Read Bibliya Yera 1951 Itanguriro 49 Bible Online

Itanguriro 49 - Bibliya Yera 1951 bible

Itanguriro 49

¹Yakobo ahamagaza abana biwe, arababarira, ati Ni mukoranire hamwe, ndabamenyeshe ibizobabako mu misi izoza.

²Ni mukorane, mutege amatwi, bana banje,[48] Munyumve, ndi so Isirayeli.

³Reyubeni, ur’ imfura yanje, n’inkomezi zanje, n’ubuzibūra bganje: War’ akarenzo mu cubahiro, war’ akarenzo mu bubasha;

⁴Nk’ukw amazi asūriranya, ni ko nawe umeze, nuko ntukibaye akarenzo, Kuko wūriye uburiri bga so, Ukabuhumanya: mbere yūriye aja mu buryamo bganje!

⁵Simeyoni na Lewi baravukana; Ibirwanishwa vyabo n’ivyicanyi bakoresha ku manyama.

⁶Mushaha wanje, ntukaje mu nama zabo; Mutima wanje, ntugafatanye n’ikoraniro ryabo: Kuk’ uburake bgabo bgabateye kwica abantu, Bagatema n’ibitsi vy’inka kugira ngo bīmare ishavu.

⁷Uburake bgabo burakavumwa, kukw ari bginshi, N’ubushangashirwe bgabo, kukw ar’ubg’ agashinyaguro. Nzobakwiragiza mu ba Yakobo, Mbashwiragirize mu Bisirayeli.

⁸Weho, Yuda, abo muvukana bazogushima: Ukuboko kwawe kuzogwa abansi bawe mu gahogo; Bene nyoko bazokwikubita imbere.

⁹Yuda n’ikibunda c’intambge: Uradūze, mwana wanje, uvuye mu ruhīgi. Arūnamye, abunda nk’intambge, Mbere nk’intambge y’ingore: ni nde yohangāra kuyūbura?

¹⁰Icumu ry’ubugabe ntirizova kuri Yuda, Inkoni yo kuganza ntizova hagati y’ibirenge vyiwe, Nyene vyo ataraza: Uwo ni we amahanga azokwumvira.

¹¹Aziritse inyana yiwe y’indogoba ku muzabibu, N’umukangara w’indogoba awuziritse ku muzabibu wiwe w’indobanurwa; Amesuza impuzu ziwe vino, Imyambaro yiwe ayimesuza amaraso y’inzabibu.

¹²Amaso yiwe atukujwe na vino, Amenyo yiwe yagizwe akāmenge n’amata.

¹³Zebuloni azoba kw isēsero ry’ ikiyaga, I wabo hazoba kw isēsero ah’ amato ashikira; Azohāna urubibe n’i Sidoni.

¹⁴Isakari n’indogoba y’inyenkomezi, Iryamye hagati y’impongore.

¹⁵Abona uburuhukiro kw ari bgiza, N’igihugu ko kimuhimbaye; Ategera urutugu kwikorera, Ahinduka umuja wo gushingwa igikebere.

¹⁶Dani mu gucira abantu biwe imanza, Imiryango y’Abisirayeli nta co izomurusha.

¹⁷Dani azoba inzoka mu nzira, Azoba imvuvyi ku kayira, Ikomora ifarasi ku binōno, Bigatuma ūyigenderakw akoroka, akagwa agaramye.

¹⁸Ewe Uhoraho, niteze agakiza kawe!

¹⁹Gadi, igitero kizomutera, Ariko na we azogihindukirana, agice ibitsi.

²⁰Kuri Asheri hazova ivyo kurya biryoshe, Azotanga ivyo kurya vyiza bikwiye abami.

²¹Nafutali n’ishashi y’impongo irekuwe: Avuga amajambo meza.

²²Yosefu n’ishami ry’igiti cama cane, Ishami ry’igiti cama cane kiri hafi y’isōko: Amashami yaco arenga uruzitiro rw’amabuye.

²³Abarashi bamuteye kubabara, Bamurashe imyampi, baramuvumbukira.

²⁴Arik’ umuheto wiwe wama ubanze, Ari n’ubukuba mu maboko, Abihawe n’amaboko y’Inyenkomezi ya Yakobo, Ari yo Mwungere, Igitandara ca Isirayeli,

²⁵Ni yo Mana ya so, izogufasha. Īshobora vyose izoguha imigisha, Imigisha iva iyo mw ijuru hejuru, N’imigisha iva mu mazi y’i kuzimu, Izoguha umugisha w’ibere ryiza n’inda ishira imbere.

²⁶Imihezagiro yanje so Irengeye iyo ba sogokuru bāhezagira, Ishika ah’imisozi y’intahava igarukira: Izoba ku mutwe wa Yosefu, Mu gitwariro c’uwagizwe umukuru muri bene se.[49]

²⁷Benyamini n’ibingira ry’amero; Mu gitondo arotsa ico yahize, Ku mugoroba akagabanganya isahu.

²⁸Abo bose ni bo miryango y’ Abisirayeli, ukw ar’icumi n’ibiri: ivyo ni vyo se yababgiye, abahezagira, umuntu wese amuhezagira umuhezagiro ukwiranye na we.

²⁹Arabihanikiriza, arababarira, ati Ngira mpamvye abacu: muze mumpambe hamwe na data na sogokuru mw isenga iri mw itongo ryar’ irya Efuroni Umuheti;

³⁰ari yo senga yo mw itongo ry’i Makipela, aharābana n’i Mamure, mu gihugu c’i Kanani, ni yo Aburahamu yaguze hamwe n’iryo tongo, kuba aho yīzīziye ho guhamba, ahaguze na Efuroni Umuheti.

³¹Ni ho bahamvye Aburahamu na Sara umugore wiwe; ni ho bahamvye Isaka na Rebeka umugore wiwe, kandi ni ho nahamvye Leya.

³²Iryo tongo n’isenga iri muri ryo vyaguzwe mu Baheti.

³³Yakobo arangije kwihanikiriza abana biwe, arikwega asubiza amaguru ku buriri, araheza aracīkāna, ahamvya ababo.