Read Bibliya Yera 1951 2 Samweli 22 Bible Online

2 Samweli 22 - Bibliya Yera 1951 bible

2 Samweli 22

¹Dawidi yabariye Uhoraho amajambo yo mur’ iyi ndirimbo, umusi Uhoraho yamurokoye, akamukūra mu maboko y’ abansi biwe bose, no mu ya Sauli.

²Aravuga, at’ Uhoraho n’igitandara canje, n’ubuhungiro bganje, n’umurokozi wanje,

³N’Imana igitandara canje; ni we nzohungirako. Ni we nkinzo yanje, n’ihembe ry’agakiza kanje, n’ umunara wanje wo guhungiramwo, n’ubgugamo bganje; Ni wewe Mukiza wanje, unkiza umuryano w’abantu.

⁴Ndambaza Uhoraho abereye gushimwa: Ni ho nzokizwa abansi banje.

⁵Imipfunda y’urupfu yaranyizingiriyeko, Isūri zo kurandura zanteye ubgoba.

⁶Ingoyi z’i kuzimu zantaye hagati, Imitego y’urupfu yantanze imbere.

⁷Mu mubabaro wanje nambaje Uhoraho, Mbere natakambiye Imana yanje; Yumva ijwi ryanje iri mu ngoro yayo, Ivyo natakamvye biyishika mu matwi.

⁸Maz’ isi iratigita, ihinda agashitsi, Amatanguriro y’ijuru aranyiganyiga, Atigitishwa n’uburake bgayo.

⁹Umwotsi upfunduka mu mazuru yayo, Umuriro uva mu kanwa kayo, urayigiza, Amakara afatishwa na wo.

¹⁰Yandaza ijuru, na yo nyene iramanuka, Umwiza w’umuzitanya wari musi y’ibirenge vyayo.

¹¹Iguruka ivyagiye ku mukerubi,[11] Mbere yabonetse igendera ku mababa y’umuyaga.

¹²Umwiza iwugira ihema riyisāgiriye; Isāgīrwa n’ibicu bibungenze amazi, ibicu bitwaye intunda vyo mw ijuru.

¹³Ubgiza bukayangana bur’ imbere yayo Butuma amakara yaka.

¹⁴Uhoraho aturagara ari mw ijuru, Ūsumba vyose avugisha ijwi ryiwe.

¹⁵Arasa imyampi yiwe, ashwiragiza abansi banje, Arekura imiravyo, abaca umuhongo.

¹⁶Maz’ agataka ko musi y’ikiyaga karaboneka, Amatanguriro y’isi aratwikururwa, Bitewe n’uguhana kw’Uhoraho, N’ugufūha kw’impwemu ziva mu mazuru yiwe.

¹⁷Atuma ukuboko ari hejuru, aramfata, Andoba mu mazi menshi.

¹⁸Ankiza umwansi wanje akomeye, N’abanyanka, kuko bandusha inkomezi.

¹⁹Bari bantanze imbere ku musi w’amagorwa yanje, Arik’ Uhoraho ni we yambereye ubgishimikizo.

²⁰Abinkūramwo, anshira ahantu hāgutse: Yandokoye kuko namuhimbaye.

²¹Uhoraho yangereye ibikwiranye n’ukugororoka kwanje, Nk’ukw amaboko yanje atanduye, ni ko yangiriye.

²²Kuko nitondeye inzira z’ Uhoraho, Kandi sinakoze icaha co kureka Imana yanje:

²³Kukw amateka yayo yose yar’ imbere yanje, Kandi sinatirimutse ngo mve mu vyagezwe vyayo.

²⁴Narayitunganira, Nirinze ukugabitanya kwanje.

²⁵Ni co catumye Uhoraho anyishura ibikwiranye n’ukugororoka kwanje, Ibikwiranye n’ukutandura kwanje mu nyonga ziwe.

²⁶Ku munyembabazi uzokwiyerekana ur’ umunyembabazi; K’ūtunganye uzokwiyerekana ur’ ūtunganye;

²⁷K’ūtanduye uzokwiyerekana ur’ ūtanduye; Ku ntabarirwa uzokwiyerekana ur’ ūdadika.

²⁸Abacishijwe bugufi uzobakiza, Arikw igitsure cawe kiri ku bībone, kugira ng’ ubasubize hasi.

²⁹Kukw ari wewe tara ryanje, Uhoraho; Uhoraho ni we yākira umwiza wanje.

³⁰Kukw ari wewe unshoboza gutera umuce w’ingabo, Kand’ ar’ Imana yanje inshoboza gusimba uruzitiro rw’ amabuye.

³¹Imana yo, inzira yayo iratunganye rwose, Ijambo ry’Uhoraho ryaravugutiwe: Ni we nkinzo ikīngīra abamuhungirako bose.

³²Ni nde Mana, atar’ Uhoraho? Ni nde Gitandara, atar’ Imana yacu?

³³Imana ni yo buhungiro bganje bukomeye; Irōngōra umugororotsi mu nzira yayo.

³⁴Ni yo ihindura ibirenge vyanje nk’ivy’ impongokazi, Impagarika ku dutwe tw’ imisozi yanje.

³⁵Yigisha intoke zanje kurasana, Bituma amaboko yanje afora umuheto w’umuringa.

³⁶Kandi wampaye inkinzo, ni yo gakiza kawe, Ukwicisha bugufi kwawe kwanshize hejuru.

³⁷Intambuko zanje wazāguriye inzira, Ibirenge vyanje ntivyanyereye.

³⁸Nakinagije abansi banje, ndabarandura, Sinatabaruka badaheze.

³⁹Narabatobekeranije, ntibābasha kuvyuka; Mbere bāguye musi y’ibirenge vyanje.

⁴⁰Wankenyeje inkomezi ngo ndwane, Abarwanizi banje wabamaze igabo.

⁴¹Watumye ababisha banje bampa ibitugu, Kugira ngo ndandure abanyanka.

⁴²Bārēraguje, babura ūbakiza; Batakambiye Uhoraho, ntiyabishura.

⁴³Maze ndabasya, bacika nk’ umukungugu wo kw isi, Ndabasiribanga nk’umwavu wo ku nzira, ndabashwiragiza.

⁴⁴Wankijije indwano z’abantu banje, Waranzigamye ngo nganze amahanga; Ihanga ntigeze kumenya ryaransavye.

⁴⁵Abanyamahanga baje banyunamira bampema; Bumvise inkuru yanje baca baranyoboka.

⁴⁶Abanyamahanga barakabiranye, Bava mu binyegero vyabo bahinda agashitsi.

⁴⁷Uhoraho yamaho; Igitandara canje gihimbazwe; Imana, Igitandara c’agakiza kanje, ishirwe hejuru:

⁴⁸Ni yo Mana impōra, Ikangandūrira amahanga nkayaganza.

⁴⁹Inkūra mu babisha banje: Mber’ unshira hejuru y’abampagurukira, Unkiza n’umuntu w’ikirara.

⁵⁰Ni co gituma, Uhoraho, nzogushimira mu mahanga, Ndirimbe ishimwe ry’izina ryawe.

⁵¹Umwami yimitse amugabira agakiza gakomeye, Agirira imbabazi umwami yimikishije amavuta, Ni Dawidi n’uruvyaro rwiwe ibihe bidashira.