Read Bibliya Yera 1951 1 Abami 13 Bible Online

1 Abami 13 - Bibliya Yera 1951 bible

1 Abami 13

¹Yerobowamu agihagaze ku gicaniro, agira yōse imibavu, haza umuntu w’Imana avuye i Buyuda, aje i Beteli, azanywe n’ ijambo ry’Uhoraho.

²Avuga n’ ijwi rirenga, avugishijwe n’ijambo ry’Uhoraho, abarira ico gicaniro, at’ Ewe wa gicaniro, ewe wa gicaniro! Uku ni k’Uhoraho agize, ngo Mu nzu ya Dawidi hazovuka umwana yitwa Yosiya; ngo Kand’ abaherezi bo mu bitabo vyo ku mpinga z’imisozi bahora bosereza imibavu kuri wewe, ng’ Uyo azobatanga bga bimazi kuri wewe nyene, ngo Kandi kuri wewe ni ho bazoturirira amagufa y’ abantu.

³Kandi kur’ uwo musi nyene abaha ikimenyamenya, at’ Iki ni co kimenyamenya Uhoraho atanze: iki gicaniro kigira gisaduke, umunyota wo kuri co usēseke.

⁴Maz’ umwami Yerobowamu yumvise ijambo uwo muntu w’Imana yasemereye, avugiye kur’ ico gicaniro c’i Beteli, amutunga ukuboko ahagaze ku gicaniro, aravuga, ati Ni mumufate! Uwo mwanya ukuboko yar’ amutunze guca kuranyūnyūka, bituma adashobora kukwigarukanako.

⁵Igicaniro na co gica kirasaduka, umunyota wo kuri co urasēseka, nk’ukw ikimenyamenya uwo muntu w’Imana yabahaye kiri, abivugishijwe n’ ijambo ry’Uhoraho.

⁶Maz’ umwami abarira uwo muntu w’ Imana, at’ Inginga Uhoraho Imana yawe ampangaze, unsabire, ukuboko kwanje gukire. Nuk’ uwo muntu w’Imana yinginga Uhoraho, ukuboko kw’umwami kurakira, gusubira kumera uko kwahora.

⁷Maz’ umwami abarira uwo muntu w’Imana, ati Ngwino tujane i wanje, ndakuzimane, nteko ndagutāsure.

⁸Uwo muntu w’Imana yishura umwami, ati Naho wompa igihimba c’ivyo mu ngoro yawe, nta ho twojana i wawe; kandi sinshobora kugira ico ndīra ino, canke ngo ndahanywere n’amazi;

⁹kukw ari kw ijambo ry’Uhoraho ryanyihanikirije, ngo Sinze ngire ico ndya, canke ngo nnywe n’amazi, kandi ngo sinze nsubire mu nzira nazananye.

¹⁰Nukw aragenda, ajana iyindi nzira, ntiyasubira mu nzira yazananye aza i Beteli.

¹¹Kand’ i Beteli hār’ umutāma yavugishwa n’Imana; abahungu biwe baraza, bamwīgānira ivyo uwo muntu w’Imana yakoreye i Beteli vyose uwo musi; n’amajambo yabariye umwami, na yo bayīgānira se.

¹²Se arababaza, at’ Aciye mu yihe nzira? Kand’ uwo muntu w’Imana yavuye i Buyuda, abo bahungu bari babonye inzira aciyemw’ iy’ ari yo.

¹³Nukw abarira abahungu biwe, ati Ni munshirire amatandiko ku ndogoba. Bayamushiriyeko, arayūrira,

¹⁴akurikira uwo muntu w’Imana, asanga yicaye musi y’igiti c’umweloni, aramubaza, ati Mbega ni wewe muntu w’Imana waje uva i Buyuda? Na we at’ Ego me ni jewe.

¹⁵Aramubarira, ati Ngwino dusubirane i muhira, ufūngure.

¹⁶Aramwishura, ati Sinemererwa gusubirana inyuma nawe, canke ngo tujane i wawe, canke ngo ngire ico nsangirira nawe aha hantu, ar’ ico kurya cank’ ico kunywa;

¹⁷kuko nabariwe n’ ijambo ry’Uhoraho, ngo Sinze ngire ico ndya, canke ngo nnywe n’amazi, kandi ngo sinze nsubire mu nzira nazananye.

¹⁸Na we aramwishura, ati Nanje nd’ ūvugishwa n’Imana nkawe, kand’ umumarayika yambariye avugishijwe n’ijambo ry’Uhoraho, ati Genda umugarure, umujane i wawe, umuhe ico arya n’ico anywa. Ariko yaramubesha.

¹⁹Nuko basubirana inyuma; bashitse i we amuha ico arya n’ico anywa.

²⁰Bakiri ku meza, ijambo ry’ Uhoraho riza kuri wa muvugishwa yamugaruye;

²¹avuga n’ijwi rirenga, abarira uwo muntu w’ Imana yavuye i Buyuda, at’ Uku ni k’Uhoraho agize, ngo Ko wanse kwumvira ijambo ryiwe, ntiwitondere icagezwe ciwe, Uhoraho Imana yawe,

²²ariko ng’ Ukagaruka, ukarya ivyo kurya ukanywera n’amazi ahantu yakubujije, ngo Ntuz’ ugire ico urya cank’ ico unywa; ngo Nuko rero, umuvyimba wawe ntuzoruha ushika mu mva ya ba sogokuruza.

²³Hanyuma amaze kurya no kunywa, wa muvugishwa yamugaruye amushirira amatandiko ku ndogoba;

²⁴nukw aragenda; araheza ahūra n’intambge, iramwica, umuvyimba wiwe urambarara mu nzira, indogoba iwuhagarara i ruhande; intambge na yo ihagarara i ruhande y’uwo muvyimba nyene.

²⁵Maz’ abantu bahaciye, babona uwo muvyimba urambaraye mu nzira, n’intambge iwuhagaze i ruhande; baragenda babivuga mu gisagara ah’ uwo muvugishwa w’umutāma yaba.

²⁶Maz’ uwo muvugishwa yamugaruriye mu nzira avyumvise, aravuga, ati Ni wa muntu w’ Imana atumviye ijambo ry’Uhoraho; ni co gitumye Uhoraho amutērēra intambge, ikamutabagura, ikamwica, nk’ukw ijambo ryiwe ryamubariye.

²⁷Araheza abarira abahungu biwe, ati Ni munshirire amatandiko ku ndogoba; nuko bayashira kuri yo.

²⁸Nukw aragenda, asanga uwo muvyimba urambaraye mu nzira, na ya ndogoba n’intambge bihagaze i ruhande yawo; arikw iyo ntambge ntiyari yariye uwo muvyimba, canke ngw itabagure iyo ndogoba.

²⁹Nuk’ uwo muvugishwa w’umutāma aterura umuvyimba w’uwo muntu w’Imana, awuremēka iyo ndogoba, arawuhindukirana, awujana mu gisagara, ngw amuririre, amuhambe;

³⁰ahamba uwo muvyimba mu mva yiwe yari yiyimbiye; baramuborogera, bati Yō! Ewe mwene data!

³¹Nukw amaze kumuhamba, abarira abahungu biwe, ati Ni napfa, muze mumpambe mur’ iyi mva uwo muntu w’Imana ahambgemwo; umuvyimba[6] wanje muze muwurambike i ruhande y’amagufa yiwe.

³²Kukw ivyo yavuze n’ijwi rirenga ata kizobibuza gushika, abivugishijwe n’ijambo ry’Uhoraho, abarira ico gicaniro c’i Beteli n’utunyabugoro twose two mu bitabo vyo mu bisagara vy’i Samariya.

³³No hanyuma y’ivyo, Yerobowamu ntiyahindukiye ngw areke inzira yiwe mbi, arikw akomeza gupfa gutoranya mu bantu bose abo agira abaherezi bo mu bitabo; uwabigomba wese yaramurobanura, kugira ngw abe umuherezi wo mu bitabo.

³⁴Nukw ico kibera inzu ya Yerobowamu akaziri, kiraruha kiyikwegera gucibga no guheneberezwa kw isi.