Read Bibliya Yera 1951 2 Abami 10 Bible Online

2 Abami 10 - Bibliya Yera 1951 bible

2 Abami 10

¹I Samariya hār’ abahungu mirongwirindwi bandurutse kuri Ahabu. Bukeye Yehu yandika ivyete, abirungika i Samariya ku bakuru b’igisagara no ku bashingantahe no ku bājejwe abo buzukuru ba Ahabu;

²ati Bene shobuja ko mubafise ngaho, mukaba muri n’imikogote y’intambara n’amafarasi, n’igisagara kizitijwe inzitiro z’amabuye, n’ibirwanishwa; ico cete ni cabashikīra,

³mutoranye uwo muri bene shobuja ashimwa kand’ abereye kurusha abandi, mube ari we musubiza ku ngoma ya se, murwanire inzu ya shobuja.

⁴Ariko baranduka umutima, baravugana, bat’ Abo bami bompi ko batāshoboye guhagarara imbere yiwe, none ni twebge twobishobora?

⁵Nuk’ umubgiriza wo mu rugo, n’umukuru w’umurwa, n’ abashingantahe bo n’abājejwe ba bana, batuma kuri Yehu, uti N’ abasavyi bawe; ut’ Ivy’ ubagera vyose ni vyo bazokora; uti Kandi nta n’umwe bazokwimika; ut’ Ugire uk’ ugomba.

⁶Yongera kubandikira icete ubga kabiri, at’ Asangwa muherereye ku ruhande rwanje, mukemera kunyumvira, ni muce amazosi bene shobuja, imitwe yabo muze muyinsanze i Yezireli ejo nk’iki gihe. Kand’ abo bana b’umwami ukw ari mirongwirindwi, bari kumwe n’abashingantahe bo ku murwa, ari bo nyene bāri bārabajejwe.

⁷Nukw ico cete kibashikiriye, bafata abo bana b’umwami, babica ukw ari mirongwirindwi; imitwe yabo bayishira mu bisimbo, bayimurungikira i Yezireli.

⁸Intumwa iraza iramubarira, iti Barazanye imitwe ya ba bana b’umwami. Aravuga, ati Ni muyirunde ibirundo bibiri kw irembo, iharāre gushitsa ejo.

⁹Bukeye mu gitondo arasohoka, arahagarara, abarira abantu bose, ati Mweho nta co muriko: jeho ni ko nagararije databuja, ndamwica, arikw aba bose bāhumbikiranijwe na ba nde?

¹⁰Nuko mumenye kw ata jambo na rimwe Uhoraho yavuze ku nzu ya Ahabu rizokorokera hasi; ereg’ Uhoraho ashikije ivyo yavugishije umusavyi wiwe Eliya.

¹¹Maze Yehu ageseza abari basigaye bose mu b’ inzu ya Ahabu i Yezireli, bo n’ abamenyekana biwe bose n’abakunzi biwe n’abaherezi biwe, ntiyasigaza n’uwa kirazira.

¹²Araheza arahaguruka avayo, aja i Samariya; ari ku nzira, ashitse i Betekedi‐harowimu,

¹³ahūra n’ab’ i wabo wa Ahaziya umwami w’i Buyuda; arababaza, ati Mur’ aba hehe? Baramwishura, bati Tur’ ab’ i wabo wa Ahaziya, kandi tumanutse kuramutsa abana b’umwami n’abana b’umugabekazi.

¹⁴Abarira abari kumwe na we, ati Ni mubafate. Barabafata, babatsinda ku rwobo rw’i Betekedi; bose na bose bar’ abantu mirongwine na babiri, ntiyasiga n’ uwa kirazira.

¹⁵Avuye aho, ahūra na Yehonadabu mwene Rekabu aje kumusanganira; aramuramutsa, aramubaza, ati Mbeg’ urafatanije nanje bivuye ku mutima, nk’uko nanje numva mfatanije nawe? Yehonadabu aramwishura, at’ Ego me turafatanije. Na we at’ Asangw’ ari ko biri, mpa ukuboko kwawe. Arakumuha, araheza aramwuriza, amushira mu mukogote wiwe.

¹⁶Aramubarira, ati Ngo tujane, urābe ishaka mfitiye Uhoraho. Nukw amujana mu mukogote wiwe.

¹⁷Ashitse i Samariya, ageseza abāri basigaye bose kuri Ahabu bar’ i Samariya, gushitsa abaherengeteje, nk’ukw ijambo ry’Uhoraho ryavuze, iryo yabariye Eliya.

