Read Bibliya Yera 1951 Itanguriro 48 Bible Online

Itanguriro 48 - Bibliya Yera 1951 bible

Itanguriro 48

¹Hanyuma y’ivyo babarira Yosefu, bat’ Umuvyeyi wawe ararwaye. Aca ahitana abana biwe bompi, Manase na Efurayimu.

²Babarira Yakobo, bat’ Ehe umwana wawe Yosefu araje. Isirayeli aca arinanata, yicara ku buriri.

³Yakobo abarira Yosefu, at’ Imana Ishobora vyose yanyiyerekeye i Luzi ho mu gihugu c’i Kanani, irampezagira;

⁴irambarira, it’ Ehe nzokurondora, nkugwize, nguhindure igugu ry’amahanga; kand’ iki gihugu nzogiha uruvyaro rwawe ruzogukurikira, kibe ishamvu yarwo ibihe vyose.

⁵Non’ aba bahungu bawe bompi wavyaye n’abanje, abo wavyariye ino mu gihugu ca Egiputa ntaraza iy’ uri: mbere Efurayimu na Manase babaye abanje, babaye kimwe na Reyubeni na Simeyoni.

⁶Ni hagira abandi bana uvyara hanyuma bazoba abawe, maze mw iragwa ryabo bazoja mu gishingo ca bakuru babo.

⁷Kand’ igihe nava i Padani nabonye amagorwa, Rakeli arapfa, turi mu rugendo mu gihugu c’i Kanani, twari dushigaje akarere tugashika muri Efurata; ndamuhamba ku nzira ija muri Efurata, ari ho Betelehemu.

⁸Isirayeli abona bene Yosefu, aramubaza, at’ Aba ni ba nde?

⁹Yosefu yishura se, ati N’abana banje, bamwe Imana yampereye ino. Aramubarira, at’ Enda banyegereze, ndabahezagire.

¹⁰Kand’ amaso ya Isirayeli yar’ asigaye abona ivyijiji kubgo gusāza, ntiyar’ acihweza. Arabamwēgereza, na we arabasoma, arabagūmbīra.

¹¹Isirayeli abarira Yosefu, ati Sinari ncibgira yuko nzosubira kugukubita ijisho; ariko non’ Imana inyeretse n’uruvyaro rwawe.

¹²Yosefu abakūra hagati y’ amavi ya se, arunama akubita inkoro hasi.

¹³Yosefu arabafata bompi, arabamwēgereza; afatisha Efurayimu ukuboko kwiwe kw’i buryo, amutumbereza ukuboko kw’i bubamfu kwa Isirayeli, afatisha Manase ukuboko kwiwe kw’i bubamfu, amutumbereza ukuboko kwa Isirayeli kw’i buryo.

¹⁴Isirayeli aramvura ukuboko kwiwe kw’i buryo, arambika ikiganza ku mutwe wa Efurayimu, ari we muhererezi, arambika ikiganza ciwe c’i bubamfu ku mutwe wa Manase: anyuranya amaboko yiwe ibigirankana, kuko Manase ari we yar’ imfura.

¹⁵Ahezagira Yosefu, at’ Imana, iyo sogokuru Aburahamu na data Isaka bagendera imbere, Imana yandagiye mu kubaho kwanje kwose igashitsa n’ubu,

¹⁶umumarayika yandokoye mu vyago vyose, ihe aba bahungu umugisha; ni bitirirwe izina ryanje, n’irya sogokuru Aburahamu n’irya data Isaka; barakarondoka, babe benshi cane mw isi.

¹⁷Maze Yosefu abonye yuko se arambitse ikiganza ciwe c’i buryo ku mutwe wa Efurayimu, biramubabaza; aterura ukuboko kwa se, ngw agukūre ku mutwe wa Efurayimu, agushire ku wa Manase.

¹⁸Yosefu abarira se, at’ Oyaye muvyeyi, s’uko: uyu ni we mfura, ba ari we urambika ikiganza c’i buryo ku mutwe.

¹⁹Se aranka, ati Ndabizi mwananje, ndabizi: uwo na we azohinduka ubgoko, bitayekw azoba agakomeye; yamara murumuna we azomurusha, kand’ uruvyaro rwiwe ruzohinduka amahanga menshi.

²⁰Abahezagira kur’ uwo musi, at’ Abisirayeli iyo bahezagirana, bazovuga kuri mwebge, bat’ Imana irakakugira nka Efurayimu na Manase. Na ho nyene yabanje Efurayimu ataravuga Manase.

²¹Isirayeli abarira Yosefu, at’ Ehe ngiye gupfa: arikw Imana izobana namwe, izobasubiza mu gihugu ca ba sogokuruza banyu.

²²Kand’ umusozi w’i Shekemu ndawuguhayek’ ubuheta muri bagenzi bawe, uwo nanyagishije Abamori inkota yanje n’umuheto wanje.