Read Bibliya Yera 1951 2 Samweli 4 Bible Online

2 Samweli 4 - Bibliya Yera 1951 bible

2 Samweli 4

¹Bukeye Ishibosheti mwene Sauli yumvise ko Abuneri yaguye i Heburoni, arajonjogora, Abisirayeli bose bahagarika imitima.

²Kandi mwene Sauli uwo yar’ afise abagabisha babiri b’ imice y’ingabo, umwe yitwa Bayana, uwundi Rekabu, bari bene Rimoni w’i Beroti, wo mu muryango wa Benyamini. (Kukw i Beroti hāharūrwa ku Babenyamini;

³kand’ ab’ i Beroti bari barahungiye i Gitayimu, bagumayo kugeza na bugingo n’ubu.)

⁴Kandi Yonatani mwene Sauli yar’ afise umwana yamugaye ibirenge. Igihe imbitsi yaza ivuye i Yezireli kubika Sauli na Yonatani, uwo mwana yar’ amaze imyaka itanu avutse; maz’ umurezi wiwe aramuhitana, arahunga; akinyaragasa ahunga, aramukorokana, yikubita hasi, aca amugara. Nya mwana yitwa Mefibosheti.

⁵Bukeye bene Rimona w’i Beroti, Rekabu na Bayana, baraza, bashika kwa Ishibosheti, igihe yar’ avyukiriye mu mashōka.

⁶Kand’ incoreke ikumīra yari yamye aragosora ingano, iterwa n’itiro, irasinzira; nuko Rekabu na Bayana mwene nyina babona akaryo ko kwinjira.

⁷Bīteye mu ngoro, barenga mw iteka basanga aryamye ku kirwa, baramucumita, baramwica, bamuca izosi; baraheza bajana umutwe wiwe, bagenda ijoro ryose bajanye ikiyaya Araba.

⁸Maz’ uwo mutwe wa Ishibosheti bawushīra umwami Dawidi i Heburoni, baramubarira, bati Nguyu umutwe wa Ishibosheti umwana w’ umwansi wawe Sauli, yahora aguhīga; Uhoraho ashubirije Sauli mu nkōko, n’abana biwe, abaguhōye, mwami wacu nyen’ ingoma.

⁹Maze Dawidi yishura Rekabu na mwene nyina Bayana, bene Rimona w’i Beroti, ati Ndahiye uguhoraho kw’Uhoraho, yagiye andokora mu vyago vyose;

¹⁰igihe umuntu yaje kumbarira, at’ Erega Sauli yapfuye, agira ngw anzaniye inkuru nziza, naciye ndamufata, ndamwicira aho nyene i Sikulagi; iyo ni yo ngero namugereye ku nkuru yiwe.

¹¹None mbega, abantu b’inkozi z’ibibi basanze umuntu w’umugororotsi mu nzu yiwe yiryamiye ku buriri bakamwica, sindushiriza kubahōra amaraso yiwe, nkabarandura nkabakūra mw isi?

¹²Maze Dawidi abarira imisore yamugendanira, barabīca, babaca ibikonjo n’ibirenge, babamanika i ruhande y’ikidengeri c’i Heburoni. Arik’ umutwe wa Ishibosheti barawābīra, bawuhamba mu mva ya Abuneri i Heburoni nyene.