Read Bibliya Yera 1951 Itanguriro 9 Bible Online

Itanguriro 9 - Bibliya Yera 1951 bible

Itanguriro 9

¹Maz’ Imana ihezagira Nowa n’ abana biwe, irababarira, iti Ni murondoke, mugwire, mwuzure isi.

²Ibikōko vyose vyo mw isi n’ibiguruka mu kirere vyose muzobitera ubgoba, bizobatinya; murabihawe, bo n’ibinyagara kw isi vyose, n’amafi yose yo mu kiyaga.

³Kand’ ibigenda vyose bifise ubugingo bizoba ivyo kurya vyanyu, mbibahaye vyose, nk’uko nabahaye ibimera bitotahaye.

⁴Ariko ntimukarye inyama zikirimw’ ubugingo bgazo, ni bgo maraso yazo.

⁵Kand’ amaraso yanyu, ari bgo bugingo bganyu, sinzobura kuyahōra: ar’ igikōko cose, ar’ umuntu, nzoyabihōra: ubugingo bg’umuntu nzobuhōra mugenzi we wese yabikoze.

⁶Ūzovisha amaraso y’ umuntu, n’ayiwe azovishwa n’abandi: kuk’ umuntu namuremye mw ishusho yanje, jewe Imana.

⁷Nuko namwe, ni murondoke, mugwire, muvyarire cane kw isi, muyigwiriremwo.

⁸Imana ibarira Nowa n’abana biwe,

⁹iti Rāba jewe ubganje nshinze isezerano mbasezeraniye, mwe n’uruvyaro rwanyu ruzobakomōkako,

¹⁰n’ibifise ubugingo vyose biri kumwe namwe, ibiguruka n’ibitungano n’ibikōko vyo kw isi muri kumwe: ek’ ibisohotse mu bgato vyose, ibikōko vyose vyo kw isi.

¹¹Nuko nshinze isezerano mbasezeraniye: ibifise umubiri vyose ntibizosubira kurandurwa n’amazi y’umwuzure ukundi, kandi ntihazobah’ umwuzure wo gutikiza isi ukundi.

¹²Imana iravuga, it’ Iki ni co kimenyamenya c’isezerano mbasezeraniye, mwe n’ibifise ubugingo vyose muri kumwe, uk’ urunganwe rwanyu ruzogenda rukurikirana gushitsa ibihe vyose.

¹³Nshize umuheto wanje ku gicu, ni wo munywamazi, uzoba ikimenyamenya c’isezerano nsezeraniye isi.

¹⁴Nuk’ uko nzozana igicu hejuru y’isi, uwo muheto w’umunywamazi uzobonekera kuri co,

¹⁵nanje nzokwibuka iryo sezerano ryanje nshize hagati yanje namwe bo n’ibiri n’ ubugingo vyose bifise umubiri: kand’ amazi ntazokwongera ukundi kuba umwuzure wo guhonnya ibifise umubiri vyose.

¹⁶Nuk’ uwo munywamazi ubaye ku gicu, nanje nzowitegereza nibuke iryo sezerano ry’intahava riri hagati yanje n’ibiri n’ubugingo bifise umubiri vyose biri kw isi.

¹⁷Imana ibarira Nowa, it’ Ico ni co kimenyamenya c’isezerano nashinze hagati yanje n’ibiri n’umubiri vyose biri kw isi.

¹⁸Bene Nowa bāsohotse mu bgato ni Shemu na Hamu na Yafeti: Hamu ni we se wa Kanani.

¹⁹Abo, ukw ari batatu, ni bo Nowa yavyāye: ni bo bākomōtsweko n’ abakwiye isi yose.

²⁰Nowa atangura kurima, atera uruzabibu:

²¹anywa vino y’izo nzabibu, araborerwa; impuzu zimuvako ari mw ihema ryiwe.

²²Hamu, se wa Kanani, abona ubgambure bga se, abibarira bene nyina bompi bari hanze.

²³Shemu na Yafeti bābīra umwambaro, bawukika ku bitugu vyabo bompi, bagenza imigongo, bapfuka ubgambure bga se: kand’ amaso yabo, kuko yar’ aroye irya, ntibabona ubgambure bga se.

²⁴Nowa vino imuvuyeko, amenya ivyo umuhungu wiwe muto yamukoreye.

²⁵Aravuga, ati Kanani abaye ikivume! Azoba umuja w’abaja kuri bene nyina.

²⁶Kand’ at’ Uhoraho aragahezagirwa, ni yo Mana ya Shemu; Kanani we n’abe umuja wiwe.

²⁷Imana yāgurire Yafeti, Abe mu mahema ya Shemu; Kanani we n’abe umuja wiwe.

²⁸Wa mwuzure uhise, Nowa amara imyaka amajana atatu na mirongwitanu.

²⁹Imisi yose Nowa yamaze yabaye imyaka amajana cenda na mirongwitanu: araheza arapfa.