Read Bibliya Yera 1951 Itanguriro 50 Bible Online

Itanguriro 50 - Bibliya Yera 1951 bible

Itanguriro 50

¹Yosefu yubama kuri se mu maso, amuririrako, aramugūmbīra.

²Yosefu agera abantu biwe b’abaganga ngo bose se: nukw abo baganga bosa Isirayeli.

³Bamara imisi mirongwine bamwosa, uko ni kw imisi yo kwosa ingana: Abanyegiputa bamara imisi mirongwirindwi bamugandariye.

⁴Imisi y’ikigandaro ishize, Yosefu abarira abo mu rugo rwa Farawo, ati Ni mwaba mumbabaye, ndabasavye mumbaririre Farawo,

⁵muti Se yaramurahije, at’ Ehe ngiye gupfa: uz’ umpambe mu cobo niyimbiye mu gihugu c’i Kanani. None mut’ Aragusavye, umurekure adūge, ahambe se, aheze agaruke.

⁶Nuko Farawo aramwishura, ati Dūga, ugende uhambe so, nk’uko yakurahije.

⁷Nuko Yosefu aradūga, aja guhamba se; abagendanyi ba Farawo bose, n’abakuru bo mu rugo rwiwe, n’abakuru bose bo mu gihugu ca Egiputa, baramuherekeza,

⁸bo n’abo kwa Yosefu bose, na bene se, n’abo kwa se: ivyo basize gusa mu gihugu c’i Gosheni n’abana babo bato, n’ imikuku yabo, n’amasho yabo.

⁹Ajana n’imikogote y’intambara n’ abagendera ku mafarasi: bagenda ar’ igugu rinini cane.

¹⁰Bashika ku mbuga y’igosorero yo muri Atadi, hāri hakurya ya Yorodani: baborogeray’ amaborogo menshi cane y’akabonge: Yosefu ashinga ko bahamara imisi ndwi bagandariye se.

¹¹Ben’ igihugu b’Abanyakanani babonye ingene baririra ku mbuga yo muri Atadi, baravuga, bat’ Ehe kugandara kw’Abanyegiputa kw’ igitangaza! Ni co catumye bahita Abeli‐misirayimu;[50] hāri hakurya ya Yorodani.

¹²Bene Yakobo bamugirira uko yabageze:

¹³bamujana mu gihugu c’i Kanani, bamuhamba mw isenga yo mw itongo ry’i Makipela, aharābana n’i Mamure, iyo Aburahamu yaguze hamwe n’iryo tongo, kuba aho yīzīziye ho guhamba, ahaguze na Efuroni Umuheti.

¹⁴Yosefu amaze guhamba se, asubirana muri Egiputa na bene se n’abandi bose bajanye na we kuja guhamba se.

¹⁵Bene se ba Yosefu babonye ko se apfuye, baravugana, bati Kumbure Yosefu azotwanka, adusubirize mu nkōko ibihwanye n’ibibi vyose twamukoreye.

¹⁶Batuma kuri Yosefu, bati Data atarapfa yaratubariye,

¹⁷ati Muze mubgire Yosefu, mut’ Arakwinginze, harira bakuru bawe igicumuro cabo n’icaha cabo, kuko bakugiriye nabi. Nuko none turakwinginze, uduharire twebge abashumba b’Imana ya data igicumuro cacu. Yosefu yumvise amajambo yabo, aca ararira.

¹⁸Maze bene se batako bariyizira, bamwitembagaza imbere, baramubgira, bati Rāba, tur’ abasavyi bawe!

¹⁹Yosefu arababarira, ati Nta co mutinya! Mbega jewe ndi mu gishingo c’Imana?

²⁰Kubganyu mwagabiye kungirira nabi, arikw Imana yo yagabiye kubizanisha ivyiza, kugira ngw ishitse ibiriho mur’ iyi misi, ikize abantu benshi, boye gupfa.

²¹None rero mureke gutinya: nzobaha ivyo kubatunga, mwe n’abana banyu. Nukw arabaremēsha, ababarira neza.

²²Yosefu aba muri Egiputa, bo n’inzu ya se. Yosefu amara imyaka ijana n’icumi;

²³yibonera abuzukuru ba Efurayimu; n’abana ba Makiri mwene Manase abahindura abana biwe.

²⁴Yosefu abarira ab’i wabo, ati Ndi hafi gupfa; arikw Imana ntizobura kubagendera, ikabakūra mur’ iki gihugu, ikabajana mu gihugu yarahiye Aburahamu na Isaka na Yakobo kw izobaha.

²⁵Yosefu arahiza Abisirayeli, at’ Imana ntizobura kubagendera, namwe muze mukūre amagufa yanje ino, muyadūgane.

²⁶Nuko Yosefu ahwera amaze imyaka ijana n’icumi: baramwosa, bamubīka mw isandugu yo kumuhambamwo, aho nyene muri Egiputa.