Read Bibliya Yera 1951 2 Abami 14 Bible Online

2 Abami 14 - Bibliya Yera 1951 bible

2 Abami 14

¹ Mu mwaka ugira kabiri Yehowasi mwene Yehowahazi umwami w’Abisirayeli ari ku ngoma, ni ho Amaziya mwene Yowasi umwami w’i Buyuda yima.

²Yar’ amaze imyaka mirongwibiri n’itanu igihe yaja ku ngoma, amara imyaka mirongwibiri n’ icenda i Yerusalemu ari ku ngoma; nyina yitwa Yehowadina w’i Yerusalemu nyene.

³Akora ivyo Uhoraho abona kw ari vyiza, ariko ntiyashikīra sekuruza Dawidi; yakoze nk’ivyo se Yowasi yakoze vyose.

⁴Mugabo ibitabo vyo ku mpinga z’imisozi ntivyakūrwaho; abantu bāri bagitangira ibimazi mur’ ivyo bitabo, bakahosereza imibavu.

⁵Hanyuma amaze kubona kw ahangamye ku ngoma, yica ba banyarugo bāri barishe umwami se wiwe.

⁶Arikw abana b’abo bicanyi ntiyabica, nk’uko vyanditswe mu gitabo c’ivyagezwe vya Mose, ivyashinzwe n’Uhoraho, ngw Abavyeyi ntibaze bicwe bazize abana babo, kand’ abana ntibaze bicwe bazize abavyeyi: ngw Arik’ umuntu wese az’ azire iciwe caha.

⁷Kandi yishe mu Banyedomu abantu ibihumbi cumi, abatsinze mu Kiyaya c’Umunyu; atera n’i Sela, arahatsinda, ahahindura izina ahita i Yokiteli na bugingo n’ubu.

⁸Hanyuma Amaziya atuma intumwa kuri Yehowasi mwene Yehowahazi, Yehowahazi mwene Yehu, umwami w’Abisirayeli, muti N’uze muhangane.

⁹Yehowasi umwami w’Abisirayeli atuma kwishura Amaziya umwami w’i Buyuda, mut’ Igitovu c’i Lebanoni catumye kw isederi y’i Lebanoni nyene, ut’ Umukobga wawe n’umushingire umuhungu waco. Bukeye igikōko caba i Lebanoni kihahise gikandagira ca gitovu.

¹⁰Nka ko waratsinze Abanyedomu, uraheza wishira hejuru mu mutima wawe: ego ni wihaye, arik’ ugume i muhira; n’iki gituma ugomba kwikwegera akaziri, mugapfa mwe n’ Abayuda?

¹¹Ariko Amaziya ntiyaruha amwumvira. Nuko Yehowasi umwami w’Abisirayeli ni kwo kudūga, bahanganira na Amaziya umwami w’i Buyuda i Beti‐shemeshi h’i Buyuda nyene, bararumana.

¹²Maz’ Abayuda baneshwa n’Abisirayeli, umuntu wese ahungira i we.

¹³Maze Yehowasi umwami w’Abisirayeli afata mpiri Amaziya umwami w’i Buyuda, mwene Yowasi, Yowasi mwene Ahaziya, amufatira i Beti‐shemeshi nyene; aca aja i Yerusalemu, asangangura uruzitiro rwaho rw’amabuye, uhereye kw irembo ry’Abefurayimu ugashitsa kw irembo ryo ku mfuruka, hose har’ amatambge amajana ane y’ ukuboko uciriye mu nkokora.

¹⁴Asahura amazahabu n’amafeza yose, n’ibintu vyose vy’imbombovu bāsanze mu ngoro y’Uhoraho n’ivyo bāsanze mu bubīko bgo mu ngoro y’umwami, afata n’abantu abajana bari mu bugōmbe, araheza asubira i Samariya.

¹⁵Ibindi vyose vyadonzwe kuri Yehowasi, n’ivy’ ubuhizi bgiwe, n’ingene yarwanye na Amaziya umwami w’i Buyuda, none ntivyanditswe mu gitabo c’ivyo ku ngoma z’abami b’Abisirayeli?

¹⁶Nuko Yehowasi ahamvya ba sekuruza, ahambga i Samariya hamwe n’abami b’Abisirayeli; maz’ umuhungu wiwe Yerobowamu asubira ku ngoma yiwe.

¹⁷Yehowasi mwene Yehowahazi umwami w’Abisirayeli amaze gutanga, Amaziya mwene Yowasi umwami w’i Buyuda amara iyindi myaka cumi n’itanu.

¹⁸Ibindi vyose vyadonzwe kuri Amaziya, none ntivyanditswe mu gitabo c’ ivyo ku ngoma z’abami b’i Buyuda?

¹⁹Bukeye ab’i Yerusalemu baramugarariza, ahungira i Lakishi; barungika abamukurikirana i Lakishi, bamutsindayo.

²⁰Umuvyimba wiwe bawuremēka amafarasi, bawuzana i Yerusalemu, bamuhamba hamwe na ba sekuruza ku murwa wa Dawidi.

²¹Maz’ abantu bose bahitana Uziya[4] baramwimika, bamusubiza ku ngoma ya se Amaziya; Uziya yar’ amaze imyaka cumi n’itandatu.

²²Ni we yasanasannye i Elati, ahagarura i Buyuda, umwami Amaziya amaze guhamvya ba sekuruza.

²³Mu mwaka ugira icumi na gatanu Amaziya mwene Yowasi umwami w’i Buyuda ari ku ngoma, ni ho Yerobowamu mwene Yehowasi umwami w’Abisirayeli yima i Samariya; amara imyaka mirongwine n’umwe ari ku ngoma.

²⁴Akora ivyo Uhoraho abona kw ari bibi; ntiyava mu vyaha vyose vya Yerobowamu mwene Nebati, ivyo yakwegeyemw’ Abisirayeli ngo bacumure.

²⁵Mugabo asubiza urubibe rw’i Bgisirayeli aharwo, uhereye ahafata i Hamati ugashitsa ku kiyaga co mu kiyaya Araba, nk’ukw ijambo ry’Uhoraho Imana y’Abisirayeli ryavuze, iryo yavugiye mu musavyi wiwe Yona mwene Amitayi w’i Gati‐heferi, uwo yavugisha.

²⁶Kuk’ Uhoraho yabonye amagorwa y’Abisirayeli iyo bava bakagera ingen’ ari menshi, kand’ ata mutabazi ariho wo kubatabara.

²⁷Arik’ Uhoraho ntiyari yaravuze kw azozimanganya izina ry’Abisirayeli musi y’ijuru, nuko rero, abakirisha Yerobowamu mwene Yehowasi.

²⁸Nukw ibindi vyose vyadonzwe kuri Yerobowamu, n’ivyo yakoze vyose, n’ivy’ ubuhizi bgiwe, n’ingene yarwanye intambara, n’uburyo yagaruriye Ubgisirayeli i Damasiko n’i Hamati, ahanyaze Abayuda, none ntivyanditswe mu gitabo c’ivyo ku ngoma z’abami b’Abisirayeli?

²⁹Maze Yerobowamu ahamvya ba sekuruza, ari bo bami b’Abisirayeli; umuhungu wiwe Zekariya asubira ku ngoma yiwe.