Read Bibliya Yera 1951 Itanguriro 6 Bible Online

Itanguriro 6 - Bibliya Yera 1951 bible

Itanguriro 6

¹Maz’ abantu batanguye kugwira kw isi, bavyara abakobga,

²abana b’Imana bitegereje abakobga b’abantu babona ari beza; barongora muri bo abo bitoranirije bose.

³Uhoraho aravuga, ati Mpwemu wanje ntazokwama aranyinyūrana n’umuntu ibihe vyose, kukw ar’ uw’ inyama gusa: nuko rer’ imisi yiwe izoba imyaka ijana na mirongwibiri.

⁴Mur’ ico gihe hār’ibigatanya mw isi, no mu gihe co hanyuma, abana b’Imana bamaze kurongora abakobga b’abantu, bakavyarana na bo abana: ni bo ba bahizi ba kera bābaye ba rurangiranwa.

⁵Nuk’ Uhoraho abona ibibi vy’abantu ingen’ ari vyinshi mw isi, kandi kw ivyiyumviro vy’imitima yabo vyamogoreye gukora ibibi gusa na ntaryo.

⁶Uhoraho yicuza ico yaremeye abantu mw isi, bimutera intuntu mu mutima.

⁷Uhoraho aravuga, at’ Abantu naremye nzobamara mw isi, uhereye ku muntu n’igikōko n’ icikwega n’ikiguruka mu kirere: kuko nicujije ico nabiremeye.

⁸Ariko Nowa we Uhoraho aramushima.

⁹Uru ni rwo ruvyaro rwa Nowa. Nowa yar’ umugororotsi, ntiyagira agasembga mu gihe c’urunganwe rwiwe: kandi Nowa yagendana n’ Imana.

¹⁰Yavyaye abahungu batatu, Shemu na Hamu na Yafeti.

¹¹Kand’ isi yari yononekaye imbere y’Imana, yuzuye umuryano.

¹²Imana yitegereza isi, ibona ko yononekaye, kukw abari n’umubiri bose bo mw isi bāri bononye ingeso zabo.

¹³Imana ibarira Nowa, iti Ndamaramaje guherengeteza abari n’ umubiri bose, kukw isi yuzuye umuryano kubgabo; nuko nzobarandurana n’isi.

¹⁴Wibāzire ubgato mu biti vyitwa goferu, ubucemw’ utwumba, ubuhome ishīshi imbere n’inyuma.

¹⁵Uz’ ububāze urtya: uburebure bg’umurambararo bg’ubgo bgato buze bube amatambge amajana atatu y’ukuboko uciriye mu nkokora, amakika na yo az’ abe amatambge mirongwitanu, uburebure bg’igihagararo buze bube amatambge mirongwitatu.

¹⁶Kand’ ubgo bgato uz’ ubuce amadirisha, az’ asigaze itambge rimwe kuva ku musozo ahahera hejuru; umuryango w’ubgo bgato na wo uz’ uwushire mu rubavu rwabgo; kand’ uz’ ugerekeranye utwo twumba gatatu: utwo hasi n’utwo hagati n’utwo hejuru.

¹⁷Maze nanje nzozana umwuzure w’amazi mw isi, ngo mperengeteze musi y’ijuru ibifise umubiri vyose, biri n’ubugingo bihumeka; ibiri mw isi vyose bizopfa.

¹⁸Ariko nzoshinga isezerano nzogusezeranira: uzokwinjirana mur’ubgo bgato n’ abana bawe n’umugore n’abakazana bawe.

¹⁹Kandi mu bgoko bgose bg’ibiri n’ubugingo bifise umubiri, uze winjize mur’ ubgo bgato bibiri‐bibiri, kugira ngo birokokane nawe; ivyo bibe ikigabo n’ikigore.

²⁰Mu biguruka, nk’ukw amoko yavyo ari, no mu bitungano, nk’ ukw amoko yavyo ari, no mu vyikwega hasi vyose, nk’ukw amoko yavyo ari, bibiri‐bibiri vy’amoko yose bizoza ah’ uri, ngo birokoke.

²¹Kand’ uze wijanire mu biribga vyose, ubiziganye, kuko bizoba ivyo kubatunga, mwe n’ivyo muri kumwe.

²²Nuko Nowa abigenza artyo: ukw Imana yamubariye kwose ni ko yakoze.