Read Bibliya Yera 1951 2 Abami 11 Bible Online

2 Abami 11 - Bibliya Yera 1951 bible

2 Abami 11

¹ Maze Ataliya nyina wa Ahaziya abonye k’umwana wiwe Ahaziya apfuye, arahaguruka ageseza abo mu nda y’ingoma bose.

²Ariko Yehosheba umukobga w’umwami Yoramu, mushiki wa Ahaziya, afata Yowasi mwene Ahaziya, amukūra mu bana b’ umwami bariko baricwa, amujanana n’umurezi wiwe, amushira mu cumba kibīkwamw’ amariri; nuko bamunyegeza Ataliya, ntiyicwa.

³Maz’ amarana na we imyaka itandatu, anyegejwe mu ngoro y’Uhoraho; Ataliya na we aba ari we aganza igihugu.

⁴ Mu mwaka ugira indwi, Yehoyada atuma ku bagabisha bagaba ijana‐ijana bo mu Bakariti no mu bashibamyi, avuga ko baza iy’ ari mu ngoro y’Uhoraho; araheza asezerana na bo isezerano, abākira indahiro aho nyene mu ngoro y’ Uhoraho; maz’ abereka uwo mwana w’umwami.

⁵Arababarira, at’ Uko mukwiye kubigenza n’uku: aho muzozira kw isabato ku rubu rwanyu, ikigiragatatu canyu kize gishibame ku ngoro y’umwami,

⁶ikindi kigiragatatu kize gishibame ku kirimba citwa Suri, ikindi kigiragatatu kize gishibame ku kirimba inyuma y’ abateramyi bahasanzwe. Uko ni ko muzoshibamira iyo ngoro mukumiriye.

⁷Kand’ imice yanyu ibiri y’abazoba bageze gukūrwa kw isabato, iz’ ishibamire ingoro y’Uhoraho ah’ umwami ari;

⁸muze mukikize umwami impande zose, umuntu wese afise ibirwanishwa mu ntoke; ūzopfa kubēgēra aho mutonze imirongo, muze mumwice; muze mugume ku mwami ukw asohotse n’uko yinjiye.

⁹Nukw abo bagabisha bagaba amajana babigenza nk’uk’ uwo muherezi Yehoyada yageze kwose; umuntu wese azana abo kuja ku mbu zabo kw isabato, bahitana n’abāri bazirangije kur’ iyo sabato nyene, baja iy’ umuherezi Yehoyada ari.

¹⁰Uwo muherezi aha abo bagabisha amacumu n’inkinzo vyar’ ivy’ umwami Dawidi, bikabīkwa mu ngoro y’Uhoraho.

¹¹Nukw abo bashibamyi bahagarara kur’ iyo ngoro, uhereye ku ruhande rw’i buryo ugashitsa ku rw’i bumoso, bakikuza igicaniro n’iyo ngoro ah’ umwami ari, impande zose, umuntu wese afise ibirwanishwa mu ntoke.

¹²Maze Yehoyada asohokana uwo mwana w’umwami, amwambika igitsibo c’ubgami amuha n’Ibishinga intahe. Nuko bamwimikisha amavuta, bamugira umwami; maze bakoma amashi, baravuga, bat’ Umwami n’ahangame!

¹³Maze Ataliya yumvise urwamo rw’abashibamyi n’abantu, aza ah’ abantu bari mu ngoro y’Uhoraho.

¹⁴Yitegereje abona umwami ahagararanye n’inkingi, nk’uk’ umugenzo wabo war’ uri, n’abagabisha n’abavuza inzumbete bamuhagaze i ruhande, n’abantu bose bo mu gihugu banezerewe bavuza inzumbete. Ataliya araheza yitantamurirakw impuzu ziwe, avuza induru, ati N’umugararizo! N’umugararizo!

¹⁵Maz’ umuherezi Yehoyada abarira abagabisha bagaba amajana, bashiriweho kugaba ingabo zose, ati Ni mumusohore, mumucishe hagati y’imirongo y’ingabo, kandi ni hagira ūmukurikira mumwicishe inkota; kuk’ uwo muherezi yar’ avuze, ngo Ntatsindwe mu ngoro y’Uhoraho.

¹⁶Nuko baramukinjurira, ajana inzira amafarasi yatahana aja mu rugo rw’umwami; bamwiciraho.

¹⁷Maze Yehoyada ashinga isezerano hagati y’Uhoraho n’umwami n’abantu, ngo babe abantu b’ Uhoraho; ashinga isezerano no hagati y’umwami n’abantu.

¹⁸Abantu bose bo mu gihugu baca bagenda ku ngoro ya Bayali, barayisangangura; ibicaniro vyayo n’ibishushanyo vyayo barabimenagura rwose, kandi Matani umuherezi wa Bayali bamwicira imbere y’ibicaniro. Hanyuma umuherezi Yehoyada ashirah’ abateramyi bo guteramira ingoro y’ Uhoraho.

¹⁹Ajana ba bagabisha bagaba amajana na ba Bakariti na ba bashibamyi n’abantu bose bo mu gihugu; basohokana umwami mu ngoro y’Uhoraho, baramumanukana, bajana inzira ica mu kirimba c’abashibamyi, bamushikana mu ngoro i bgami. Bashitse, umwami avyagira ku ntebe y’ubgami.

²⁰Maz’ abantu bose bo mu gihugu baranezerwa, haba umutekano ku murwa. Uko ni ko bicishije Ataliya inkota, bamutsinze ku ngoro y’ umwami.

²¹ Yowasi yar’ amaze imyaka ndwi igihe yaja ku ngoma.