Read Bibliya Yera 1951 2 Samweli 20 Bible Online

2 Samweli 20 - Bibliya Yera 1951 bible

2 Samweli 20

¹Hār’ umuntu w’umugesera yitwa Sheba, mwene Bikuri Umubenyamini; aca avuza inzamba, aravuga, ati Dawidi nta co tumwegako, nta mugabane dufise kuri mwene Isayi: yemwe Bisirayeli, hogi twitahire, umuntu wese aje i muhira!

²Nukw Abisirayeli bose bata Dawidi, bakondorera inyuma ya Sheba mwene Bikuri; arikw Abayuda bo bigumira ku mwami wabo, baramuherekeza kuva kuri Yorodani gushitsa i Yerusalemu.

³Nuk’ umwami Dawidi ashitse i we i Yerusalemu, ajana za ncoreke ziwe yagize abagore ukw ar’ icumi, abo yari yasigaranye urugo; abashira mu nzu, abaha ababarinda; abatungiraho, ariko ntiyasubira kubarārira. Nuko baguma ngaho barindwa, barinda bapfa bameze nk’abapfakazi.

⁴Maz’ umwami abarira Amasa, ati Nkoraniriza Abayuda hano mu misi itatu itarenze, kandi nawe uz’ ubeho.

⁵Nuko Amasa aja guhamagara Abayuda; arikw arenza imisi umwami yamubariye.

⁶Dawidi araheza abarira Abishayi, ati Sheba mwene Bikuri agiye kutugirira nabi kuruta Abusalomu; abe ari wewe ujana ingabo zanje, umukurikirane, kugira ngo ntiyegukire ibisagara vyubakiwe inzitiro z’amabuye, akaba atujanye.

⁷Nukw ingabo za Yowabu n’ Abakereti n’Abapeleti n’abahizi bose bakurikira Abishayi; bava i Yerusalemu baja guhīga Sheba mwene Bikuri.

⁸Bashitse ku gitandara kinini c’i Gibeyoni, Amasa aza kubasanganira; kandi Yowabu yari yambaye imyambaro y’intambara, ayikenyeje umukanda urikw inkota iri mu rwubati, yenena kw itako ryiwe; yīgīye imbere, iruvamw’ irakoroka.

⁹Yowabu abarira Amasa, ati N’amahoro ga ncuti? Yowabu araheza afatisha Amasa ukuboko kw’i buryo ku rusakanwa nk’ ūgira amusome.

¹⁰Ariko Amasa ntiyagira ico yibaza ku nkota Yowabu yar’ afise mu ntoke; nuko Yowabu ayimuzibura ku nda, amara yiwe asēseka hasi, ntiyarinda kugereka ubga kabiri; nukw arapfa. Maze Yowabu na Abishayi murumuna we bakomeza guhīga Sheba mwene Bikuri.

¹¹Umwe mu ngabo za Yowabu ahagarara hejuru ya Amasa, aravuga, at’ Ūkunda Yowabu, kand’ ūherereye ku ruhande rwa Dawidi, n’ akurikire Yowabu.

¹²Kandi Amasa yari hagati mu nzira arambaraye mu maraso yiwe, arikw arasāmba; maz’ uwo muntu abonye kw abantu bose bahashika bakarundana, aterura Amasa, amukūra mu nzira, amurambika hirya mu murima, amworosa impuzu; kuko yabonye k’uwamushikako wese yaca ahagarara.

¹³Nukw amaze gukūrwa mu nzira, abantu bose baca bakomeza inzira bakurikira Yowabu, baja guhīga Sheba mwene Bikuri.

¹⁴Sheba anyuragira mu miryango yose y’Abisirayeli, ashika i Abeli h’i Beti‐mayaka; maz’ Ababeriti bose barakorakorana, bamukurikirayo.

¹⁵Maz’ ingabo zose zari kuri Yowabu ziraza, zimusāgiririza i Abeli nyene h’i Beti‐mayaka, barunda ikirundo kur’ ico gisagara co kwūririrako, cegamiye uruzitiro rwaco; basita urwo ruzitiro kugira ngo baruhomvore.

¹⁶Maz’ umugore w’umunyabgenge wo mur’ ico gisagara ashira ijwi hejuru, aravuga, ati Ni mwumvirize, yemwe ni mwumvirize! Ndabinginze, mumbaririre Yowabu, mut’ Igira hino, ico akubarira.

¹⁷Nuko yigira hafi y’ah’ ari; nya mugore aramubaza, ati Ni wewe Yowabu? Na we at’ Ego me ni jewe. Aramubarira, ati Ni wumve amajambo yanje, jewe incoreke yawe; na we at’ Ego me ndumva.

¹⁸Aravuga, ati Kera bākunda kuvuga, bati Ni bagīshe inama i Abeli; kandi rero vyaca bihera.

¹⁹Jewe nd’umwe mu bakunda ivy’ amahoro kandi b’abizigirwa mu Bisirayeli; ariko wewe urondera kugeseza igisagara, ari co muvyeyi mu Bisirayeli. N’iki gituma ugomba kuyongobeza ishamvu y’Uhoraho?

²⁰Yowabu aramwishura, ati Biragahera! Biragahera ko hogira ico noyongobeza canke nogeseza!

²¹Si ko biri; ariko harih’ umuntu wo mu mugamba w’Abefurayimu yitwa Sheba mwene Bikuri, yagararije umwami Dawidi; mube ari we mutanga wenyene, mbone kubavira ku gisagara. Nya mugore yishura Yowabu, ati Nuko rero, umutwe wiwe turawurenza uruzitiro tuwugushiburire.

²²Maz’ uwo mugore aja mu bantu bose ajanye inama y’ubgenge; na bo baragenda baca izosi Sheba mwene Bikuri, bashiburira Yowabu umutwe wiwe. Na we araheza avuza inzamba, abantu bose bava ku gisagara, baratandukana, umuntu wese ataha i we. Yowabu na we atabarukira i Yerusalemu i bgami.

²³Kandi Yowabu yar’ umugabisha w’ingabo zose z’Abisirayeli; Benaya mwene Yehoyada ni we yagabisha Abakereti n’Abapeleti;

²⁴Adoramu na we yagaba ivy’ ikori; Yehoshafati mwene Ahiludi ni we yar’ umwanditsi w’ivyaja biraba;

²⁵Shewa yar’ umukarani; Sadoki na Abiyatari ni bo bār’ abaherezi;

²⁶Ira w’Umuyayiri na we yar’ umujenama mukuru wa Dawidi.