Read Bibliya Yera 1951 1 Abami 17 Bible Online

1 Abami 17 - Bibliya Yera 1951 bible

1 Abami 17

¹Bukeye Eliya w’i Tishubi, umwe mu bāgerereye i Gileyadi, aragenda abarira Ahabu, ati Ndahiye uguhoraho kw’Uhoraho, Imana y’Abisirayeli, ari we nyene nsavye, yukw ata kime kizotonda cank’ imvura ngw ikoroke mur’ iyi myaka, atari jewe mbivuze.

²Hanyuma ijambo ry’Uhoraho rimuzako,

³riti Va hano ugende werekeye i burasirazuba, winyegeze ku mugezi Keriti, ahahera i burasirazuba bga Yorodani.

⁴Uzohora unywa ku mazi yawo, kandi nageze ibikona ko bizohora bikugaburirirayo.

⁵Nukw aragenda, agira nk’ukw ijambo ry’ Uhoraho ryamubariye, aja kur’ uwo mugezi Keriti, ahahera i burasirazuba bga Yorodani, agumayo.

⁶Ibikona bikāma bimuzanira umutsima n’inyama uko bukeye, mu gitondo no ku mugoroba; kand’ akāma anywa amazi kur’ uwo mugezi.

⁷Igihe kiragera uwo mugezi urakama, kukw ata mvura yagwa mur’ ico gihugu.

⁸Maz’ ijambo ry’Uhoraho rimuzako,

⁹riti Va hasi, uje i Zarefati mu ntāra y’Abasidoni, abe ari ho uba; rāba ngeze umugore w’ umupfakazi waho kuzokwama akugaburira.

¹⁰Nukw akora inzira, aja i Zarefati; agishika kw irembo ry’igisagara, agize artya abona umugore w’umupfakazi arikw aratoragura udukwi. Eliya aramuhamagara, aramubarira, ati Ntabara urābe ico wonzaniramw’ utuzi two kunywa.

¹¹Akirikw aragenda kuyazana, aramuhamagara, at’ Urantabara unzanire n’ utwo notamira.

¹²Aramwishura, ati Nkurahiye uguhoraho kw’ Uhoraho Imana yawe, nta co mfise co kurya, atar’ agafu ku rushi gasigaye mu gaseke, n’uturāngūzwa tw’amavuta ya elayo mu gakarabo; mber’ ubu ngira ntoragure udukwi tubiri, kugira ngo ngende i muhira ndakīcumbire, twe n’umwana wanje, tukarye, duheze duhwere.

¹³Eliya aramwishura, ati Ntutinye: genda ugire nk’uk’ uvuze; mugabo, ubanze uncumbireko gatoya, ukanzanire hano, uheze ubone kwicumbira, mwe n’umwana wawe;

¹⁴kuk’ ukw ari k’Uhoraho Imana y’Abisirayeli agize, ngw Ako gaseke ntikazoshiramw’ ifu, n’ako gakarabo ntikazoshiramw’ amavuta, gushitsa ku musi Uhoraho azorekurira imvura kw isi.

¹⁵Nukw aragenda, agira nk’uko Eliya yavuze; kand’ uwo mugore n’abo mu rugo rwiwe na Eliya babirya igihe kirekire.

¹⁶Ako gaseke ntikāshiramw’ ifu, n’ako gakarabo ntikāshiramw’ amavuta, nk’ukw ijambo ry’Uhoraho ryavuze, iryo yavugiye muri Eliya.

¹⁷Hanyuma y’ivyo, umwana w’ uwo mugore nyen’ urugo ararwara; indwara yiwe ikomeza kuja imbere gushitsa ah’ atagihumeka.

¹⁸Nyina abarira Eliya, ati Twapfuye iki ga muntu w’Imana? Waje i wanje kwibukiriza ivyaha vyanje, no kunyicishiriza umwana?

¹⁹Eliya aramubarira, ati Mpa uwo mwana wawe. Nukw amumukūra mu gikiriza, aramuterura, amwūrirana mu cumba co hejuru, ah’ arāra, amurambika ku buriri bgiwe.

²⁰Araheza atakambira Uhoraho, at’ Ewe Uhoraho Mana yanje, mbeg’ uyu mupfakazi yampaye indāro, umuteje ivyago ng’ umwicire umwana?

²¹Maze yubarara kur’ uyo mwana ibihetangabo gatatu, atakambira Uhoraho, at’ Ewe Uhoraho Mana yanje, ndakwinginze, ubugingo bg’uyu mwana bumugarukemwo.

²²Nuk’ Uhoraho yumvira Eliya, ubugingo bg’uyo mwana bumugarukamwo, arahēmbūka.

²³Maze Eliya yābīra uwo mwana, aramwururukana amukūye mur’ ico cumba co hejuru, aramwinjirana amuha nyina; Eliya aramubarira, at’ Eh’ umwana wawe ni muzima.

²⁴Uwo mugore abarira Eliya, ati Noneho mmenye k’ur’ umuntu w’Imana koko, kandi kw ijambo ry’Uhoraho uvuga ar’ iry’ ukuri.