¹⁸Bukeye Yehu akoranya abantu bose, arababarira, ati Ahabu yasavye Bayali buhoro, ariko jewe Yehu nzomusaba bishimitse.

¹⁹None rero ni mumpamagarire ba kamenyi ba Bayali n’abamusenga bose n’abaherezi biwe bose; ntihaze hasigare n’umwe; kuko ngomba guha Bayali ikimazi gihambaye; ūzobura kuza wese azokabona. Ariko Yehu cār’ icenge, kugira ngw abone kugeseza abasenga Bayali.

²⁰Maze Yehu aravuga, ati Mushinge ikoraniro ry’agahebuza rya Bayali. Nuko bararitāngāza.

²¹Nuko Yehu atuma mu Bgisirayeli hose; abasenga Bayali bose baraza, ntihagira umuntu n’umwe asigara ataje. Baraza binjira mu ngoro ya Bayali; iyo ngoro ya Bayali iruzura, ukūye ku mukondo ukageza ku muryango.

²²Maz’ abarira uwajejwe ububīko bg’imyambaro, ati Zanira abasenga Bayali bose imyambaro. Nukw arayibazanira.

²³Maze Yehu yinjirana na Yehonadabu mwene Rekabu mu ngoro ya Bayali, abarira abasenga Bayali, ati Ni musuzume murābe, ntihagire n’umwe mu bantu b’ Uhoraho yoba ari ngaha, atar’ abasanzwe basenga Bayali bonyene.

²⁴Nukw arinjira ngw atange ibimazi, yōse n’ivy’ ukwoswa. Ariko Yehu yari yaregetse hanze abantu mirongumunani, arababarira, at’ Aba bantu mbagomoreye, ni haramuka hagize ūcika, uwo acikanye arasubira mu gishingo ciwe apfe.

²⁵Maz’ ahejeje kwosa ibimazi, abarira abashibamyi n’abagabisha, ati Ni mwinjire mubice, ntihagire ūbasohokana n’ umwe. Nuko babaririkisha inkota. Maz’ abo bashibamyi n’abo bagabisha babakwegera hanze, baja hirya i budashikwa mur’ iyo ngoro ya Bayali.

²⁶Inkingi zari mur’ iyo ngoro ya Bayali bazijana hanze, baraziturira.

²⁷Maze bamenagura inkingi ya Bayali, basangangura iyo ngoro yayo, bayihindura umusarane gushitsa na bugingo n’ubu.

²⁸Uko ni ko Yehu yahenebereje ya mana Bayali, akayikūra mu Bisirayeli.

²⁹Ariko rero Yehu ntiyaretse gukurikira ivyaha vya Yerobowamu mwene Nebati, ivyo yakoze akabikwegeramwo n’Abisirayeli, n’ivy’ ibishushanyo vy’amamasa vyacuzwe mw izahabu, vyar’ i Beteli n’i Dani.

³⁰Hanyuma Uhoraho abarira Yehu, ati Ko wakoze neza, ugakora ivyo mbona kw ari vyiza, ugashitsa imigabo yanje yose nari mfise ku nzu ya Ahabu, abana bawe bazokomeza ku ngoma mu Bisirayeli gushitsa ku mwuzukururuza wawe.

³¹Ariko Yehu ntiyababara kugendera mu vyagezwe vy’Uhoraho Imana y’Abisirayeli n’umutima wiwe wose; ntiyava mu vyaha vya Yerobowamu, ivyo yakoze akabikwegeramwo n’Abisirayeli.

³²Mur’ ico gihe Uhoraho atangura kugabanya igihugu c’Ubgisirayeli; Hazayeli abanesha ku mbibe zose z’Ubgisirayeli,

³³uhereye kuri Yorodani ugasubiza i burasirazuba, igihugu cose c’i Gileyadi, n’ic’ Abagadi n’ic’ Abareyubeni n’ic’ Abamanase, uhereye kuri Aroweri ho ku mwonga wo kuri Arunoni ukajana i Gileyadi n’i Bashani.

³⁴Ibindi vyose vyadonzwe kuri Yehu, n’ivyo yakoze vyose, n’ivy’ ububasha bgiwe bgose, none ntivyanditswe mu gitabo c’ivyo ku ngoma z’abami b’Abisirayeli?

³⁵Nuko Yehu ahamvya ba sekuruza, bamuhamba i Samariya; maz’ umuhungu wiwe Yehowahazi asubira ku ngoma yiwe.

³⁶Igihe Yehu yamaze ku ngoma y’Abisirayeli yar’ imyaka mirongwibiri n’umunani.