Read Bibliya Yera 1951 Itanguriro 7 Bible Online

Itanguriro 7 - Bibliya Yera 1951 bible

Itanguriro 7

¹Maz’ Uhoraho abgira Nowa, ati Ni mwinjire mu bgato, mwe n’abo mu nzu yawe bose; kuko mu runganwe rw’ubu ari wewe wenyene nabonye ugororotse imbere yanje.

²Mu bitungano vyose bitazira no mu bikōko vyose bitazira, utwaremw’ ibigabo ndwindwi n’ibigore ndwi‐ndwi vyavyo; mu bikōko bizira na ho, utwaremwo bibiri‐bibiri, ikigabo n’ikigore caco;

³no mu biguruka mu kirere, utwaremw’ ibigabo ndwi‐ndwi n’ ibigore ndwi‐ndwi, kugira ng’uruvyaro rwavyo ruze rurokoke, rubone gusubira kubaho mw isi yose.

⁴Kukw imisi ndwi ishize, nzorekurira imvura kw isi imare imisi mirongwine igwa umurango n’ijoro, ibifise ubugingo vyose naremye ndabimare mw isi.

⁵Nuko Nowa abigenza nk’uk’ Uhoraho yabimugeze vyose.

⁶Igihe umwuzure w’amazi waza kw isi, Nowa yar’ amaze imyaka amajana atandatu.

⁷Nowa aca yinjirana mur’ ubgo bgato n’abana biwe n’umugore wiwe n’abakazana biwe, ngw ahunge ayo mazi y’ umwuzure.

⁸Mu bitungano bitazira no mu bikōko bitazira, no mu bizira na vyo, no mu biguruka, no mu vyikwega hasi vyose,

⁹bibiri‐bibiri vyinjirana na Nowa mur’ ubgo bgato, ikigabo n’ikigore, nk’ ukw Imana yamugeze.

¹⁰Maz’ iyo misi ndwi ishize, amazi y’umwuzure asendanisha kw isi.

¹¹Mu mwaka ugira amajana atandatu Nowa abayeho, mu kwezi kwa kabiri, ku musi wakwo w’icumi n’indwi, amasōko yose y’i kuzimu arapumuka, ingomero zo mw ijuru zose ziragomororwa.

¹²Imvura imara imisi mirongwine igwa kw isi umurango n’ijoro.

¹³Kur’ uwo musi nyene Nowa yinjira mur’ubgo bgato, bo na Shemu na Hamu na Yafeti abana biwe, n’umugore wiwe, n’abakazana biwe ukw ari batatu;

¹⁴binjirana n’ibikōko vyose nk’ukw amoko yavyo ari, n’ibitungano nk’ ukw amoko yavyo ari, n’ivyikwega hasi vyose nk’ukw amoko yavyo ari, n’ibiguruka mu kirere vyose nk’ ukw amoko yavyo ari, ibifise ivyubi vy’uburyo bgose.

¹⁵Vyinjirana na Nowa mu bgato, bibiri‐bibiri mu bifise umubiri vyose, biri n’ubugingo bihumeka.

¹⁶Ivyinjiye vyar’ ikigabo n’ikigore vyo mu bifise umubiri vyose, nk’ukw Imana yamugeze: maz’ Uhoraho amwugaranira imbere.

¹⁷Umwuzure umara kw isi imisi mirongwine, amazi aragāra, aterura bga bgato, buva kw isi burareremba.

¹⁸Amazi arīganza, yiyongeranya cane kugāra kw isi; maz’ ubgo bgato buzengerera hejuru ku mazi.

¹⁹Amazi arushiriza cane kwiganza kw isi, imisozi miremire yose yo musi y’ijuru iyo riva rikagera irarengerwa.

²⁰Amazi arīganza asumba imisozi, ayirenga amatambge cumi n’atanu y’ukuboko uciriye mu nkokora.

²¹Ibifise umubiri vyose bigenda kw isi birapfa, uhereye ku biguruka no ku bitungano no ku bikōko no ku vyikwega hasi vyose, no ku bantu bose.

²²Ibihumeka impwemu z’ubugingo mu mazuru vyose, vyaba i musozi, birapfa.

²³Ibifise ubugingo vyose biri kw isi biraherengetezwa, uhereye ku bantu no ku bitungano no ku vyikwega hasi no ku biguruka mu kirere: biherengetezwa kw isi; Nowa aba ari we asigara wenyene, bo n’ivyari kumwe na we muri bga bgato.

²⁴Amazi amara imisi ijana na mirongwitanu yīganziye kw isi.