiwe.