Read Bibliya Yera 1951 1 Abami 14 Bible Online

1 Abami 14 - Bibliya Yera 1951 bible

1 Abami 14

¹Ico gihe Abiya mwene Yerobowamu ararwara.

²Yerobowamu abarira umwamikazi wiwe, at’ Enda genda wiyoberanye, kugira ngo woye kumenyekana k’ur’ uwanje, uheze uje i Shilo; ni ho ūvugishwa n’Imana Ahiya aba, umwe yavuga ko nzoba umwami w’aba bantu.

³Ujane amarobe cumi y’imitsima, n’ utundi dutsima dukaranze, n’ ikarabo ry’umutsama w’ubūki, uje i we; na we azokubarira ivy’ uyu mwana ivy’ ari vyo.

⁴Nuk’ umwamikazi wa Yerobowamu abigenza artyo, arahaguruka, aja i Shilo kwa Ahiya. Kandi Ahiya ntiyar’ agishobora kubona, kukw amaso yiwe yar’ asigaye ar’ ivyijiji kubg’ ubusāza.

⁵Maz’ Uhoraho abarira Ahiya, at’ Ehe muka Yerobowamu araje kukubaza ivy’ umwana wiwe arwaye; nuk’ umubgire ibi n’ibi; kandi ni yashika, aza kuba yihinduye uwundi.

⁶Nuko Ahiya, yumvise ibirenge vyiwe acinjira mu muryango, aramubarira, ati Shika, yewe muka Yerobowamu! N’iki gitumye wihindura uwundi, kandi ngutumwekw inkuru mbi?

⁷Genda ubarire Yerobowamu, ut’ Uku ni k’Uhoraho, Imana y’ Abisirayeli, agize: ngo Yagukūye mu bandi bantu, agushira hejuru, ngw Akugira segaba w’abantu biwe b’Abisirayeli;

⁸ngw Akugabaniriza igihugu, agikūye ku nzu ya Dawidi; ngw Ariko wewe ntiwamumereye nk’umusavyi wiwe Dawidi yitondera ivyagezwe vyiwe, ngw Akamukurikira n’ umutima wiwe wose, agakora ibishimwa imbere yiwe;

⁹ngw Arik’ ukora ibibi kurenza abakubanjirije bose, ng’ Uragenda wironderera izindi mana z’ibishushanyo bivugutiwe mu nkero, ng’ Uramuratsa, umushiburira inyuma yawe;

¹⁰ngo Nuko rero, ngo Ni co kizotuma atēza ivyago inzu ya Yerobowamu, agaherengeteza izinamuhungu wese kuri Yerobowamu aho bava bakagera mu Bisirayeli, ngw Agafyēfyētura inzu ya Yerobowamu, nk’uk’ umuntu afyēfyētura amavyi akayamaririkanya.

¹¹Ng’ Ūzogwa mu gisagara mu ba Yerobowamu azoribga n’imbga; ng’ Ūzogwa mu gahinga azoribga n’ibisīga, kuk’ Uhoraho ari we abivuze.

¹²Nuko rero haguruka utahe i muhira; mugabo, ukigira ng’ urashinga ibirenge ku murwa, uwo mwana azoca acikana.

¹³Kand’ Abisirayeli bose bazomuririra, bamuhambe; uwo ni we wenyene mu ba Yerobowamu azohambga mu mva, kuko mu nzu ya Yerobowamu ari we gusa yagize ivyiza abonekwakw imbere y’Uhoraho, Imana y’ Abisirayeli.

¹⁴Kand’ Uhoraho azokwihagurukiriza mu Bisirayeli umwami azohonnya ab’ inzu ya Yerobowamu uwo musi.

¹⁵Kuk’ uhereye ubu, Uhoraho agiye gukubita Abisirayeli, babe nk’ irenga rinyiganyigira mu mazi, arandure Abisirayeli mur’ iki gihugu ciza yari yarahaye ba sekuruza, abashwiragirize hakurya ya rwa ruzi Efurate, kuko bashingiye Ashera inkingi, bagatera umwikomo Uhoraho, bakamuratsa.

¹⁶Kand’ azoheba Abisirayeli, abahōye ivyaha Yerobowamu yakoze, akabikwegeramwo n’Abisirayeli.

¹⁷Nuko muka Yerobowamu arahaguruka, aragenda, asubira i Tirusa; agishika ku muryango w’ingoro, uwo mwana aracikana.

¹⁸Abisirayeli bose baramuhamba, baramuririra, nk’ukw ijambo Uhoraho yavugishije umusavyi wiwe Ahiya riri.

¹⁹Ibindi vyose vyadonzwe kuri Yerobowamu, n’intambara yarwanye, n’uburyo yaganje, vyanditswe mu gitabo c’ivyo ku ngoma z’abami b’Abisirayeli.

²⁰Igihe Yerobowamu yamaze ari ku ngoma yabaye imyaka mirongwibiri n’ibiri; nukw ahamvya ba sekuruza, maz’ umuhungu wiwe Nadabu asubira ku ngoma yiwe.

²¹Kandi Rehobowamu ni we yabaye ku ngoma i Buyuda; yimye amaze imyaka mirongwine n’umwe, yamaze ku ngoma imyaka cumi n’indwi i Yerusalemu, umurwa Uhoraho yari yaritoranirije mu miryango yose y’Abisirayeli, ngw ahashire izina ryiwe; nyina yitwa Nayama w’Umwamonikazi.

²²Maz’ Abayuda bakora ivyo Uhoraho abona kw ari bibi, bamuteza ifuhe ivyaha bakoze, birengeye ivyo ba sekuruza bakoze vyose.

²³Kuko bītabiye ibitabo, bagashinga n’amabuye kw inkingi, bo n’inkingi bashingiye Ashera, ku musozi muremure wose no musi y’igiti cose gitotahaye.

²⁴Mbere mur’ ico gihugu hāri n’abagabo bendana. Kandi bākora ibizira vyose abanyamahanga bākora, abo Uhoraho yirukanye imbere y’Abisirayeli.

²⁵Maze mu mwaka ugira gatanu umwami Rehobowamu ari ku ngoma, Shishaki umwami wa Egiputa aradūga atera i Yerusalemu;

²⁶asahura ivy’ ubutunzi vyari bibītswe mu ngoro y’Uhoraho n’ivyo mu ngoro y’umwami, arabijana vyose, ajana n’inkinzo zose z’amazahabu Salomo yari yaracurishije.

²⁷Maz’ umwami Rehobowamu acurisha izindi nkinzo mu miringa zo gusubira mu gishingo cazo, azizēza abakuru b’ abashibamyi bāshibama ku gisapfu c’ingoro y’umwami.

²⁸Kand’ uk’ umwami yaja mu ngoro y’Uhoraho, abo bashibamyi bāgenda bazijanye, hanyuma bakazigarukana bakazisubiza mu nzu yabo.

²⁹Ibindi vyose vyadonzwe kuri Rehobowamu, n’ivyo yakoze vyose, none ntivyanditswe mu gitabo c’ivyo ku ngoma z’abami b’Abayuda?

³⁰Kandi hāmah’ intambara hagati ya Rehobowamu na Yerobowamu na ntaryo.

³¹Nuko Rehobowamu ahamvya ba sekuruza, ahambga hamwe na bo ku murwa wa Dawidi; kandi nyina yitwa Nayama w’Umwamonikazi. Maz’ umuhungu wiwe Abiya asubira ku ngoma yiwe.